Dodadi 34 - O GIKIMOI AWI JAJI ma BUKU

Ongo Dina de o Sikhem manga jarita

¹ O orasi ma moiku o Yakub ma pedeka ongo Lea manga ngopa o jojaru moi, ami ronga ongo Dina, muna motagi o doku magena ma jojaru gena makurumi.

² Wange magena o Hemor, o Hewi ma nyawa moi de una wokolano o tona eko o doku magenaka, kanaga awi ngopa yanau moi awi ronga o Sikhem womikelelo so womingaho de womiropuka.

³ Duma una lo awi sininga yadahe de womidupa sababu ongo Dina o Yakub ma ngopa gena ka miloha poli. So una lo womibaja de ami sininga wosisanangika.

⁴ Ma ngale magegena so o Sikhem wotemo ma baba o Hemorka, “O jojaru magena nomigolo ma babaka, la idadi ngohi ai pedeka.”

⁵ Hali idadadi ongo Dinaka, magena ma baba o Yakub woise de wanako, igogou yanau moi awi ronga o Sikhem gena ongo Dina womiropu de ami ronga ma dorou wogaka. Duma awi ngopa-ngopa gena ona kadoka o pidoka awi haiwani eko awi biara yojaga. So manga baba wadamahaka, sidago ona iliho awi tahuno.

⁶ Kagena de ona iliho waasi de o Hemor o Sikhem ma baba wotagi o Yakubka, ma ngale manga dupa magena aku wosibicara unaka.

⁷ Ato o Yakub awi ngopa-ngopa iliho o pidono. So o hali magena yogiiseka, de o nyawa ona magena manga sininga dasiri de yatoosa. Sababu o Israelka o hali ropu o dorou moi foloisi ilamo so manga bira ongo Dina o Sikhem ami ronga watorouka, de foloisi womisimade.

⁸ Gila-gila o Hemor wobicara wotemo, “Ai ngopa o Sikhem awi sininga ma dupa gena ani ngopa ongo Dinaka. So nakoso ani sininga ma gogoru la nomode de tanu nowihike ani ngopa muna magena unaka, la idadi awi pedeka,

⁹ de tanu nia jojaru aku ngomi nimihike de to ngomi mia jojaru lo aku ngini niadehe.

¹⁰ De to ngomi mia tona manena ilamo de ingoha, so ngini aku kanena nigoge. De lo aku minisimahaka, mia doku niatagi eko nisupu de niwosa, de o nyawa moi lo nifatiwa, la o tona aku niija de nia doro ma hasil lo aku nisiija.”

¹¹ De o Sikhem lo wobicara o Yakubka de ma ngopa ongo Dina ami hira-hira iririaka wotemo, “Tanu ngini nidupa ngohi nidehe daloha-loha. De done asa kia ngini nigolo ngohika,

¹² eko kia bato nisimoku ngohiku o pipi guraci eko lo o pipi ma lake ma lamo de ma dala, maro o kiasi ngohi aku tinihike maro o kia ngini niapepeto de nigolo ngohika, hitilahi nia jojaru magena nihike la tomasipedeka.”

¹³ O Sikhem ongo Dina womiropuka, so o Yakub awi ngopa-ngopa asa una de ma baba Hemorka yasango itemo,

¹⁴ “Ngomi gena mia manara komagenawa, maro mia bira moi ka momasigohosi de miwihike yanau moi ka womasuna lo waasi. Sababu hali komagena datorou poli ngomika so idadiwa.

¹⁵ Ka cawali kanaga to ngomi mia galepu la migogolo aku niamote de niaaka, la ngini de ngomi gena ka pomatero. Ena gena, yanau yangodu nia sidongirabaka bilasu imasuna kasi.

¹⁶ De asa aku mia jojaru minihike nginika, de to ngini nia jojaru lo aku ngomi miadehe de lo mimasipedeka. De ngomi lo done asa migoge to ngini nia dokuka la ngone pomadadi o bangsa moi.

