Dodadi 36 - O GIKIMOI AWI JAJI ma BUKU

O Esau de awi ngopa-ngopa manga sihino

¹ O Esau awi goge gena o Edom ma tonaka, so o Esau ma ngale lo o Edom.

² O Esau womodoka o Kanaan ma jojaru yaruwange so kanaga ma pedeka ma nonoma ami ronga ongo Ada. Ongo Ada ma awa gena ongo Elon muna o Het ma nyawa moi. Womodoka ma sinoto ma pedeka ami ronga ongo Oholibama. Ongo Oholibama ma baba gena o Ana de ma ete o Zibeon gena o Hewi ma nyawa moi.

³ Awi pedeka ma saangeka ami ronga ongo Basmat. Muna o Ismael ma ngopa de ma hira awi ronga o Nebayot.

⁴ O Esau de ongo Ada manga ngopa gena o Elifas. De una de ongo Basmat manga ngopa gena o Rehuel.

⁵ De lo una de ongo Oholibama manga ngopa gena o Yeush, o Yaelam de o Korah. Ona magena o Esau awi ngopa-ngopa yanau o Kanaan ma tonaka yasibuo.

⁶ So kagena de o Esau awi pedeka de awi ngopa, bai yanau de o ngopedeka, wangaho de lo awi arata so itagi imatuluru o doku ma somoaka, komagena lo awi biara o haiwani dangodu ka una wamamake o Kanaan ma tonaka dede to una awi nyawa o tahu ma rabaka yangodu. Wangaho de ma nongoru o Yakub widongosaku.

⁷ Ma sababu to ona manga arata gena idala poli so yadogoge idadiwa. Sababu ma tona ipenetoka de lo manga haiwani yapopiara ka idala poli.

⁸ Mutuwade woriria o Esau, eko o Edom, una gena wositatapu una o Seir ma bi talaka kagena asa wogoge.

⁹ Ona manena o Esau awi ngopa-ngopa de awi dano gena o Edomka ma nyawa yasibou o Seir ma bi talaka.

¹⁰ Manena o Esau awi ngopa-ngopa yanau manga bi ronga gena, o Elifas, ma awa ongo Ada o Esau ma pedeka, de o Rehuel, ma awa ongo Basmat o Esau ma pedekali.

^11-12 O Elifas awi ngopa-ngopa de lo ongo Ada ami dano, o Esau ma pedeka gena, o Teman, o Omar, o Zefo, o Gaetam de lo o Kenas. O Esau ma ngopa o Elifas lo kanaga ma pedeka ami biara moi mironga ongo Timna. So ongo Timna ami ngopa, o Amalek, ma baba o Elifas.

¹³ O Rehuel awi ngopa-ngopa de lo ongo Basmat ami dano, o Esau ma pedeka gena, o Nahat, o Zerah, o Syama de lo o Miza.

¹⁴ Ongo Oholibama o Esau ma pedeka ami ngopa gena, o Yeush, o Yaelam de lo o Korah.

¹⁵ Ona manena o kawasa o bolumoi-bolumoi manga kapita gena, kiaka o Esau awi ngopa woriria o Elifas awi ngopaku gena, ma kapita o Teman, ma kapita o Omar, ma kapita o Zefo, ma kapita o Kenas,

¹⁶ ma kapita o Korah, ma kapita o Gaetam de lo ma kapita o Amalek. Ona magena o Elifas awi kawasa ma bolu de manga kapita o Edom ma tonaka, de lo ongo Ada ami dano.

¹⁷ O Esau ma ngopa o Rehuel awi ngopa-ngopaku gena, ma kapita o Nahat, ma kapita o Zerah, ma kapita o Syama de lo ma kapita o Miza. Ona magena o Rehuel awi kawasa ma bolu de manga kapita o Edom ma tonaka, de lo ongo Basmat ami dano.

¹⁸ Ongo Oholibama ma roka o Esau ami ngopaku gena, ma kapita o Yeush, ma kapita o Yaelam, de lo ma kapita o Korah. Ona manena ongo Oholibama ami ngopa ma bolu ma kapita o Esau ma pedeka gena, ongo Ana ami ngopa.

¹⁹ Ona magena o Esau awi ngopa de awi dano gena, o bangsa Edom de to ona manga kapita-kapita.

