Lukas 4 - O GIKIMOI AWI JAJI ma BUKU

O Yesus gena o Iblis widahake iwibaja

¹ Daboloku, o Yesus o Yordan ma Seleraka so he womajobo de o Gurumi Datetebi ma kuasa daasu-asu wipareta so wingaho o tona ibobeleuka.

² O orasi magena ma deka o putu moruha de o wange moruha o Yesus kagena wogogeku, de o Iblis iwibaja la ma ngale o dorouku wisitura. O orasi magena ma deka o putu moruha de o wange moruha woodowa de woudowa, so dabolo Una wisapika.

³ So kagena de o Iblis iwibaja de itemo Unaka, “Ngona gena igogou o Gikimoi Awi Ngopa. So hika o bi teto manena nasulo la imadadi o roti la aku naodo.”

⁴ Duma Una wosango wotemo, “Kanaga o Gikimoi Awi Jaji ma Bukuka isilefoka, ‘Nako o bi nyawa gena upa ka cawali o ino so ioho.’ ”

⁵ Kagena de o Iblis iwingaho kali o riho moi ikukuru-kuruye, so ma dokuka de imatodoka wisikelelo o dunia ma bi bangsa dangodu Unaka,

⁶ de itemo, “O kuasa ma ngale o bi bangsa de manga kaya manena dangodu ngohi tapareta, de magena asa tonihike Ngonaka, sababu ngohi aku tahike nagoonaka o kia bato todudupa.

⁷ So o orasi manena bato ngohi asa dangodu magena tonihike Ngonaka, hitilahi nobukuku de nosuba ngohika.”

⁸ Magena de o Yesus wotemo, “Kanaga o Bukuka isilefoka, ‘Bilasu nowisuba nanga Jou Gikimoika de cawali ka Una nowileleani.’ ”

⁹ Dabolo de o Iblis o Yesus iwingaholi o Yerusalemka, de iwihado kadaku o Gikimoi Awi Tahu ma ponaka, de itemo Unaka, “Igogou! Ngona o Gikimoi ma Ngopa. Hika kanena de kudahu nomatura.

¹⁰ Ngona nidoohawa, sababu o Gikimoi Awi Jaji ma Bukuka isilefoka, ‘Ma ngale Ngona gena Una asa Awi malaikat wapareta, la ona inijaga Ngona isidodiahi,

¹¹ so ona magena asa inigubare, ma ngale Ani dohu lo o tetoku upa yadahe.’ ”

¹² So o Yesus wosango wotemo, “Kanagasi o Bukuka isilefoli komanena, ‘Ani Jou Gikimoi gena upa nowidahake.’ ”

¹³ O Iblis magena de o baja dangodu magena o Yesus iwibaja dabolo, de gila-gila woloda de wotamaha done o orasi daloloha moili.

O Yesus Awi manara wosolano o Galileaka

¹⁴ Dabolo de o Yesus de o Gurumi Datetebi magena ma kuasa wipareta so woliho wahika o Galilea ma tonaka. O Galilea ma sigilolino o habari ma ngale Una gena o bi nyawa yogiise de yanako.

¹⁵ Una wahika manga puji ma bi tahuka wodoto, de o nyawa yangodu iwigiliri Unaka.

O Nazaretka iholu o Yesus wipiricaya

¹⁶ O Yesus wotagi to Una Awi soa de Awi doku o Nazaretka. Kagena de, maro ma biasa to Una Awi manara ma rabaka, so o Sabat ma wangeka Una wotagi wowosa o puji ma tahuka. Kagena de Una womaokoye la o Gikimoi Awi Jaji ma Buku wabaca,

¹⁷ de iwihike ma nabi Yesaya awi buku. O buku magena wadehe de wapelenga sidago wamake o demo manena,

¹⁸ “O Jou Gikimoi Awi Gurumi kanaga Ngohika, sababu Una Ngohi woisitatapu la Ngohi o habari daloloha tosihabari o bi nyawa isususaka. Una woisulo la tasingangasu yatatagoka, ‘Nogena ngini nipalakoka!’ Una woisulo la tasingangasu ipipiloka, ‘Orasi manena dabolo ngini nimasigeleloka!’ De Una woisulo la yasidodipito gena tapalako.

¹⁹ De Una woisulo la tosihabari o habari ma loha, gena ma orasi yaadoka la o Jou Awi laha asa wosidumu Awi nyawaka.”

²⁰ O Yesus wabaca daboloka, de o buku magena walolo kali de wosigiliho woleleleanika, so womatamiye la wodoto. O bi nyawa o puji ma tahuka yangodu Una iwinano gena, yodupa Awi dodoto yoise.

²¹ Kagena de Una wotemo onaka, “O wange manenaka o Gikimoi Awi Jaji ma Buku ma gimina, kiaka tababacaka gena, kangano ma orasi nioise gena asa isiganapu.”

²² Ona isigigise gena yangodu yohairani, de yotemo, “Igogou, Awi demo gena foloi itiai de daloha bai! Duma Una gena ka o Yusuf awi ngopa.”

