Dodadi 27 - O GIKIMOI AWI JAJI ma BUKU

O Ishak de ma ngopa o Yakub manga jarita

¹ Ma dongoho o Ishak he wiperekika de awi lako lo damarasaka so he womasigelelo kawa, de ma ngopa woriria o Esau iwiaso de wotemo unaka, “Ai ngopa, nahinosi ani baba ai dateka.”

² So una wahinoka, de kagena de ma baba wotemo, “Noikelelo ani baba ngohi manena iperekika de tanako waasi moruoka de ngohi asa tosone.

³ Ma ngale magegena o orasi manena dabolo notagi ani dahe nadehe, ena gena ani ngami ma awa de ma doto de hika o pongaka nonyonyau la o sihode maijanga moi nangami.

⁴ De hika nasakahi namonge-monge, maro o sakahi kia ngohi todudupa dabolo de noihike ngohika la aku taodo, ma ngale tosone waasi de aku ngohi togolo o Jou Gikimoi asa Awi laha foloi wodogo ngonaka.”

⁵ Duma orasi magena ma pedeka ongo Ribka gena mosigigise kiaka o Ishak wotemo ma ngopa woriria o Esauka. So ma orasi o Esau womajoboka o pongasa wonyonyauka,

⁶ de gila-gila ma awa ongo Ribka mosingangasu ma ngopa wononongoru o Yakubka, “Wewe! Toiseka bai, ani baba wotemo ani riaka gena komanena,

⁷ ‘Notagi nonyonyau la o sihode maijanga moi nangami de nasakahi namonge-monge, maro kia ngohi todudupa la taodo, ma ngale ani baba tosone waasi de o Jou Awi simaka aku ngohi togolo Una Awi laha foloi wodogo ngonaka.’

⁸ Komagena so ngona noise ai demo de naaka to ngohi ai sosulo manena.

⁹ Nomajobo de notagi to ngone nanga duba de nanga kabi pakokurungaka, de o kabi ma goho ngai sinoto natolaka, de naahono, la ngohi ani awa asa tasakahi tamonge-monge maro kia ani baba wodudupa.

¹⁰ Dabolo de ngona nowidota ani babaka la una aku waodo, ma ngale una asa wosone waasi de wogolo o Jou asa Awi laha foloi wodogo ngonaka.”

¹¹ Duma o Yakub wotemo munaka, “Ai awa! Ai ria o Esau una magena o nyawa moi awi rohe de ma gogoka, de ngohi ai gogo ihiwa so ai kahi gena damomaahi.

¹² Done nagala ai baba woipada de upa sidago ai baba wotemo towisigoguule eko towisihaga. So de ma ngale magenena done ngohi o Jou Awi laha tamakewa, de ka cawali Awi kutuku tamake.”

¹³ Duma ma awa motemo o Yakubka, “Ai ngopa, done ngohi asa tamoku o kutuku magena, so noisigise bato, de hika notagi la o bi kabi magena naahono kanena.”

¹⁴ Komagena so gila-gila una wotagi o bi kabi magena wadehe so watolaka, de wahike ma awaka. So ma awa asa masakahi mamonge-monge, maro o kia ma baba wodudupa.

¹⁵ Dabolo de muna woriria awi baju daloloha, o tahuka wadodiahi gena, madehe de mowisipake ma ngopa wononongoru o Yakubka.

¹⁶ De lo o kabi ma kahi magena awi gia ngai sinoto mosisaoka de awi tolo lo kiaka damomaahi magena mosikoloroka.

¹⁷ So kagena de ma awa o kabi masosakahika, de o ino damomonge magena mahike ma ngopa o Yakubka.

¹⁸ Ma ngale wononongoru o Yakub masirete wowosa ma baba o Ishak awi ngihika de wiaso wotemo, “Baba!” De una ma baba wopalu wotemo, “Ai ngopa! Ngona naguuna.”

¹⁹ De o Yakub wotemo, “Ngohi manena o Esau, ani ngopa toriria. O kia noisusulo gena tamake de taakaka, so nomomi la nomatamiye de naodo bai, dabolo de asa aku nogolo o Jou-ka la Awi laha foloi wodogo ngohika.”

