Dodadi 30 - O GIKIMOI AWI JAJI ma BUKU

¹ Ma orasi ongo Rahel momanako igogou muna modamiwa de mitilibuwa, so mowisibuowa o ngopa moi lo ihiwa, de muna momisihomu ma ria ongo Lea. So motemo o Yakubka, “Kodo! O ngopa noihike ngohika. Nakoso hiwa, done asa ngohi tosone.”

² Mutuwade o Yakub witoosa so wongamo wotemo, “Ce! Ngohi gena upa nositero maro o Gikimoi, so taakuwa ani ngopa ma ngihi taperesu ma ngale nitilibu.”

³ De ongo Rahel motemo, “Ai gilalo moleleleani moi ongo Bilha muna magena tonihike la nimasikiidu, la aku muna mosibuo o ngopa moi. La ma ngale muna ngohi lo aku o ngopa tamake.”

⁴ Mutuwade ongo Rahel ami gilalo moleleleani magena mowihike o Yakubka idadi ma pedeka de o Yakub lo wotagi imasikiidu de muna.

⁵ Kagena de muna modami so mitilibu, de mowisibuo o ngopa yanau moi ma ngale o Yakub wingopa.

⁶ De muna ongo Rahel motemo, “O Gikimoi gena igogou woigaka itiai de ai gogolo wosigise daloha so woihikeka o ngopa yanau moi.” Ma sababu komagena o ngopa una magena iwisironga o Dan. (Nako o bahasa Ibrani ma demo “Dan” gena ma ngale wositatapu itiai.)

⁷ Kagena de ongo Bilha modami kali, so mitilibuli so mopuo ma sinotoka o ngopa yanau moili ma ngale o Yakub wingopa.

⁸ De ongo Rahel motemo, “Ngohi asa toutunguka de ai ria mia doosa dasosihilo ma rabaka.” Ma ngale komagena o ngopa una magena mowisironga lo ka o Naftali (gena ma ngale tekedoosa).

⁹ Ma orasi ongo Lea momanako igogou muna gena ami ngopa he ihiwaka, de ongo Zilpa ami gilalo moleleleani ami tahuka momiaso de o Yakub mowihike la womasipedeka kali.

¹⁰ Kagena de ami gilalo moleleleani magena o ngopa ma nonomaka mosibuo o ngopa yanau moili ma ngale o Yakub awi ngopa.

¹¹ De ongo Lea asa motemo, “O pahala asa tamakeka.” Ma sababu komagena so o ngopa una magena mowisironga lo o Gad (gena ma ngale o pahala).

¹² Ma duuruka de ami gilalo moleleleani magena ami ngopa ma sinotoka mosibuo yanau moili ma ngale o Yakub wingopa.

¹³ De muna motemo, “Ngohi inali. Komagena so o bi ngopedeka yangodu done asa itemo, igogou ngohi inali.” Ma ngale magegena so o ngopa una magena mowisironga lo o Asyer (gena ma ngale o nali).

¹⁴ Ma dongoho o gugutu ma orasika, de o Ruben wotagi-tagi o pidoka, de kagena o dudaim ma sopo wamake so womigaho ma awa ongo Leaka. De ongo Rahel motemo moririaka, “Nako daloha de o dudaim ma sopo ani ngopa wamamake gena, hitilahi ngai muruo naga noihike ngohika.”

¹⁵ De ongo Lea momisango motemo, “Wewe! So ai roka lo nomageseka gena niado waasi? So orasi manena de ai ngopa awi dudaim ma sopo de nonyafusu so mau nadehe kali?” De mononongoru ongo Rahel motemo, “Nakoso komagena, de upa nongamo la o putu manena de o Yakub asa womaidu ngonaka, la de magena maro ani ngopa awi dudaim ma sopo ma ija eko ma fangu moi.”

