2 PETRUS 3 - KITABI HABARI MOPIOHE

Danti pasali podudungga mai lo Eeya

¹ Mongo wutatuu̒ tao̒tolia̒ngo! Utieelo tuladu laatia u oluolio ode limongoli. Todelomo oluo lotulade botie, watia motolopani momongu totoonulalo pikiilangi ubelesi tolimongoli.

² Watia mopoa̒hu mai alihu timongoli mamoe̒ela mola loloo-iyaalo u muloololio mai yiloi̒ya lomongo nabi lo Allahu Taa̒ala, wau palenta lo Eeya, Olongia Tamoo-poa̒ahua, upilo tunggulio olimongoli lotimbulude tomongo rasulu.

³ Bohu-bohulio, musi otaawa mao̒ limongoli deu̒ to duduu-laheyaalo pulitio malumenetai tau-tauwalo tatutumulio he kiluwasa lonapusu limongolio lohihilao. Timongolio mamososero olimongoli

⁴ lou̒ moloi̒ya odie, “Ualio Eeya lodanti mamei dungga mai! Botia toonu Tio? Mongo tiyamo loluhurunto mailate, bo totoonulalo u hitua-tuawua donggo tutuuwauwa wambao̒ debo odelo anggadu ilowalia mai lo aalamu!”

⁵ Timongolio sangaja diila mohuto momasisi deu̒ muloololio mai daa̒ Allahu Taa̒ala lopowali mai hulungo wau dunia lo pilimani-Lio. Dunia pilowali-Lio mai monto taluhu, wau wolo taluhu;

⁶ wau wolo taluhu olo – deu̒ito-yito taluhu monto taluhu daa̒ tutu – dunia muloololio mai daa̒ boito pilobinasa.

⁷ Bo hulungo wau dunia uwoluo masaatia botie, tilaala lo pilimani Allahu Taa̒ala boito olo u de mopobinasa wolo tulu. Botia hulungo wau dunia donggo taataalo dilumutu todulahe tau-tauwalo tahileeta hukuumanio wau pobinasaalo.

⁸ Bo mongo wutatuu̒, sua̒li tuwau botie diila mao̒ lipata limongoli; deu̒ todelomo bibilohu Eeya, ngohui diila ohiihedio wolo ngolihu lotaunu – duduuluwolo tutuuwauwa wambao̒ o-Lio.

⁹ Eeya diila moboyu mongohi mai wolo u madilanti-Lio eleponu woluo tahemo lantobe odito. Bolii̒o mao̒, Tio sabali to olemu, sababu Tio diila mohuto penu boli ngotaa mao̒ binasa. Tio motohilaa alihu ngoa̒amila tau molilihu monto totoonulalo dusalio.

¹⁰ Bo Dulahe podudungga mai lo Eeya mamei dungga debo odelo tamootao̒wa. To Dulahe boito, hulungo mamooli wolo tingohu bulonggodu, wau uu̒u-pangowalo tohulungo mamaahu mopobu, wau dunia wolo totoonulalo uwoluo todelomio mamooli.

¹¹ Sababu ngoa̒amilalo boito maa antuluo-Lio wolo dudelo u odito. Tingga woloolo mola wajibulio timongoli tumumulo? Timongoli musi tumumulo mantali wau tolomodu duo̒lo Allahu Taa̒ala,

¹² ngotilonggadu timongoli mohima wau moololo dudunggalio mai Dulahu Allahu Taa̒ala. To dulahe boito hulungo mamaahu mopobu, wau sababu patulio, yi uu̒u-pangowalo to hulungo mamowali taluhu.

¹³ Bo ito mohima wolo umapilo danti mai lo Allahu Taa̒ala, deu̒ito-yito hulungo u bohu wau dunia u bohu, tou̒toonu woluo u aadili.

¹⁴ Sababu uito, Mongo wutato tao̒tolia̒ngo, tou̒ timongoli donggo hemohima Dulahe boito, potolo panilo tio̒otutua u tumumulo mantali wau diila oa̒aibu totalu lo Allahu Taa̒ala. Wau taalai mao̒ wumbuta u mopiohe wolo Allahu Taa̒ala.

¹⁵ Anggapuwalo osaabali lo Eeyanto odelo hiyango uilohi-Lio mai olimongoli alihu mowali moa̒ahu. Tei Paulus, wutatonto tao̒tolia̒ngo, maloludei odito olo olimongoli. Tio loluladei uito wolo tinepo uilohi lo Allahu Taa̒ala olio.

¹⁶ Todelomo ngoa̒amila tuladio, tei Paulus laito hemoluladu pasali losua̒li boito. Memangi woluo dengolo sua̒li u mototolo todelomo totoonulalo tuladio boito. Wau to bagiyangi boito pilopo boboolio̒ lotau-tauwalo tadiila hitootawa lolo-loolo wau diila motoheeto iimanilio. Sua̒li boito diila moo̒linggolabe, sababu bagiyangi wewo lo Kitabi pilohutu limongolio odito olo. Wolo u pilohutu limongolio boito bo moo̒ sababu obobinasa olimongolio lohihilao.

¹⁷ Bo timongoli, Mongo wutato tao̒tolia̒ngo, malotota pasali losua̒li boito. Sababu uito, poo̒dahailo mao̒, diila bolo timongoli odelowa ode dalalo umoo̒ lapalo lotau-tauwalo tahi luusawa pii̒lilio tilinggula timongoli modehu monto tambati potidutaa̒ limongoli u motoheeto.

¹⁸ Mamusi timongoli helebe moo̒laasa ponu li Isa Almasi, Eeya wau Olongia Tamoo-poa̒ahua olanto, wau mamusi timongoli olo helebe motota o-Lio. Ilopujiaalo mola Tio, botia wau dilumutu ohiheo-hiheolo mao̒! Amin. Hulumati lamiaatia, Petrus 9