Dodadi 33 - O GIKIMOI AWI JAJI ma BUKU

Yakub de ma ria imakadame

¹ So kagena de o Yakub womaginano awi simaka, de wikelelo ma ria o Esau de to una awi nyawa yaratu iha gena he yadumuka. Mutuwade awi ngopa-ngopa ma binuka ongo Leaka, de ma binuka lo ongo Rahelka, de lo ma binukali manga nyawa ngopedeka yasinoto ileleanika wasijaga.

² So una asa wahado o ngopedeka ileleani magena de manga ngopa-ngopa ma simaka, asa ongo Lea de to muna ami ngopa-ngopa, de ongo Rahel de o Yusuf gena itotuuru.

³ De o Yakub una wotagi wododoma manga simaka, so wosuba o tonaku wobukuku wosipara ma tumudingika de asa womasidiado ma ria awi dateka.

⁴ Duma ma ria gena womagogora wahika ma nongoru awi tolono wakololo de wihame wiuku-uku, de ona yasinoto imarorigari moi de moika.

⁵ Dabolo de ma ria womaginano de wakelelo o bi ngopedeka de manga ngopa-ngopa magena de wosano, “Ona manena nagoona so ngona nimote-mote.” De o Yakub wosango wotemo, “To ngohi ai ngopa-ngopa kiaka o Gikimoi Awi laha so woihike ani nongoru ngohi manenaka.”

⁶ Dabolo de o ngopedeka ileleani de lo manga ngopa-ngopa yahika ma ria awi dateka, de ona isuba unaka.

⁷ Ongo Lea de ami ngopa-ngopa lo yahika awi dateka, so ona lo isuba ma riaka. Komagena lo ongo Rahel de o Yusuf lo isuba unaka.

⁸ De ma ria asa wotemo, “Ani edekati o kia ngohika, so kangano ngomi mimakamake de to ngona ani nyawa de ani biara sidago o bolu muruo naga.” De ma nongoru wosango wotemo, “Magena ngohi tonihike ngonaka ma ngale tanu ngona nodupa ngohi noidehe daloha-loha de ai sala lo he nosininga kawa.”

⁹ Duma ma ria wotemo, “Ai nongoru, to ngohi lo kanaga gena ka idala. So upa komagena duma o kia to ngona magena ka to ngona bai.”

^10-11 Duma wononongoru ma ria iwigegego de iwibaja, wagogou wotemoli, “Ai ria, upa komagena nakoso ngohi tamake dabolo to ngona ani dodara de ani siboso, tanu ai suba ai gia ma rabano manena lo nadehe de ani sininga isosanangi. Sababu de ani bio takelelo o orasi manena imatero de ka o Gikimoi towikelelo, sababu ngona lo aku nodupa noidehe daloha-loha. Kodo! Tanu nadehe o ngongike manena maro ka ai salamati pomakamake so tonigaho ngonaka. Sababu o Gikimoi Awi dodara ngohika, so wohike o arata so o bi moi-moi gena dangodu de maena ngohika.” Kagena de ma ria awi sininga itura so wosimote de wadeheka.

¹² Dabolo de woriria wotemo ma nongoruka, “Nakoso komagena, hino la ngone pomajobo de potagi pogila-gila. La ngohi asa tonidodiao ngona o dodagi ma rabaka.”

¹³ Duma wononongoru o Yakub ma riaka wotemo, “Ai ria, ngona nanako masirete igogou ai ngopa-ngopa ma binuka manena ka yacekesi so itagi lo yaputuru waasi, de kanaga lo ai haiwani o kabi, de o duba, de lo ai sapi ma ngopa ka isususi ma awaka. So nakoso o wange moi de ngone pogoginihi de o haiwani dangodu magena done asa isone.

¹⁴ So dohaka bato la ngona notagi nodomaka de ngomi asa mituuru, ma ngale ngohi asa totagi tomamehe-mehe mote ai haiwani ma ngopa ma lagu de ai ngopa-ngopa tadiko de mimasiwowoma, sidago lo o Seir ma tonaka mimasidiado.”

¹⁵ De ma ria wotemo, “Nakoso komagena, de ai nyawa imomote hitilahi yamuruo naga tadongosa la ngona nimote-mote.” Duma wononongoru wotemo, “Ngaroko ani nyawa upa he mimote. Hitilahi, ai ria, ani siboso de ani galusiri tamakeka gena yaado dabolo.”

¹⁶ So o wange magena dabolo woriria o Esau wotagi woliho wokahika o Seir ma tonaka.

¹⁷ Duma wononongoru gena womajobo de wotagi wokahika o Sukot ma rihoka, la kagena o tahu womagaka wosigoko de lo o dadaru woaka ma ngale to una awi haiwani. Komagena imaaka so o riho magena wosironga o Sukot ma doku (gena ma ngale o bi dadaru).

¹⁸ Kagena o Sukot ma doku o Padan-Aram ma daeraka de kanaga wononongoru awi ronga o Yakub gena wotagi sidago womasidiado o Sikhem o Kanaan ma tonaka gena wososanangi. De o kota magena ma dateka una kagena o dadaru womagaka.

¹⁹ So kagena de o Hemor awi ngopa de awi danoku manga tona moi waija. O Hemor awi ngopa de awi dano moi gena o Sikhem ma baba. O tona magena ma ija gena o pipi salaka ratu moi ma ngale awi dadaru kagena womagaka.

²⁰ O riho magenaka una o teto watupuye maro o nonako moi de wosironga gena “El Elohe Israel”, ma ngale o Israel de awi nyawa manga Gikimoi.