Dodadi 38 - O GIKIMOI AWI JAJI ma BUKU

O Yehuda de awi modoka moi ami ronga ongo Tamar

¹ O Yusuf iwingaho dabolo o Mesirka, de asa o Yehuda womatinga to una awi ria de awi gianongoru manga sidongirabano, so wotagi o doku Adulamka, de kagena wogoge o nyawa moi awi ronga o Hira.

² Wahika kagena so o Yehuda imarinako de o Kanaan ma jojaru moi, muna magena o Syua ma ngopa. Ona imabobai sidago lo ona yasinoto ikawika,

³ dabolo de yamake o ngopa yanau yaruwange. Manga ngopa ma domo gena ma baba wisironga o Er.

⁴ Manga ngopa ma sinotoka gena ma awa mowisironga o Onan.

⁵ Manga ngopa ma saangeka mowisironga o Syela. Ma orasi una wisibuo gena, ona kagena o Kezib ma dokuka.

⁶ Ipasaka, de manga baba o Yehuda gena awi ngopa woriria o Er gena wisikawi o jojaru moi ami ronga ongo Tamar.

⁷ Duma woriria gena awi gogoho de awi sininga datorou, sidago o Jou lo witoosa so una witoomaka.

⁸ Imaaka komagena, so o Yehuda wotemo wononongoru o Onanka, “Notagi kagena ani ria ma baloka, ma ngale nanga biasa gena ngini nisinoto bilasu nimasikiidu sababu ngona gena ani ria awi nongoruku. Hika la o manara magena naaka munaka, ma ngale ani ria gena kanaga de awi ngopaka.”

⁹ Duma ma nongoru gena womanako done ma duuruka de o ngopa magena maro to una awi ngopa dasowo. Awi sininga komagena, so nakoso ona imasikiidu de ma ria ma balo magena, so una woholu o ngopa moi wosidadi, ma ngale ma ria ma balo gena upa lo o ngopa mamake.

¹⁰ So de awi manara komagena waaka foloi datorou, sidago lo o Jou witoosa so ma nongoru lo witotooma kali.

¹¹ Mutuwade o Yehuda wotemo awi modoka ongo Tamarka, “Notagi de noliho kadoka ani baba de ani awa manga tahuka, la kagena onaka nogogesi maro o babalo moi de upa nokawi kali, sidago lo ai ngopa o Syela wononongoruku gena wilamo kasi.” Una wotemo komagena ma sababu iwimodoka, done o Jou gena o Syela witooma kali, imatero de awi ria yasinoto. So kagena de ongo Tamar gena moliho kadoka ma baba de ma awaka.

¹² O orasi muruo naga ipasaka, de o Yehuda ma pedeka lo mosoneka. So kanaga o gari ma biau yaaka daboloka, de una ma dodiao o Hira, o Adulam ma nyawa gena, wisigaro la itagi kadoka o Timna ma dokuka, ma ngale kagena o bi duba ma gogo yagugutika.

¹³ Kagena de ongo Tamar mogiise gena igogou done ma tunu o Yehuda asa wotagi wokahika o Timna ma dokuka, ma ngale to una awi duba ma gogo gena yaguti.

¹⁴ Mutuwade muna ami babalo ma baju gena mahoi de ami baju ma somoa moili momasipakeka, de ami bio lo mositalakeka de o baro maro o hutu ma jala, so kagena o doku Enaim ma ngora ma dateka momatamiye, kiaka o ngeko magena ikahika o Timnaka. Sababu ongo Tamar gena manako itiaika, kanaga o Yehuda awi ngopa ma susu ma goliku o Syela gena igogou wilamoka, duma o gohiduuru una magena wisikawi waasi dede munaka.

¹⁵ Ma orasi o Yehuda nogena wakahino, de ongo Tamar womikelelo de kanaga awi sininga yadahe so womidupa, gena wadakolo muna magena o ngopedeka moi ami rohe momasiiija, sababu ami bio gena matalakeka de o baro maro o hutu ma jala.

¹⁶ Una gena igogou wominakowa, ena momongo o ngopedeka muna magena ka to una masirete awi modoka. So kagena o ngekoka de o Yehuda wahika so ami dateka womaokoye, de wotemo, “O pipi kiamoi nogolo.” De muna mosango motemo, “Maha dede ngona, ilamo eko ma cunu.”

