Dodadi 41 - O GIKIMOI AWI JAJI ma BUKU

Ma Firaun awi doguruga

¹ Dabolo so o taungu sinoto ipasaka, o Mesirka manga kolano ma Firaun de o putu ma moiku de wotoguruga. Awi doguruga ma rabaka gena wakelelo kanaga una womaokoye o Nil ma Selera ma dateka.

² De ato womatodoka, o sapi ilalago de dasasaki ngai tumudingi o selera ma rabaye isupu so kagena o dumule yaodo.

³ De womatodokali, o sapi ngai tumudingili o seleraye isupu ituuruye, de o sapi dasasaki ma dateka kagena imaokoye. O sapi magena dapopelela de daceceke.

⁴ Imaokoye, de asa yaodo o sapi dasasaki magena sidago damata so ihiwaka. Bolo, de ma kolano una womamaloka.

⁵ Tekawa, de ma kolano wikiolo kali de wotoguruga wosidadu kali. De una awi doguruga ma sinoto ma rabaka gena wakelelo kanaga o ino hutu moi, maro o goko, de isago ngai tumudingika, de ma sopo gena datihimoka.

⁶ De womatodokali, o ino ma hutu moili de isago ngai tumudingili ioho ituuruye, de kanaga lo o wange ma siwa ma paro so dasasahu gena iwuwu so o goko magena lo damalai so ikoloroka.

⁷ Magena ioho ituuruye, de asa yaodo o goko datotihimo sidago yamata de ihiwaka. Bolo, so ato womamaloye, de wotemo, “Wewe! So magena ka totoguruga bai.”

⁸ So o goginitano, to una awi sininga ma rabaka igamamu poli so wosulo la o Mesirka ma nyawa o doguruga ma ngale yatotagapi de o nyawa icocawaro ona yangodu waaso yahino imatolomu. So awi doguruga onaka wasijarita, duma o nyawa moi lo yaakuwa awi doguruga ma ngale gena isingangasu unaka.

⁹ Yangodu yaakuwa, so awi udo-udo ma leleani wapopareta gena wosibicara ma kolanoka wotemo, “Ai kolano tonihohoromati. Ngohi isala sababu tawosaka, duma o orasi manena asa ngohi tosininga.

¹⁰ Gena idomaka ma Firaun ngomi misinoto nomidodoosaka, de nomisingosa o bui ma tahu ma rabaka, kiaka o bui ma jojaga manga bobareta awi tahuka, ngohi de ani roti ma leleani womipopareta.

¹¹ De o putu ma moiku ngomi misinoto gena mitoguruga, to ngohi ai doguruga de ma ngaleka de una lo awi doguruga de ma ngaleka.

¹² De kanaga o Ibrani ma gohiduuru moi gena ijajaga wapopareta awi tahuka woleleani. So to ngomi mia doguruga unaka miwisijarita de una aku mia doguruga ma ngale gena womisingangasu ngomika, to ngohi ai doguruga kanaga de ma ngale de ani roti waleleleani lo awi doguruga de ma ngaleli.

¹³ Dabolo de ngohi manena itide kali, de ani roti waleleleani magena o gota ma umaka wilikoku, maro mia doguruga ma ngale gena una wosingangasu idomaka.”

¹⁴ So kagena de wosulo kali, la o gohiduuru magena ma kolano awi simaka wahino. So imatai-tai o gohiduuru una magena, awi ronga o Yusuf, o buika wingoso. Tagi wingoso de awi parasi yakuluka, de awi baju yatagali. So wibaju yatagalika, de jai-jai una wahino so ma kolano awi simaka womaokoye.

¹⁵ Kagena de ma kolano o Yusufka wotemo, “Kaputuka asa ngohi ikioloka de totoguruga, duma o nyawa moi lo yaakuwa ai doguruga ma ngale gena isingangasu ngohika. Duma ma ngale ngona manena o nyawa idedemoka, ‘Kanaga o Ibrani ma gohiduuru moi una magena aku o doguruga ma ngale gena wanako de aku lo wosingangasu.’ ”

¹⁶ Duma o Yusuf wotemo, “Hiwa! Ai kolano ma Firaun tonihohoromati, cawali o Gikimoi de asa o doguruga ma ngale gena wanako de Una masirete asa ani doguruga ma ngale gena wonisingangasu ngonaka.”

¹⁷ Komagena so ma kolano wotemo, “Nakoso komagena, de ai doguruga manena tonisijarita kasi. Kanaga ai doguruga ma rabaka takelelo gena ngohi tomaokoye o Nil ma Selera ma dateka.

¹⁸ De ato tomatodoka o sapi ilalago de dasasaki ngai tumudingi o selera ma rabaye isupu so kagena o dumule yaodo.

¹⁹ De tomatodokali o sapi ngai tumudingili o selera ma rabaye isupu ituuruye, de kagena o sapi ma nonoma ma dateka imaokoye. Sapi dapopelela de ma rohe daceceke, maro o Mesir ma tonaka gena, ma moi waasi ngohi takelelo.

