Dodadi 22 - O GIKIMOI AWI JAJI ma BUKU

O Ishak gena bilasu o Abraham waaka awi suba moi o Gikimoika

¹ Kanaga o bi moi-moi magena idadadi gena asa ka daboloku so o orasi muruo naga he ipasaka, de o Gikimoi wodupa o Abraham awi piricaya itotiai gena watailako igogou eko ihiwa. So o Gikimoi iwiaso wotemo, “He, Abraham!” De o Abraham wopalu wotemo, “Iya, Jou.”

² De o Gikimoi wotemo, “Hika to ngona ani ngopa yanau womatetengo, o Ishak una magena nowisayangi foloi gena, bilasu ngona nowingaho la nitagi o Moria ma tonaka. La niahika kagena de asa Ngohi tonisidumu o tala moika, ma ngale ani ngopa una magena maro o gaso moi ani haiwani yatutupu, la noisisuba Ngohika.”

³ So ma ginitano de ka ilangi-langisi, o Abraham, ma ngale awi suba ma gota gena, o gota woleleta dabolo de wapolu so wapopilikuka. De awi keledai ma duduku awi gina wosibaneka, de una wotagi de ma ngopa de lo awi gilalo imomanara yasinoto ikahika o riho moi o Gikimoi wasidudumuka.

⁴ So o wange ma saangeka, de una o Abraham womaginano o riho magena, ngaroko kanaga ma soa ikurusi, duma aku wakelelo.

⁵ So awi gilalo yasinotoka wotemo, “Ngini gena kanena nigoge de nanga keledai manena. Ngohi de ai ngopa asa mitagi o riho magena ma ngale misuba o Gikimoika. Dabolo de done asa miliho kali nonena nginino.”

⁶ So ma baba o gota magena watide de ma ngopa awi belekaku wahado de wisimoku unaka, de una o diha de o uku ma ngabo waaho ma ngale o gota wositupu, so ona yasinoto itagi imamote-mote.

⁷ So kagena de ma ngopa gena ma babaka wotemo, “Baba, o gota de o uku ngone poahoka, so kiaka o duba ma ngopa la aku paaka nanga gaso de patupu.”

⁸ De ma baba wotemo, “Ai ngopa, o duba ma ngopa gena kanaga o Gikimoi masirete asa wosidailakoka.” So gila-gila ona yasinoto itagi sidago imasidiado.

⁹ So ma orasi ona imasidiado o riho magena kiaka o Gikimoi wosidudumuka, de ma baba o Abraham una magena awi gaso ma bi teto watopuye, so o gota magena wafato ma dokuka. So kagena de ma ngopa wipiliku so o gota ma dokuka iwiidusa.

¹⁰ Dabolo de ma baba awi diha wadehe ma ngale ma ngopa gena witola.

¹¹ Duma o Jou Awi malaikat o dipaku imatoore de iwiaso, “Abraham! Abraham!” De ma baba Abraham gena wotemo, “Iya, Jou! Ngohi kanena naga.”

¹² “Upa lo ani ngopa una magena nowitooma. Sababu ani ngopa womatetengo de nodupa nowitooma la idadi ani gaso moi o Gikimoika, so o orasi manena gena igogou Ngohi tanako ani sigogise de ani piricaya itotiai Unaka.”

¹³ Dabolo de una o Abraham womaginano o riho magena ma sigilolino de wakelelo o duba ma nau moi ma taduka o gumi yapilikuka. So gila-gila una o duba magena wadehe de watolaka, de wahadoku o gota yatotopu ma dokuka, so watupu maro to una awi suba moi o Gikimoika. So o duba magena idadi awi ngopa awi dagali.

¹⁴ O riho magena una wosironga, “O kia ma kurangi gena o Jou wosidailakoka” (eko lo “Aku o Jou iwikeleloka”). De sidago o orasi manena naga o nyawa itemo, “Kadaku o Jou Awi talaka o kia nanga kurangi gena isidailako daboloka” (eko lo “Kadaku o Jou Awi talaka Una aku womasimane”).

¹⁵ De kagena o Jou Awi malaikat isidadu ma moili imatoore de wiaso unaka,

¹⁶ “O Jou gena wotemo, ‘Ma ngale ngona ani dupa gena ani ngopa womatetengo de noihike Ngohika, so Ngohi dede Ai ronga masirete tosasi,

¹⁷ igogou-gogou Ngohi Ai laha asa tonisidumu la to ngona ani ngopa de ani dano manga dala koloko o ngoma o dipaka de o dowongi o teo ma dateka. De lo ona magena asa manga lawangi yasitura.

¹⁸ Sababu ngona noisigise Ngohika, so ma ngale ngona, de ani ngopa, de lo ani danoku so o bi bangsa dangodu o duniaka done asa Ai laha yamake.’ ”

¹⁹ Dabolo de o Abraham una magena woliho wokahika awi gilalo imomanara yasinoto manga rihoka, so ona itagi imakangaho ikahika o Bersyebaka, so kagena una wogoge.

O Nahor awi ngopa de awi danoku

²⁰ Kanaga o bi moi-moi idadadi gena asa ka daboloku so o orasi muruo naga he ipasaka, de o Abraham woise ma ria o Nahor una magena de ma pedeka ongo Milka kanaga masibuo to ona manga ngopa gena yatupaange dabolo.

²¹ Ena gena, woriria awi ronga o Us, o Bus, o Kemuel (una gena done wodadi o Aram ma baba),

²² o Kesed, o Hazo, o Pildash, o Yidlaf de o Betuel.

²³ So ma duuruka, de o Betuel una ma pedeka gena momisibuo ongo Ribka.

²⁴ De o Nahor ma pedeka moili ami ronga ongo Reuma de muna mosibuo o ngopa yanau gena o Tebah, o Gaham, o Tahash de o Maakha.