¹⁶ So de damada-mada o Yakub asa woliho o pidono, de ka o ngeko ma soaka de ongo Lea mowidamahaka, so motemo unaka, “He! Ngona o putu manena bilasu nahino la kanena ai tahuka nomaidu, sababu nisewa lo dabolo de to ngohi ai ngopa awi dudaim ma sopo.” Ma sababu komagena so o putu magena o Yakub de muna imaidu to muna ami tahuka.

¹⁷ La komagena o Gikimoi asa wosimote muna ami gogolo so modami de mosibuo kali o ngopa yanau moili, so de una magena o Yakub de ongo Lea gena manga ngopa yanau he yamotoha dabolo.

¹⁸ So muna motemo, “O Gikimoino gena ai fanggali tamakeka, sababu ai gilalo ileleleani lo ai roka towihikeka.” Ma ngale magegena o ngopa una magena mowisironga o Isakhar. (Nako o bahasa Ibrani ma demo “Isakhar” gena ma beto he imatero de o demo moi de ma ngale gena o fanggali.)

¹⁹ Ma duuruka de muna modami de mowisibuo kali o ngopa yanau moili,

²⁰ de motemo, “O Gikimoi woihike o hadiah daloloha-loha moi ngohika. So orasi manena de ai roka asa aku wogoge dede ngohi, sababu awi ngopa yanau he yabutanga dabolo ngohi tosibuoka.” De o ngopa magena mowisironga o Zebulon (gena ma beto he imatero de o demo moi de ma ngale gena o cocatu de o giliri).

²¹ Ma dodoguka, de muna modami de momisibuo kali o ngopa ngopedeka moi, de muna magena momisironga ongo Dina.

²² Kagena de o Gikimoi womigalusiri ongo Rahel so ami gogolo asa wosimote de waaka, sidago ami ngopa ma ngihi wapelenga la aku o ngopa mamake.

²³ Dabolo de muna modami de mowisibuo o ngopa yanau moi. So motemo, “Ai made de ai ronga ma dorou o Gikimoi wasisaka.”

²⁴ De o ngopa una magena mowisironga o Yusuf (gena ma beto he imatero de o demo moi de ma ngale gena wasisa de lo wodogo), sababu motemo, “Tanu o Jou ai gogolo Unaka wosigise sidago o ngopa yanau moili woihike ngohika.”

O Laban de o Yakub imakeregu manga kabi de manga duba

²⁵ Ma orasi ongo Rahel o Yusuf mowisibuo daboloka, de o Yakub wotemo o Labanka, “Ai epe, tanu ani ngopa, ngohi gena, noisimaha tosupu ani tahuno, ma ngale toliho tokahika ai doku de ai soaka.

²⁶ Komagena lo ai pedeka de ai ngopa-ngopa yangodu tanu nasimaha isupu la magena ani ngongike ngohika, maro ai manara ma fangu moi ma orasi ngohi togoge de tomanara to ngona ani tahu ma rabaka. Sababu ngona masirete nanako, idodooha to ngohi ai gangela de ai manara ma dubuso ma orasi ngohi tomanara ngonaka.”

²⁷ Duma o Laban wotemo unaka, “Dangodu magena maha de to ngona ani sininga ma loha ngohika. Sababu o nonako tamake de tanakoka, igogou o Jou Gikimoi Awi laha ilamo ngohika gena ma ngale ngona lo kanaga ai tahu ma rabaka.

²⁸ So nosingangasu bato ma lamo idodooha la ngohi aku tofangu imamote de to ngona ani gogolo ngohika, hitilahi nomodesi nogoge dede ngohi.”

²⁹ Kagena de o Yakub wosango wotemo, “Ngona masirete lo ka nanako, idodooha to ngohi ai manara ma dubuso de to ngona ani biara, ena gena ani kabi de ani duba, ma orasi ngohi tojaga de tapalihara.