²⁰ Imaokoye ma dateka, de o sapi dapopelela magena yaodo o sapi dasasaki sidago lo yamataka so ihiwaka.

²¹ De ngaroko yaodo daboloka, duma ngone panakowa, sababu ma rohe gena ka dapelelasi imatero maro ka iodo waasi. Bolo, de ngohi tomamamaloka.

²² Kagena de ikiolo kali, de o doguruga moi tamakeli. De ngohi ai doguruga ma sinoto ma rabaka gena takelelo kanaga o ino hutu moi maro o goko de isago ngai tumudingika, de kanaga ma sopo lo datihimo dangoduka.

²³ De tomatodokali o goko moili isago ngai tumudingili ioho ituuruye, de o wange ma siwa ma paro dasasahu gena iwuwu so magena damalai so ikoloroka.

²⁴ Magena ioho ituuruye ikokoloro gena asa yaodo o goko datotihimo sidago yamata so ihiwaka. Bolo, de ai doguruga magena o nyawa dangodu o doguruga ma ngale yatotagapi de lo o nyawa icocawaroka tasingangasu, duma o nyawa moi lo yaakuwa ai doguruga ma ngale gena isingangasu ngohika.”

²⁵ Kagena de o Yusuf wotemo unaka, “Ya, Firaun, ani doguruga de ma ngale gena ka imaketero. De magena maro o Gikimoi kanaga wonisingangasu ngonaka, done o kia naga asa waaka.

²⁶ O sapi ngai tumudingi dasasaki gena he imatero de o gegeto o taungu tumudingi. Ma goko ma sago tumudingi datotihimo gena he imateroli de o gegeto o taungu tumudingili. Komagena ma ngale ka imatero.

²⁷ O sapi ngai tumudingi dapopelela gena lo imatero de o gegeto o taungu tumudingi. De lo ma goko tumudingi damalai gena imateroli o taungu tumudingi kali. Gena imatero done o taungu tumudingi ma raba o ino gena damataka, so o bare o Mesir ma tona dangoduka.

²⁸ Komagena so o Gikimoi done asa o kia waaka gena idomaka wonisingangasu ngonaka, maro o demo kia ngohi tonisingangasu ngonaka.

²⁹ So komagena done o taungu tumudingi ma simaka, de o ino asa ioho ifoloi daloha o Mesir ma tona dangoduka.

³⁰ Duma dabolo de o taungu tumudingi ma sima kali, de o ino asa ihiwaka, so o bare ilalamo yamosaka. Sidago o nyawa moi lo akuwa wosininga idodoma gena o ino idala de moi lo waali ikurangi.

³¹ So o ino daloloha gena he aku kawa yososininga, sababu o orasi ma duuruka de o ino damataka gena he ifoloisi datubuso.

³² De o doguruga o Gikimoi wonihikeka ngonaka, gena ngai sinoto sababu o moi-moi dangodu magena Una wositatapuka, igogou asa waaka de wosidadi. De magena lo Una asa jai-jai waaka.

³³ Ya, Firaun, nakoso nomode de aku ngona o nyawa moi ifoloisi wopapade de o moi-moi waaku wosidailako gena nowihiri. La una nowitide de o kuasa nowihike ma ngale o Mesir ma nyawa yangodu wapareta.

³⁴ De lo maro wopopareta moi awi daeraka ma sahe ngona o nyawa yamuruo naga nahiri, la ona o Mesir ma daera moi-moika gena idadi manga bobareta. De to ona manga daera ma saheka o taungu tumudingi ma orasi o gugutu dalohaka, gena manga ino yauutuka o gimina ma motoha gena yasulo yatolomu.

³⁵ Yatolomuno, de o bi pola yoaka kagena o kota moi-moi ma rabaka yadiahi la yojaga daloha.

³⁶ La o gugutu ma orasika la yautu gena, o gimina motohaka asa yadiahi ma ngale o Mesirka ma nyawa manga ino done ma orasi o taungu tumudingili de manga ino asa damataka. Upa sidago manga ino damataka de o Mesirka ma nyawa yangodu yosone so yahiwaka.”

O Yusuf witide wodadi o Mesirka manga bobareta wilalamo moi

³⁷ De o Yusuf wosibicara dabolo de awi dailako gena ma kolano de lo awi bobareta ma bi sahe yangodu kagena yadehe daloha.

³⁸ De ma kolano awi bobareta ma bi sahe yangoduka wotemo, “Ce! Nako o Yusuf una magena awi sininga ma rabaka kanaga de o Gikimoi Awi Gurumi. So nakoso o nyawa moi la awi cawaro maro komagena de kia kasi ngone aku powimake.”

³⁹ So kagena de wobicara kali o Yusufka wotemo, “O doguruga ma ngale gena o Gikimoi wonisingangasu ngonaka. De nakoso o nyawa yangodu o Mesir ma tonaka gena, ngona foloisi nopade lo o moi-moi dangodu ka nanako.