¹⁷ So una wotemo kali, “Nakoso ngohi gena asa o kabi ma goho moi tonihike ngonaka.” De muna mowisango motemo, “Ka idadi, hitilahi ani jaji gena de ma bobiliku ma ngale nanga nonako moi ngohi tacohoka, sidago o kabi ma goho gena nosidingo ngohino.”

¹⁸ De una wosano, “So ma bobiliku gena o kia.” De muna motemo, “Ani cap, de ma gumika, de lo tuangi ani didiki ani giaka, magena ngohika nahike la tacohosi.” Gila-gila una wahike munaka, maro kia muna motetemo, dabolo de ona yasinoto imasikiidu sidago lo muna modami de done asa mitilibu.

¹⁹ Imasikiiduka, de muna moliho ami tahuka, de ami baju de lo ami bio ma dodalake mahoika, dabolo asa ami babalo ma baju gena momasitiba kali.

²⁰ O Yehuda una magena asa wisulo ma dodiao o Hira ma ngale o kabi ma goho magena watota la awi cap de awi didiki gena wagolo bilasu waaho wosigiliho, kia idomaka wahikeka, duma o ngopedeka muna magena o Hira womimakewa.

²¹ So o Hira gena o Enaim ma nyawaka wasano, wahika de wahino wotemo onaka, “Ngopedeka moi ami rohe momasiiija kanena o ngeko ma dateka gena, kiaka mahika so mihiwaka.” De ona wisango unaka itemo, “Kanena ngomika gena o ngopedeka manga rohe imasiiija moi lo yahiwa.”

²² So o Hira asa ka woliho de o Yehudaka wotemo, “Ngohi tomisarika o ngopedeka muna magena duma tomimakewa. Nakoso tamote to ona manga singangasu ngohika gena, kadoka ona ma dokuka gena, o ngopedeka manga rohe imasiiija moi lo yahiwa.”

²³ Komagena so o Yehuda wotemo, “Dohaka, o bi moi-moi magena muna mapakeka, hitilahi ngone upa inasimade. Ngohi gena o ngeko tosisarika ma ngale bilasu tofangu, duma muna magena ngona lo nomimakewa.”

²⁴ So nagala he o ngoosa saange ipasaka, de o Yehuda o habari wogiise gena, ma modoka ongo Tamar momaaka maro o ngopedeka manga rohe imasiiija so mitilibuka. So una o nyawa wasulo de wotemo, “Nitagi o ngopedeka muna magena nimingoso la nimitupu la miukuka bai!”

²⁵ Ma orasi ongo Tamar imingaho misisupu o doku ma duduka, de ami beseso mosidingo ma tunuka motemo, “Ngohi ai dilibu manena o tuangi naguuna to una awi moi-moi gena kanaga ai gia ma sohaka. So hika niatailako to naguuna awi cap, de ma gumika, de lo o didiki manena.”

²⁶ O Yehuda wanako o moi-moi magena ka to una so wotemo, “We! Muna magena ami sala ihiwa. Ka cawali ngohi de ai sala gena, ai jaji munaka magena taaka waasi, ena gena bilasu muna de ai ngopa o Syela gena tasikawi kasi.” So muna mitupu kawa, de kagena de isikahika muna magena de o Yehuda he imasikiidu kawa.

²⁷ So ongo Tamar ami orasi gena yaadoka, de kanaga o ngopa yanau yasinoto sababu ami ngopa isago.

²⁸ Duma mopuo waasi so ami siri ma rabaka, de ma sago moi ma gia isupu idomano, so ma bidan gena o lawe dasosawala madehe de mosipiliku o ngopa magena ma giaka, la idadi o nonako moi munaka, de motemo, “O ngopa manena gena itura idoma.”

²⁹ Kagena de o ngopa magena ma gia yalia so iwosa kali, so o ngopa ma somoa moili isupu de itura idomaku, so ma bidan motemo, “Komagena ngona naaka so nomasisihito la ngona masirete nosupu bai!” Mutuwade o ngopa mowisibuo ma nonomaka gena wisironga o Peres. (Nako o bahasa Ibrani ma demo “Peres” gena ma ngale sihito.)

³⁰ Dabolo de asa mowisibuo kiaka o ngopa una magena awi giaka de ma lawe dasosawala. So una wisironga lo o Zerah. (Nako o bahasa Ibrani ma demo “Zerah” gena ma ngale sora, nagala isidumu o lawe dasosawala magena.)