¹⁷ Duma nakoso ngini niamotewa de niaakawa, so nimasuna lo niholu, de mia ngopa muna magena ngomi mimingoso de mimisigiliho, de mimajobo kali.”

¹⁸ Mutuwade o Sikhem de ma baba Hemor isimote daloha to ona manga gogolo magena.

¹⁹ So o gohiduuru una magena he wotamaha kawa so gila-gila womasuna, sababu womidupa poli o Yakub awi jojaru magena. Ma boboloi una magena foloisi iwihoromati awi ria de awi gianongoru eko o bolu moi ma rabaka,

²⁰ so o Hemor de ma ngopa o Sikhem itagi o kota ma bi kawasa yangodu manga simaka, de isibicara ona magenaka.

²¹ Itemo, “O bi nyawa ona magena yodupa imatekerimoi dede ngone so pasimahaka, sababu nanga tona lo ka ilamosi de nanga daera manena ingohasi, la ma ngale to ona manga jojaru aku nanga ngopa gohiduuru yakawi, de komagena lo to ngone nanga jojaru aku manga gohiduuru yakawi. De nanga doku ma rabaka isupu de iwosa gena, upa lo pafati la o tona yaija de manga hasil isiija.

²² De manga gogolo cawali kanaga manga galepu moi gena ngone bilasu pamote de paaka, de asa ona magena imode igoge to ngone nanga dokuka, la ngone podadi o bangsa moi. Ena gena, ma ronga so yanau nanga doku ma rabaka bilasu imasuna imatero maro ona gena imasunaka.

²³ La manga biara de manga arata, eko manga kaya de lo manga haiwani, dangodu magena idadi ka to ngone nanga arata de nanga kaya. So hika ngone posimote daloha la aku ona igoge dede ngone nanga dokuka.”

²⁴ Mutuwade o Hemor de ma ngopa o Sikhem manga gogolo de manga bicara o kawasa o kota ma rabaka yangodu yoise de isimote daloha. So gila-gila yanau yangodu isigogohoka, o kota ma rabaka o orasi magena dabolo de imasunaka.

²⁵ Ma deka o wange saangeka, de ona manga nabo dasiri so o siri ma rabaka, de o Yakub awi ngopa-ngopa manga edekati ma dorou yaaka so o Simeon de o Lewi manga sumarangi yadehe de o kota magena yangosa de yakudoti de manga modo lo ihiwa. So yanau yangodu asa yatoomaka.

²⁶ Komagena lo o Hemor de ma ngopa o Sikhem lo yatoomaka de to ona manga sumarangi. De gila-gila manga bira ongo Dina gena midehe o Sikhem awi tahuka so misigiliho kali manga tahuno.

²⁷ Dabolo de o Yakub awi ngopa-ngopa o kota magena yongosa de yakiloli, de manga moi-moi yakoora de ma nyawa yatotoomaka magena manga arata yabulari. Sababu manga bira gena misimadeka.

²⁸ Kanaga manga kabi de manga duba, o sapi de o keledai, bai o kota ma rabaka eko o kota ma duduka dangodu magena ona yapolu de yaaho.

²⁹ Komagena lo manga arata, de lo manga ngopa-ngopa de o bi ngopedeka yangodu yapiliku so yangahoka. De lo o moi-moi manga tahu ma rabaka gena lo yabularika.

³⁰ Kagena de o Yakub awi ngopa-ngopaka watemo, “Ngini manena o bodito nihikeka, de ai ronga ma mela niogaka o kota manena ma nyawa de ma kawasaka. Nimanakowa ngone manena inadalawa, so nako o Kanaan ma nyawa de o Feris ma nyawa la imakodogo de ngone inakudoti gena, done ngone inasitura de lo inatooma inamata-mataka, bai ngohi de ai ngopa de ai dano.”

³¹ Duma ona asa ma babaka itemo, “Ce! Dadoohaso eko kiaso to ngomi mia bira de miaka koloko o ngopedeka yamomosola.”