AYUBA 10 - KITABI HABARI MOPIOHE

¹ Wau̒ motolu wau molonuo̒ to tutumuluu̒, yi pilopau̒u opaaa̒to hilaau̒.

² Yaa Allahu Taa̒ala, ambunguolo diila mao̒ potalawa mai watotia; ambunguolo poo̒patata mai yilongola watotia tiluwalia lo Eeya.

³ Wolo paedaalio wonu Eeya modeehei odie, wau molapi tilapulo ilomata lo Eeya lohihilao? Wolo paedaalio wonu Eeya moboowo mai huhama wau ranjana lo tahileeta?

⁴ Huhama lo Eeya diila motutuu-wauwa wolo huhama lomanusia

⁵ wau umulu lo Eeya diila debo odelo ngolimbuo̒ umululio.

⁶ Wonu odito, yilongola ilaibu lo Eeya totoonulalo dosa lowatotia? yilongola yililapita lo Eeya timii̒du totala lowatotia?

⁷ Tutuulio tutu Eeya motota wau mongalati, deu̒ watotia diila ototala, bo otutu. Otaawa lo Eeya deu̒ penu boli ngotaa mao̒ diila mambo mopoa̒ahu watotia monto uluu̒ lo Eeya.

⁸ Watotia botie pilopowali mai lo ululu̒ Eeya, diila pongalo aakali botia watotia mapobinasa lo Eeya?

⁹ Ambunguolo, eelailo mai deu̒ lonto huta modudangia watotia piloh lo Eeya! Diila pongalo aakali pohutuo mai lo Eeya watotia muli mowali peyahuo̒?

¹⁰ Yiluasia lo Eeya tiyamo lo watotia lopowali mai olo watotia wau pilopo udaa̒ lo Eeya todelomo talomo liilo lo watotia.

¹¹ Batanga lo watotia pilohutu lo Eeya wolo tutuu-lalowaalo wau lintidu; tulalo watotia yilohia lo Eeya topu wau alipo pomolobani alipo pomolu.

¹² Yilohia mai lo Eeya watotia tutumulo; Eeya momonu olo watotia, nyawa lo watotia dilaha wau tilaalai lo Eeya.

¹³ Bo botia ilotaawa lo watotia deu̒ ngotilonggadu uito, lou̒ poo̒-poo̒oyo Eeya maa loranjana mai u mopotopotaala olo watotia.

¹⁴ He ilimatoa lo Eeya watotia wonu bolo watotia mohutu totala alihu mowali potouli lo Eeya u mongohi mai ambungu.

¹⁵ Wonu watotia mohutu mao̒ dusa, yi paladu lo watotia tutuulio tutu topotala! Bo wonu huhutu lo watotia diila o aibu, yi watotia debo he anggapuolo hemohutu dusa! Diila buheli watotia lumenggela mola, sababu molaasa susa wau hinahina.

¹⁶ Wonu watotia ilohaasili, eleponu diila botie woloolo, Eeya mohilapita olo watotia debo odelo singa. Wau muli mopoi̒laalo kawasa lo Eeya, bo u mopoo̒ohe olo watotia.

¹⁷ Laito hepodudulai lo Eeya sakusi moluwali olo watotia; wau helebe he udaa̒ mola muluka lo Eeya olo watotia. Ilambu lo Eeya papaa suukaniyala bohu u moluhu wau mopaatea wolo watotia.

¹⁸ Yilongola piloluli lo Eeya watotia pilotutulio mai ode dunia? Lebe mopiohe watotia mateelo mao̒ tou̒ diipo iloontonga lo manusia!

¹⁹ Yi debo odelo watotia diila pee̒enta mao̒ pilotutulio mai, sababu lonto talomo lato yilobungio.

²⁰ Aa, diilalo mohiheo watotia maamate, yi poluliyalo mai watotia lohihilao, alihu watotia moo̒ raasa mao̒ maasa lo watotia u bolo labitio botie.

²¹ Diilalo mohiheo watotia monao̒ wau diilalo mohualingai, motidulunga ode lipu u modio̒lomo wau motontoyoo̒mo daa̒,

²² lipu u motontoyoo̒mo, polupolu lo wolilu wau puuyota, tou̒toonu u mobaango tutuuwauwa wolo u modio̒lomo.”