1 TIMOTIUS 4 - KITABI HABARI MOPIOHE

Guguu-ruwaalo Paluti

¹ Rohullah wolo pintalo lotahuda mai deu̒ to mamaa-sawaalo umamei dungga mai, ngotayadu tau mamolapi iimanilio, momaahe li Almasi. Timongolio mamo dungohe to roroo-huwaalo umopo lapalo wau modudua̒ popoo-ngajaliyalo lorohu u moleeto,

² upilopo tunggulai lotimbulude totau-tauwalo munapiki tamoo-himbuloa. Hilaa u maloo̒tapu tinelo Eeya lotau-tauwala boito malo dio̒lomo.

³ Timongolio mongaajali tau u diila monika wau diila molamelo ua̒alo utantu-tantu. Lebe-lebe pomao̒ ua̒alo boito pilowali mai lo Allahu Taa̒ala u mowali tameloolo wolo polo lapali oduo̒lo o-Lio lotau-tauwalo tamalo malacaya li Almasi wau malotota pongaajali u otutu lonto Allahu Taa̒ala.

⁴ Totoonulalo hitua-tuawua u pilowali mai lo Allahu Taa̒ala boito mopiohe, wau diaaluo penu boli tuwau mao̒ u musi anggapuolo halamu wonu matilolimo wolo lapali oduo̒lo ode Allahu Taa̒ala.

⁵ Sababu balakati monto Allahu Taa̒ala wau dua̒ mohutu ua̒alo boito mowali halale.

Tamoomayawa li Isa Almasi tahemo kalaja wolo mopiohu

⁶ Wonu yio̒ mopoa̒ajali mao̒ ngoa̒amilalo boito tomongo wutato ngoi̒imani, yio̒ mamowali tamoomayawa li Isa Almasi tahemo kalaja wolo mopiohu. Wau yio̒ malaito molaala hilaamu wolo tahuda lo Allahu Taa̒ala u pilalacayanto, wau wolo totoonulalo pongaajali u otutu umaa diludua̒mu ngotilonggadu botie.

⁷ Walahe mao̒ sisii-litawalo tahayulu udiila ohuna. Mamusi latiyolo batangamu ode tutumulo u otabia.

⁸ Latihani lobatanga bo ngoi̒di hunalio, bo latihani lorohu ohuna todelomo totoonulalo sua̒li, sababu wanto-wantohe danti ode tutumulo tomaasa botie wau maasa u mamei dungga mai.

⁹ Sua̒li boito otutu wau paatuti tolimoolo wau palacayalo tio̒otutua.

¹⁰ Uitolo sababuulio ito mohipate wau mokalaja moo̒ohuu̒, sababu ito motiwunela lealeaatulo mao̒ ode Allahu Taa̒ala tatumu-tumulo; deu̒ito-yito Tamoo-poa̒ahua ngoa̒amila tau, laba-labaalo daa̒ tau-tauwalo tapalacaya.

¹¹ Pongaajalia mao̒ ngoa̒amilalo boito wau ahulilo tau-tauwala moduduo̒.

¹² Diila mao̒ polulia penu boli ngota monganggapu olemu dupadupapa sababu yio̒ donggo muda. Bolii̒o mao̒, mamusi yio̒ mowali obaayawa lotau-tauwalo palacaya todelomo loi̒yamu wau pii̒limu, todelomo dudelomu motolia̒nga ngota timongota wau palacaya li Isa Almasi, wau wolo tutumulumu ubelesi.

¹³ Sambela uito, dilumutu wau̒ de monao̒ mai, yio̒ musi motio̒otutua mopobaca mao̒ Kitabi ode tau-tauwalo, wau mohuntulo boli mongaajali olimongolio.

¹⁴ Diila mao̒ palongamu momake ponu monto Rohullah uilohi-Lio mai olemu tou̒ mongo tau̒wa lojamaa̒ mopodutu lo uluu̒ limongolio toitaato lunggongumu, wau mongo nabi mopo tunggulai tahuli lo Allahu Taa̒ala tomimbihu batangamu.

¹⁵ Kalajai mao̒ ngoa̒amilalo boito lou̒ tio̒otutua alihu ololaiu̒mu oontonga lotaa ngoa̒amila.

¹⁶ Imatowalo batangamu wau imatowa mao̒ olo pongajalimu. Mamusi yio̒ tatapu wau molotolo hilaa mohutu ngoa̒amilalo boito, sababu lou̒ odito yio̒ mamo poa̒ahu mopio batangamu lohihilao meaalo tau-tauwalo tamo dungohe olemu.