Gogelelo 10 - O GIKIMOI AWI JAJI ma BUKU

O gogelelo ma ngale o nabi ma manara

¹ Kagena de ngohi takelelo o malaikat ma somoa moili wonononau, una magena o sorogaku wouti. Una magena o lobi-lobi iwisaono, de awi saheka kanaga o ngawate yalalono, de awi bio ma siwa maro o wange ma siwa de lo awi dohu maro o uku ma golingasu.

² Kanaga awi giaka o buku ma ceceke o lolo moi de o buku magena ipelengaka. So una awi dohu ma girina o teoku womasigipitoku de awi dohu ma gubali o dududuka womasigipitoku.

³ De una womatoore womaili-ilika maro o singa imatoore. Womatooreka, de o diwotu iwisango ma dupuru isidadu ma para tumudingi ma ili ka ilamo poli.

⁴ So o diwotu magena idupuruka, de ngohi ai edekati o demo magena talefo, duma toise o ili moi o sorogaku itemo, “O diwotu ngai tumudingi ma demo gena upa nalefo, de magena bilasu nosipongoka so upa nosingangasu.”

⁵ Kagena de o malaikat una gena awi gia ma girina watide o sorogaye,

⁶ de wosasi o Gikimoi Awi ronga Una magena wooho ka sidutu ikakali o soroga, o dunia, o ngoloto de lo ma raba o bi moi-moi dangodu gena wosidadika. So o malaikat magena wosibobeto wotemo, “He! O Gikimoi asa wotamaha kawa ma orasi gena yaadoka.

⁷ Kanaga o malaikat ma tumudingika done ma orasika awi trompet magena wawuwu, de o Gikimoi Awi edekati waiihu gena asa waaka ma ngale Awi dupa wosiboloka. Awi edekati magena imatero de o kia wasingangasu Awi sosulo-sosuloka, ena gena o bi nabi-nabika.”

⁸ De ma ili o sorogano magena ibicara ngohika itemo kali, “Notagi o malaikat una womasigogipito o teoka de o dududuka, la o buku o lolo moi awi giaka magena nadehe kasi.”

⁹ Ngohi totagi o malaikat magenaka, de togolo totemo, “Tanu o buku ilolo ma ceceke magena noihike ngohika.” So una wotemo ngohika, “Nadehe de naodo namata-mataka o buku magena. Done asa ani uru ma rabaka ma jame damuti maro o madu, duma ani poko ma rabaka de asa idadi damali.”

¹⁰ Kagena de o buku ma ceceke o lolo moi magena o malaikat awi giaka ngohi tadehe de lo taodoka. To ngohi ai uru ma rabaka tajame damuti maro o madu, duma ma orasi tadasika, de ai poko ma rabaka de asa idadi damalika.

¹¹ Dabolo de isulo ngohika, “Ngona gena bilasu nasingangasu kali o Gikimoi Awi demo manena ma ngale o bi bangsa moi-moika, de o bi soa moi-moika, o bi bahasa moi-moika de lo manga kolano yangoduka.”