2 TIMOTIUS 2 - KITABI HABARI MOPIOHE

Pajule li Almasi taatatapu wau molotolo hilao

¹ Timotius, walau̒uu̒! Mamusi yio̒ mowali molotolo wolo odehu hilao uilohi mai de olanto, sababu ito lotituwau woli Isa Almasi.

² Pongajali u omoo̒molu mai̒lo dungohemu lonto olau̒ totalu lotaa dadaata, mamusi pomalacayamu mao̒ ode tau-tauwala tamowali palacayalo wau tamotoloo̒ mongaajali taa wewo.

³ Yio̒ musi moduduo̒ modutolo odelo pajule li Isa Almasi taatatapu wau molotolo hilao.

⁴ Pajule ngota tadonggo otuugasi, diila tamotolo pusingi batangalio wolo uu̒u-luusanilio lohihilao, sababu tio ohilaa mopo sanangi hilaa li eeyanggulio.

⁵ Olaragawani ngota diila tamowali juala todelomo mobaalia, wonu tio diila modungohe wuwuu-uduwaalo.

⁶ Tamoomengia tamalo kalaja moo̒ohuu̒, tio-tiolo tabohu-bohulio ohaku moo̒tapu tilapula lou̒ pilomulio.

⁷ Toloe̒elai mola wolo u tiloo̒woliu̒ mai boito, sababu Eeya mamongohi mai olemu owalia u mongalati ngoa̒amilalo.

⁸ Poo̒toloma mao̒ utie: Habari Mopiohe upilo habariu̒ mai boito yito habari pasali li Isa Almasi, wali lei Dauda; Tiolo ti Almasi tamaaluli tilumumulai lonto opopate.

⁹ Sababu helo pohabari Habari Mopiohe boitolo, wau̒ lodutolo; tumbao̒ dilumutu yilantealio debo odelo ngotaalio lo tamoleeto. Bo tahuda lo Allahu Taa̒ala diila mowali lantealo.

¹⁰ Uitolo sababuulio wau̒ sabali helomanta ngoa̒amilalo boito duo̒lo polohuna daa̒ ode tau-tauwalo tamaa tilulaoto Allahu Taa̒ala, alihu timongolio olo moo̒toduo oa̒ahu uilohi lotimbulude li Isa Almasi, wau u tilunuhe lo odudaa̒ ubakaa.

¹¹ Otutu banari loi̒ya botie, “Wonu ito mailate pee̒-pee̒enta wo-Lio, ito matumumula olo pee̒-pee̒enta wo-Lio.

¹² Wonu ito debo sabali, ito mamo malenta olo pee̒-pee̒enta wo-Lio. Wonu ito momaahe o-Lio, Tio olo mamomaahe olanto.

¹³ Wonu ito diila tatapu wau molotolo hilao, Tio debo tatapu wau molotolo hilao, sababu diila mowali Tio mobulemenga wolo batanga-Lio lohihilao.”

Taa u mokalaja tamoo̒tapu poloilaalo momuji

¹⁴ Mamusi yio̒ mopoe̒elao̒ tau-tauwala tomimbihu ngoa̒amilalo botie. To talu lo Allahu Taa̒ala, naseehatia mao̒ timongolio alihu diila mohaamawa tomimbihu totoonulalo istila. Uito diila ohunalio, tumbao̒ bomoo̒ tolonggalo totau-tauwalo tamo dungoheo̒.

¹⁵ Yio̒ mamusi motolopani tio̒otutua alihu toloa̒kuwo lo Allahu Taa̒ala odelo taa patuti mokalaja duo̒lo Allahu Taa̒ala. Potolo panilo alihu yio̒ diila moolito tomimbihu kalajamu, bo mongaajali mao̒ lou̒ tuhata totoonulalo pongaajali u otutu monto Allahu Taa̒ala.

¹⁶ Walahe mao̒ bibii-salawaalo udiila ohunalio wau u mohina Allahu Taa̒ala. Bibii-salawaalo debo odelo uito bo mohutu totau helebe moleetao̒.

¹⁷ Pongaajali lotau-tauwala boito moloo̒po debo odelo ngongoto kankeri utilahuo̒. Towolota limongolio leiwaito tei Himeneus wolei Piletus.

¹⁸ Timongolio malo palingo lonto pongaajali u otutu, wau lopo ambulati opopalacaya lotaa ngobutao̒. Timongolio hipo loi̒yawa deu̒ obobongu monto opopate malo toduo.

¹⁹ Bo daasali motoheeto u pilohutu mai lo Allahu Taa̒ala diila mowali etuwolo. Toitaatio tulatulade utie, “Eeya moo̒onuhu tau-tauwalo miliki-Lio”, wau “Taa u moloi̒ya deu̒ tio miliki lo Eeya, tau boito musi mohuheli mohutu huhutu utalatala”.

²⁰ Todelomo bele uleidaa̒ woluo pakaakasi u hidala-dalaala. Woluo upilohutu monto talaa̒ meaalo hulawa, bo woluo olo u monto ayu meaalo huta. Woluo upomake to opopalalu upolu-polutuo̒, wau woluo olo upomake to opopalalu biasa.

²¹ Taa umopo belesi mao̒ batangalio monto ngoa̒amila u moleeto, tau boito mapomake to opopalalu upolu-polutuo̒. Tio mowali miliki u tolomodu wau ohuna odeli tuanilio. Tio pilodapato u pomake totimii̒du kalaja umopiohe.

²² Walahe mao̒ totoonulalo osanangi lotaa himuudawa. Potolo-panilo mola u tumumulo modudua̒ u otohilaa lo Allahu Taa̒ala, tatapu wau molotolo hilao to pongaajali-Lio wau motolia̒ngo timongotalio, wau ohilao tantalamu. Poti tumulolo odito pee̒-pee̒enta woli mongolio tahi pongibode mei̒ tulungi to Eeya wolo hilaa ubelesi.

²³ Diila mao̒ podudua̒ todelomo polo haamawa lotaa hihuulode tadiila motota lolo-loolo. Otaawamu deu̒ ngoa̒amila boito bomoo̒ toodei polo taameta.

²⁴ Tamo kalaja ode Eeya diila paatuti motaameta; tio musi aaluti ode taa ngoa̒amila wau mowali mongaajali tau lou̒ mopio wau sabali.

²⁵ Tio musi wolo molumboyoto mongaajali tau-tauwalo tao̒hilaa moluwali; pohileaala dua̒ Allahu Taa̒ala mongohi hiyango ode tau-tauwala boito u molilihu to duduu-sawaalo limongolio wau motota lo pongaajali u otutu.

²⁶ Lou̒ odito timongolio mowali muli mongalati batangalio wau molopato monto hentobu lo Ibilisi umalo tawalo olimongolio wau lomakusa olimongolio lodudua̒ otohilaalio.