²⁰ O Seir awi ngopa-ngopa o Hori ma nyawa, o Esau wogoge waasi, de o daera magena yogogeka, ena gena o Lotan, o Syobal, o Zibeon, o Ana,

²¹ o Disyon, o Ezer de lo o Disyan. Ona manena o kapita-kapita o bi Hori ma nyawa o Edom ma tonaka gena, o Seir awi ngopa-ngopa.

²² O Lotan awi ngopa-ngopa gena, o Hori de o Heman. Ongo Timna magena muna o Lotan awi bira.

²³ O Syobal awi ngopa-ngopa gena, o Alwan, o Manahat, o Ebal, o Syefo de lo o Onam.

²⁴ O Zibeon awi ngopa-ngopa gena, o Aya de o Ana. O Ana una magena o ake sahu ma bi jobubu wamake ma orasi ma baba Zibeon awi keledai wosiodo o tona ibobeleuka.

²⁵ O Ana awi ngopa-ngopa gena, o Disyon de o ngopedeka ongo Oholibama.

²⁶ O Disyon awi ngopa-ngopa gena, o Hemdan, o Esyban, o Yitran de lo o Keran.

²⁷ O Ezer awi ngopa-ngopa gena, o Bilhan, o Zaawan, de lo o Akan.

²⁸ O Disyan awi ngopa-ngopa gena, o Us de o Aran.

²⁹ O Hori ma nyawa manga kapita-kapita gena, ma kapita o Lotan, ma kapita o Syobal, ma kapita o Zibeon, ma kapita o Ana,

³⁰ ma kapita o Disyon, ma kapita o Ezer de lo ma kapita o Disyan. Ona magena o Horika ma kawasa o bolumoi-bolumoi kanaga de manga kapita o Seir ma tonaka.

O Edomka manga bi kolano

³¹ O orasi magena o Israel ma tona moi waasi idadi kolano so ka o Edom ma tonaka gena de manga kolano.

³² O Edom ma tonaka o kolano ipopareta gena, ma kolano o Bela, wisiaso lo o Beor, de awi kota ma ronga o Dinhaba.

³³ So de o Bela wosoneka, de kanaga o Bozra ma nyawa moi witagali awi ronga o Yobab gena, o Zerah ma ngopa wokolano.

³⁴ So de o Yobab wosoneka, de kanaga o Teman ma nyawa moi awi ronga o Husyam witagali wodadi kolano.

³⁵ So de o Husyam wosoneka, de kanaga o Hadad gena o Bedad ma ngopa wotagali wodadi kolano. O Hadad una magena o Midian ma nyawa wakudoti sidago o Moab ma daeraka yasitura de awi kota ma ronga o Awit.

³⁶ So de o Hadad wosoneka, de kanaga o Masreka ma nyawa moi awi ronga o Samla wotagali wodadi kolano.

³⁷ So de o Samla wosoneka, de o Rehobot ma doku moi o selera ma dateka kanaga o nyawa moi awi ronga o Saul wotagali wodadi kolano.

³⁸ So de o Saul wosoneka, de kanaga moi awi ronga o Baal-Hanan gena o Akhbor ma ngopa wotagali wodadi kolano.

³⁹ So de o Baal-Hanan wosoneka, de kanaga moi awi ronga o Hadar wotagali wodadi kolano. De awi kota gena ma ronga o Pahu de ma pedeka ami ronga ongo Mehetabeel ongo Matred ami ngopa de ongo Mezahab ami dano.

⁴⁰ Manena o Esau awi kapita-kapita manga ronga, mote kawasa o bolumoi-bolumoi de manga kapita de lo to ona manga riho eko manga goge. So manga ronga moi-moi gena, ma kapita o Timna, ma kapita o Alwa, ma kapita o Yetet,

⁴¹ ma kapita o Oholibama, ma kapita o Ela, ma kapita o Pinon,

⁴² ma kapita o Kenas, ma kapita o Teman, ma kapita o Mibzar,

⁴³ ma kapita o Magdiel de lo ma kapita o Iram. Ona magena o Edomka ikapita, mote to ona manga goge de to ona masirete manga tonaka. So komagena una o Esau gena o Edom ma nyawa manga baba.