Dodadi 8 - O GIKIMOI AWI JAJI ma BUKU

O ake ituru

¹ O wange 150 eko o ngoosa motoha magena ipasaka, de o Gikimoi o Nuh de lo o bi haiwani dangodu o deru ilalamo ma rabaka gena wisininga. So Una waaka o dunia ma dokuko o paro iwuwu ikokiloli, so o ake magena asa isolano ituru.

² O ake ma bi jobubu iluluku-lukuku dangodu gena wataku so itoguka de o bi lobi lo ihiwaka, so he imuura kawa.

³ O ake gena asa ituru imehe-mehe sidago o wange 150 ipasaka,

⁴ de o ngoosa ma tumudingi de ma wange mogiowo de tumudingika o deru ilalamo magena asa o Ararat ma bi talaka itorihi.

⁵ De o ake magena asa itoronu imehe-mehe sidago o ngoosa saangeli ipasaka, de o tala ma bi doku he ibaoka.

⁶ O wange moruha ipasaka, de o Nuh una magena o jangela moi wapelenga.

⁷ Una wapelenga de o namo wogo moi wapalako la isoso. De o namo magena isoso ikokiloli de itamaha o ake ituru ma ngale o dududu yasari.

⁸ Dabolo de una asa o namo dara moi wapalako kali la isoso ma ngale wanako o tona ibaoka eko hiwasi.

⁹ Duma o namo dara magena o riho moika itangi gena yamakewa sababu o ake ituru waasi. So isoso iliho kali de o Nuh awi giaka itangi so una wosingosa kali o deru ilalamo ma rabaka.

¹⁰ O wange tumudingi ipasaka, de o namo dara magena o Nuh wapalako kali.

¹¹ Damada-mada de o namo dara magena iliho kali o Nuhno, eh, ma uruka gena kanaga o soka moi damomuane, ena gena o gota moi ma ronga o zaitun. Kagena de o Nuh awi sininga ma rabaka wotemo, “Eh! Eh! Kanaga o tona ibaoka.”

¹² Bolo o wange tumudingili ipasaka, de o namo dara magena wapalako kali la isoso, duma o namo dara magena iliho kawa o Nuhno.

¹³ O wange monahalo de siwoli ipasaka gena o Nuh awi umuru he o taungu 601, de una o deru ilalamo ma ngora wapelenga de wanano o ake he daoaka.

¹⁴ O nahadi tupaangeli ipasaka, de o tona asa dadudu dangoduka.

¹⁵ So kagena de o Gikimoi asa wobicara o Nuhka wotemo,

¹⁶ “Ngona de ani tahu moi gena ningodu o deru ilalamono nisupu.

¹⁷ De lo o bi moi-moi iooho, ena gena o haiwani damomoroi, de o haiwani ifofufuru, de o haiwani o dududuka itatase, de lo o bi namo dangodu magena hika napalako so ona gena aku isupu de ipuo ifoloi idala.”

¹⁸ So o Nuh una magena wosupuka, una de ma pedeka de lo awi ngopa de manga pedeka.

¹⁹ De lo o bi moi-moi o dududuka iooho, gena o bi haiwani itatagi o dududuka de lo o bi namo dangodu magena moi-moi de manga sabika isupu o deru ilalamo ma rabano.

²⁰ So o Nuh una magena ma ngale awi sukuru o Jou-ka so waaka awi suba ma riho o teto watopuye, de ma dokuka wahado o bi haiwani de o bi namo ngai muruo naga, ena gena o moi-moi o Jou wahihirika dangodu de ma sabika maro awi suba moi Unaka. So watola de watupu la idadi awi suba moi Unaka.

²¹ Watupuka so o Jou wakelelo de wosanangika, so Awi sininga ma rabaka wotemo, “Ngaroko o bi nyawa ka o ngopasi de manga sininga datorouka so o dorou gena yodupa yaaka, duma komagena ma ngale Ngohi o orasi ma simaka upali o tona tosibobeto kali. De lo upa sidago ma moili asa Ngohi tasisa o bi moi-moi iooho o duniaka.

²² Ma deka idodooha o dunia kanagasi, o wange isigeto-geto kanaga lo ma orasi o wange ibao de ma orasi o wange itumu, de kanaga lo ma orasi podato de ma orasi poutu, dabolo kanaga o muura de o ogo yahino, de kanaga lo o sahu de o alo yahino.”