Dodadi 2 - O GIKIMOI AWI JAJI ma BUKU

¹ Komagena o Gikimoi o dipa de o dunia wosidadi moi-moi de ma raba daloha so ifato de ifara itotiai.

² So de o wange ma tumudingika de Una womanara kawa duma Una womawoma.

³ So Awi manara wosiboloka so womawoma de o wange ma tumudingika Awi laha wosidumu, so wosilamo de watebi.

O Gikimoi o nyawa yanau moi de o ngopedeka moi wasidadi

⁴ O dipa de o dunia ma sidadi gena komanena: Ma solano de o Jou Gikimoi magena o dipa de o dunia wosidadika

⁵ de o bi goho o tonaye ioho waasi, sababu o muura ihiwasi o duniaku de o nyawa lo yahiwasi so itorowa.

⁶ Imuura waasi duma o marasa iuti o dududuku so asa ma tona magena yapesa.

⁷ So o orasi magena de o Jou Gikimoi o tona ma gaapo wadehe la o nyawa moi wosiaka. De o Jou Awi woma magena wosiwuwu o nyawa magena awi ngunu ma busuneka, so o nyawa magena woohoka.

⁸ Kagena de o Jou Gikimoi wosidailako o doro daloloha moi o Eden gena ma wange ma nyonyieka. So o nyawa wiaaka una magena kagena wihado.

⁹ Kagena o Jou Gikimoi wosioho o bi gota idala, o gota dangodu magena panano daloha de ma sopo lo daloha so aku paodo. De lo o doro ma dongirabaka wosioho o gota ngai sinoto, ena gena o gota moi ma sopo o nyawa aku de yaodo yasioho so isonewa, de o gota moi ma sopo o nyawa o loha de o dorou yasinako.

¹⁰ Kanagali o Eden ma doroka o selera ngai moi iuhi so idadi o Eden ma doro ma ake. Duma o Eden ma sonongasa kagena o selera ma sago ngai iha.

¹¹ O selera ma nonoma magena ma ronga o Pison. O Pison ma selera magena ipelu-pelu so iuhi o Hawila ma tonaka.

¹² Ma tona ma rabaka kagena o guraci ma duhutu de o silo damumuti isironga “o bedolah” de lo o teo o paramata isironga “o krisopras”.

¹³ O selera ma sinotoka magena ma ronga o Gihon. O Gihon ma selera magena ipelu-pelu so iuhi o Kush ma tonaka.

¹⁴ O selera ma saangeka magena ma ronga o Tigris. O Tigris ma selera magena o Asyur ma tona ma sonongano o wange ma nyonyieko iuhi. O selera ma ihaka magena ma ronga o Efrat. O selera ngai iha magegena o Edenko iuhi so idadi o selera ngai moika.

¹⁵ O nyawa waaaka una magena kagena o Eden ma doroka wihado. La asa o nyawa magena wotoro de wojaga.

¹⁶ Ma orasi magena de o Jou Gikimoi wosibobita unaka, “Ngona tonisimaha naodo o bi gota ma sopo o doro manena ma rabaka,

¹⁷ cawali o gota o hutu moi magena o loha de o dorou o nyawa yasinanako gena, o sopo magena upa naodo. Nako naodo done o orasi magena dabolo ngona nosone.”

¹⁸ So kagena de o Jou Gikimoi wotemo, “Komanena dalohawa nakoso o nyawa una magena ka womatengoka. So o nyawa moili asa taaka, de o nyawa muna magena tasitero de una la mogoge de mowiriwo una.”

¹⁹ De o Jou Gikimoi o tona wadehe so o bi haiwani de o bi namo waaakaka. De ona magena watolomu o nyawa una magenaka la o Gikimoi asa witailako idodooha o nyawa una magena o bi haiwani de o bi namo moi-moi ma ronga wogaka. De o kia una wasirongaka magena idadi to ona moi-moi manga ronga.

²⁰ So komagena o nyawa una magena o bi haiwani de o bi namo ma ronga wosirongaka. O haiwani de o namo magena wosirongaka, duma to una awi roriwo de awi dodiao wamake waasi.

²¹ So o Jou Gikimoi o nyawa una magena wisikiolo witotiwotuka. De awi meseso ma kobo moi wadehe. Wadehe dabolo de ma nabo magena wosiloha kali.

²² Kagena de awi meseso ma kobo magena wosiaka so imadadika o ngopedeka moi. O ngopedeka muna magena womingaho o nyawa una magenaka.

²³ So womikeleko muna de una winali de womore so wotemo, “He! Muna manena ami sihino ai mesesono so imatero dede ngohi. To muna ami kobo so ka to ngohi ai kobo, de lo to muna ami lake so ka to ngohi ai lake. Komagena muna misihino ngohino so muna ami ronga o ngopedeka.”

²⁴ Idodoma idadika komagena, so ipasaka de o nyawa yanau bilasu ma baba de ma awa wadongosa la una de awi pedekaka, so ona asa idadi ka ka moi.

²⁵ So o nyawa una magena de awi pedeka ona yasinoto ioho imawatoka, duma yamodowa de lo yamadewa.