²⁰ So ma baba wotemo awi ngopa una magenaka, “Pei! Ai ngopa nicapati bolo so namakeka.” De ma ngopa wosango wotemo, “Sababu o Jou ani Gikimoi woimote sidago ngohi aku dacapati tamake.”

²¹ Kagena de ma baba wotemo ma ngopa wononongoruka, “Ai ngopa, nahino ai dateka, la aku tonipada de toninako, igogou ngona manena ai ngopa noriria o Esau eko nagala nisowo.”

²² Mutuwade wononongoru wotagi de ma baba awi dateka womaokoye, so ma baba wipada de wotemo, “Nakoso ani ili gena o Yakub, duma ani gia gena noriria o Esau.”

²³ So igogou una gena iwinakowa, sababu awi gia gena dagogo maro ka to Esau awi gia, so tanu ma baba he wogolo o Jou Awi laha idogo o Yakubka.

²⁴ Duma una asa wisano kali, “Igogou, ngona manena ai ngopa noriria o Esau?” De wononongoru wosango wotemo, “Iya, ngohi manena dabolo.”

²⁵ So kagena de ma baba o Ishak wotemo kali, “Nako komagena o sihode magena ai dateka nahadoku la ai ngopa awi gangela o sihode wosisasari de wasosakahi gena taodoka, de aku togolo o Jou Awi laha wodogo ngonaka.” So o sihode magena ma baba awi dateka wahadoku, de ma baba asa waodo. De o anggur lo wihike so ma baba asa waudoka.

²⁶ Daboloka de ma baba wotemo ma ngopaka, “Ai ngopa, nahino notorifano, la noihame kasi bai.”

²⁷ Gila-gila ma ngopa wononongoru wahika ma babaka womasitorifa de wikololo, de ma baba iwihame wisiuku-uku. Iwihame de ma baba Ishak lo wihame o Yakub awi baju ma bou, so gila-gila o Yakub magenaka wogolo o Jou Gikimoi Awi laha idogo, de wotemo, “Igogou-gogou, ai ngopa ani bou gena imatero koloko o pido moi o Jou Awi laha wosidumuka.

²⁸ Tanu o muura ikopola o dipaku de o tona dasaki o duniaka o Gikimoi wonihike ngonaka. So ani tamo o polaka iwedo-wedo ani anggur yaaaka lo kanaga de ma boloika.

²⁹ Tanu o bi bangsa de o bi soa dangodu inisigise de ileleani cawali ngonaka. Nomatamiye la napareta ani nongoru de ani gianongoru, ani awano ma ngopa de ma danoku yangodu. Nagoona la igolo o Gikimoi wonikutuku, ona masirete Awi kutuku ka yadahe. Nagoona la igolo o Gikimoi Awi laha ngonaka, ona magena lo Awi laha asa ka yamake.”

Woriria o Esau wogolo ma baba kali

³⁰ So komagena Ishak wogolo daboloka, o Jou Gikimoi Awi laha idogo ma ngopa o Yakubka, de o Yakub asa woliho wosupu ma baba awi ngihino. Iteka waasi, de ma ngopa woriria o Esau womasidiado.

³¹ Una lo wosidailako daboloka o ino damomonge de awi sihode, so wahika ma babaka watota de wotemo, “Baba, nomomi la nomatamiye de hika naodo ai sihode de ai ino damomonge, maro o kia ngona nodudupa, la dabolo de aku nogolo o Jou Awi laha woidogo ngohika.”

³² Duma ma baba wotemo, “Naguuna ngona manena.” De woriria wosango wotemo, “Ngohi manena ani ngopa toriria.”

³³ La ma baba o Ishak woise komagena, de asa una witirine de wotemo, “Ayoo! So naguuna una magena asa woroda wolihono so awi sihode de awi ino damomonge woihike ngohika. Sidago ma orasi ngona noliho waasi de ngohi taodo lo daboloka, de una magenaka togolo so o Jou Awi laha wodogo lo daboloka. So una magena dabolo wodadi o nyawa o Jou Awi laha wamamake.”