²³ Magena de Una wotemo onaka, “Igogou, done asa ngini ma binuka nisitemo o ade-ade manena Ngohika, ‘He, dokter! Hika Ani rohe masirete gena nosiloha kasi. Nakoso igogou Ngona o nabi moi, de Ngona lo kanena Ani doku masireteka naaka o nonako ihahairani, kiaka miiiseka naaka daboloka o Kapernaumka.’

²⁴ Duma ngini gena tinisingangasuli igogou, nakoso o nabi moi kanaga to una awi doku masireteka wogoge gena asa iwihoromatiwa.

²⁵ Igogou, o kia naga asa idadadi o orasi manena, gena imatero de o kia naga idadadika ma orasi idodoma ma nabi Eliaka. O orasi magenaka, de idadi imuurawa ma deka o taungu saange de o ngoosa butanga, sidago o bare imasidiado o bi doku dangoduka so o ino ihiwa. O orasi magena o Israel ma tonaka kanaga ibabalo yadala manga oho isusa.

²⁶ Duma o Jou o Elia wisulowa la una ibabalo gena moi lo waali wariwo, ka cawali wisulo la wotagi mobabalo moi o Sarfat ma dokuka, ma ngale womiriwo muna o Sidonka ma nyawa, gena o Israelka ma nyawa misowo.

²⁷ Komagena lo ma orasi o Elisa idodomaka, kanaga yapapado yadala o Israel ma tonaka. Duma yapapado gena moi lo o Elisa wasilohawa, ka cawali o Naaman, una o Siriaka ma nyawa.”

²⁸ O Yesus Awi demo magena yoiseka, de yangodu o puji ma tahu ma rabaka gena asa foloi yongamo.

²⁹ So ona imaoko de Una manga dokuno iwisisupu, de manga doku gena o tala ma dokuka, so iwingaho ma dirasuka. Manga edekati la o dirasuku wisipaka la wosone.

³⁰ Duma Una womabulutu ka wotagi, de yadadala gena manga sidongirabaka watola so womajoboka.

O Yesus o nyawa moi awi toka wodusu

³¹ Dabolo de o Yesus wokahika o Kapernaum ma dokuka o Galilea ma tonaka. Kagena womasidiado gena o Sabat ma wangeka Una o puji ma tahuka wodoto.

³² O nyawa yosigogigise Awi dodoto magena yangodu yohairani, sababu Una wodoto de wikuasaka.

³³ Ma orasi magena o puji ma tahu ma rabaka o nyawa wikokitoka moi de una womatoore wotemo o Yesuska,

³⁴ “He, Yesus! Ngona o Nazaretno Ani edekati o kia dede ngomi. Ngona nahino la nomimorutu ngomi? Ngohi toninakoka, Ngona gena o Sosulo Nitetebi moi o Gikimoino.”

³⁵ Kagena de o Yesus wodogore o toka magenaka wotemo, “Nomapopongo de nosupu o nyawa una manenano!” Kagena de o toka magena datoosa so o nyawa magena iwisipaka yadadala manga sidongirabaku, de o nyawa una magenano isupu duma iwidoohawa.

³⁶ O bi nyawa yangodu yohairani poli, sidago ona itemo moi de moika, “Wobarani bolo! Una Awi kuasa so aku wapareta o bi toka isupu, de igogou isupuka.”

³⁷ Magena de o habari ma ngale Una yogiise sidago o bi doku magena ma sigilolika.

O Yesus o Simon Petrus ma toroa de yadala lo wasiloha

³⁸ Dabolo de o Yesus wosupu o puji ma tahuno, de wotagi o Simon awi tahuka. Kagena o Simon ma toroa womimake, muna magena misiri datubuso de o sosahu mitubu. So o Yesus iwigolo la tanu womiriwo munaka.

³⁹ Kagena de Una wahika womaoko ami dangi ma dateka, de wotemo, “Siri, nomahoi!” Gila-gila miputuruka, so muna aku ona maleleani.

⁴⁰ O wange he itumuka, de o nyawa yadala kiaka yabisisiri de o panyake ma bio idala gena yatotota Unaka, de Awi gia wasipada ona moi-moiku de asa yalohaka.

⁴¹ De yakokitoka yadala manga toka wodusu so imahoika. De manga toka wodudusu gena imatoore itemo, “We! Ngona manena o Gikimoi ma Ngopa!” Duma Una wasimaha kawa manga toka ibicara, sababu o toka lo iwinako Una magena o Salamati ma Kolano.

O Yesus wodoto o doku wageto

⁴² Ilangi-langi daginitano, de o Yesus o doku magenaka de wosupu so wahika o riho moi imatitingano. O nyawa yadala iwisari sidago Una iwimakeka. Ona iwigolo la Una upa ona wadongosa.

⁴³ Duma Una wosango wotemo, “Ngohi lo bilasu togila-gila totagi kadoke o doku ma somoaka, de o habari daloloha tosihabari ma ngale o Gikimoi asa wopareta maro o kolano moi. Sababu ma ngale magegena so Ngohi isulo la tahino o dunia manena ma dokuka.”

⁴⁴ Kagena de Una wotagi so o habari daloloha wosihabari o bi puji ma tahu ma rabaka o Yudea ma daera ma sigilolika.