³⁰ Sababu aku nositero ma orasi ngohi tahino waasi gena idodooha to ngona ani biara ma dala, de kanaga ma orasi ngohi tojaga de palihara gena ani kabi de ani duba foloisi idala. Gena ma ngale o Jou Awi laha wodogo ngonaka ma orasi ngohi togoge ani tahuka. So muruoka de asa aku ngohi tomanara ma ngale to ngohi ai pedeka de ai ngopa-ngopa manga oho o orasi ma simaka.”

³¹ De o Laban wotemo, “So o kia bilasu ngohi tonihike ngonaka.” De o Yakub wosango kali wotemo, “Upa lo o kia naga moi noihike ngohika, hitilahi ai gogolo manena nosimote gena, ngohi ka todupasi ani kabi de ani duba tojaga de tapalihara.

³² Duma o wange manena dabolo noisimaha la ngohi asa totagi de towosa ani kabi de ani duba ma sidongirabaka, la asa tatinga kia ani kabi de ani duba datataro de dababalanga la ma ngale kanaga o duba datataro de o kabi dababalanga gena ngohi noihike. So ka kamagena idadi to ngohi ai gimina maro ai gangela ma fangu moi ngohika.

³³ La ma duuruka asa nakelelo ai sininga ma bolowo gena idodooha, nakoso ngona nahino de notailako to ngohi ai gangela ma fanggali. So nakoso nahino de kanaga o duba datatarowa eko o kabi dababalangawa la namake, magena ngohi tatosika.”

³⁴ Dabolo de o Laban wotemo, “Iya, komagena dabolo maro o kia ngona notetemo gena.”

³⁵ Duma wosihagaka, so o wange magena de o bi kabi dabalanga, de itabu-tabu, de lo o bi duba datataro gena, dangodu gena watinga de wasulo awi ngopa-ngopaka la ona yojaga.

³⁶ Dabolo de kanaga o Yakub wojagasi o kabi de o duba ma soohu igogogesi, de o Laban de awi kabi de awi duba ma bolu watitingaka magena waaho ma riho wosikitinga ma gakuka. Upa sidago o Yakub wamake. Nakoso potagi ma deka o wange saange de asa paado riho magenaka.

³⁷ Wisihaga komagena so o Yakub wadehe o gota ma uma dabobole ma soka maro o ngolola ma uma, o kailupa ma uma, de lo o ngasi ma uma. So o gota ma uma magena wakeleto wabuli-bulika, sidago o gota ma uma magena lo dabala-balanga.

³⁸ Wakeleto wabuli-bulika, de o gota ma uma dabalanga magena awi kabi de awi duba ma ake ma rihoku wongadoka, la ma orasi awi kabi de awi duba yahino o ake iudo gena o gota ma uma dabala-balanga kagena ma simaka ihadoku. Sababu o kabi de o duba, nakoso yahino o ake iudo, de yodupa lo imatekemodoka.

³⁹ So nakoso o kabi de o duba la imatekemodoka o gota ma uma dababalanga ma dateka, done o kabi de o duba magena ma ngopa lo idadi dababalanga.

⁴⁰ Komagena lo asa o bi duba o kabi ma sidongirabano o Yakub watinga. Watingaka, de ma orasi imatekemodoka de o bi duba magena wosirisima o bi kabi datataro de dababalangaka. Ma ngeko komagena, sidago una aku wamake to una awi gimina gena awi kabi de awi duba lo he wosicapu kawa de to Laban awi biara.

⁴¹ De lo o orasi isigeto, nakoso o kabi eko o duba ilalago imatekemodoka gena, ma ake ma ngihiku o gota ma uma dababalanga magena wongadoka ma ngale imatekemodoka gena o gota ma uma ma dateka.

⁴² Duma nakoso o bi kabi de o duba dapopelela gena o gota ma uma magena wongadowa o ake ma ngihiku.

⁴³ So komagena aku una wamake to una awi gimina eko awi biara masirete gena, awi kabi, de awi duba, de lo wodogoli awi unta, awi keledai, de lo awi gilalo ileleleani gena he idala sidago lo wokaya ifoloika.