³⁴ La de woriria woise ma baba wotemo komagena dabolo, de una awi sininga dasiri so woari womatotoore de wogolo ma babaka, “Kodo, ai baba! Tanu ngona nogolo la ngohi lo o Jou Awi laha woidogo.”

³⁵ Duma ma baba wisango wotemo, “Ani nongoru masirete wahino de to una awi akali ma dorou so o Jou Awi loha ma ngale ngonaka gena una wakooraka.”

³⁶ De una woriria asa wotemo, “Igogou de itero awi ronga o Yakub, sababu he ma para ma sinoto ngohika asa woisipake awi akali ma dorou magena. Ai haku o ngopa toriria gena wakooraka, de o orasi kangano manena ai loha lo o Jou-no wakoora kali. So, baba, kanaga de o Jou Awi laha ka ngai moi lo ihiwa ngohika?” (Nako o bahasa Ibrani ma demo “Yakub” gena ma beto he imatero de o demo moili de ma ngale gena wokokulai.)

³⁷ De ma baba iwisango ma ngopa woririaka wotemo, “Igogou-gogou, towitide lo daboloka la una asa wonipareta ngona, de ani gianongoru yangodu lo asa idadi to una awi nyawa iwileleleani, de lo o tamo de ma pola de o bi anggur yaaaka lo towisitodihikeka. Kodo, ai ngopa! Mutuwade ma ngale ngonaka, gena o kia naga moi lo he idadi kawa taaka la tonihike ngonaka.”

³⁸ De woriria wotemo kali, “So, baba, o Jou Awi laha gena ka cawali ngai moi so? Kodo! Tanu nogolo la ngohi lo o Jou Awi laha woidogo bai.” De gila-gila ma ngopa woriria una magena woari womatoore awi ili walamo-lamo.

³⁹ Kagena de ma baba o Ishak wosango wotemo, “Igogou-gogou, ani goge o tona dasasaki o duniaka gena he namake kawa, o muura lo o dipaku ihiwaka.

⁴⁰ So done to ngona ani oho aku namake de ka ani sumarangi. To ngona ani nongoru lo asa nowileleani bai. Done nopoha kawa so ka noholu, o gilalo ma dubuso gena napalako maro o gina moi paumo so ipalako nanga belekaku.”

⁴¹ Ma orasi wononongoru o Yakubka o Jou Awi laha wodogo gena ma baba wogolo daboloka, woriria o Esau una awi sininga ma rabaka gena o doosa wapasiku. So awi sininga ma rabaka gena itemo, “Ai baba awi sone ma orasi nagala he iteka kawa, so dohaka la ai baba wosoneka, de asa tosimote la ai nongoru towitooma.”

⁴² Woriria awi edekati magena ma awa ongo Ribka imidedemo, de gila-gila mosulo ma ngopa wononongoru iwiaso ma ngale mowisingasu de motemo unaka, “Ai ngopa, ani ria gena awi edekati datorou so moiku done asa wonifanggali de wonitooma.

⁴³ Ma ngale magegena natoho nosidodiahi ai demo eko ai sulo manena. Ngona o orasi manena dabolo bilasu nomasidailako la notagi noloda de nokahika kadoka o kota Haranka.

⁴⁴ De kagena ai hira masireteka eko ani epeka nomasidodogu sutu iteka, ma bati ani ria awi sininga ma dorou de lo ma doosa isisa kasi ngonaka,

⁴⁵ sidago lo wawosaka o kia ngona naaka dabolo unaka. So kagena de asa ngohi ani awa o nyawa tasulo la itagi ningoso de nisigiliho kali nonena. Sababu ani awa gena toholu ai ngopa nisinoto nimateketooma de nisone ka o wange moi.”

O Ishak wosulo la ma ngopa o Yakub wotagi ma epe o Labanka

⁴⁶ Dabolo de ma awa ongo Ribka motagi ma babaka de motemo kali, “Ngohi gena he tapoha kawa o Esau ma pedeka-pedeka o bi Het ma nyawa magena, de tododato upa sidago o Yakub lo o jojaru moi o Het ma nyawa womagese de womasipedeka. De ngohi ai oho ma rabaka manena done ai bio kiaka tahado.”