⁴⁰ So ma ngale ngona gena bilasu to ngohi ai nyawa yangodu napareta. La de ani demo dangodu ngona aku o bi Mesir ma nyawa yangodu gena nasiaturu. Ka ka ngohi tomatengo gena ifoloisi tolamo dede ngona.

⁴¹ Mutuwade o orasi manena dabolo ngohi ngona tonitideka, la ngona gena aku o Mesir ma bi doku dangodu napareta.”

⁴² Bolo, de ma kolano awi meterai gena awi ali-ali wohoi de o Yusuf awi raragako wositiba. Wositibaka, de o baju ihahali-hali o Yusuf wihike, de wosulo o Yusuf wisingado, de lo awi toloku o guule guraci isitiba kali.

⁴³ Bolo, de ma kolano awi wakil ma padati gena o Yusufka wihikeka, ma ngale o padati magegenaku o Yusuf asa wopane de awi jojaga ma nyawa yotagi idodoma de isigagaso, “Hika! Nisuba de niwihoromati.” So komagena o Yusuf maro ma kolano awi wakil moi gena witideka.

⁴⁴ So kagena de ma kolano o Yusufka wotemo kali, “Ka ngohi manena tokolano de ka ngona nomatengo to ngohi ai wakil, so ngohi tonisimaha la o Mesir ma nyawa yangodu o bi moi-moi aku yaaka, hitilahi ngona nopareta.”

⁴⁵ Bolo, de ma kolano o Yusuf una magena wisironga o Zafnat-Paaneah, manena o Mesir ma bahasa. Wisirongaka, de o jojaru moi ami ronga ongo Asnat o Yusufka wihike la womasipedeka. Muna gena o On ma kota manga imam, awi ronga o Potifera, to una awi ngopa. So o Yusuf witideka, maro o Mesir ma nyawa manga bobareta wilalamo moi.

⁴⁶ Kagena de o Mesir manga Kolano ma Firaun awi simaka to una awi wakil o Yusuf, de una awi umuru he o taungu moruwangeka, de ma Firaun awi manara magena asa wosolano waaka. So ma kolano awi simano wosupuka, de womajobo de wotagi o Mesir ma bi doku dangodu wakiloli de wageto-geto.

⁴⁷ De o taungu tumudingi ma rabaka gena manga doro ma joro-joro ma goho ka daloha poli sidago ma sopo yautu de yadehe foloisi ilamo.

⁴⁸ Yautu ilamoka, de ma wakil wosulo gena o gugutu ma orasika, ma sopo gena yaregu la o gimina motoha gena yatolomu. De yatolomuno, la o bi kota ma rabaka yadiahi. O kota moika de manga bi doro isigilolika, gena ma gugutu ma sopo yadiahika.

⁴⁹ Manga sopo yadiahi kagena ma wakil watolomu sidago o bi pola dangodu lo iwedo-wedoka, de ma dala yaeto lo yanako kawa, maro o teo ma dowongi ma dala komagena so paeto paakuwa.

⁵⁰ Ma orasi o gugutu ilalamo ma rabaka, so ma orasi ma ino damataka gena yaado waasi, de o Yusuf ma pedeka mopuo so to ona manga ngopa gena yanau yasinoto.

⁵¹ De ma ngopa woriria gena ma wakil wisironga o Manasye (gena ma ngale tosininga kawa), de wotemo, “Magena towisironga sababu ai ngopa magena o Gikimoi woihike la ngohi aku ai sangisara de lo ai baba awi tahu tosininga kawa.”

⁵² De ma ngopa wononongoru gena ma wakil wisirongali o Efraim (gena ma ngale o loha idala tamake), de wotemoli, “Towisironga magena sababu o doku manenaka, ngaroko ngohi idodomaka isangisaraka, duma kanena asa o Gikimoi o bi loha foloi idala woihike ngohika.”

⁵³ Bolo, so o taungu tumudingi de o gugutu ilalamo gena ipasaka.

⁵⁴ De o taungu tumudingili ma orasi o ino damataka gena yaadoka, maro o kia idodoma o Yusuf wosingangasu daboloka. De o bi doku dangodu o Mesir ma tona ma sigilolika kagena lo o ino ihiwa so manga oho isangisara. Duma o Mesir ma bi doku ma rabaka gena kanaga o gugutu ma orasi de imadiahika.

⁵⁵ De ma orasi ma Mesir ma nyawa manga ino damataka, de ona asa itagi ma kolanoka, o ino imagolo. Igolo de ma kolano wotemo onaka, “Hika ngini bilasu nitagi, ai wakilka nigolo kasi. La nakoso una o kia bato wotemo nginika, awi beseso magena bilasu niamote.”

⁵⁶ O Mesir ma bi nyawa yangodu ona manga ino damataka. Damataka, so kanaga o ino o polaka yadodiahika, gena ma wakil wosulo kagena yahoi. Manga ino magena wosulo yosiija o Mesir ma nyawaka, sababu manga ino damataka.

⁵⁷ De o bi doku ma somoano yangodu lo o Mesir ma tonaka yahino la o ino ma wakil o Yusuf wadodiahika gena kagena yoija, sababu ona yangodu lo manga ino damataka.