Dodadi 18 - O GIKIMOI AWI JAJI ma BUKU

O Gikimoi o ngopa yanau moi wisijaji o Abrahamka

¹ O wange moi o Abraham awi dadaru o Mamre manga seri ma riho o bi gota yamomodo imatekedalateku, de o wange itotiai so dasahu poli so kanaga ma ngoraka womatamiye, de o Jou womasimane unaka.

² So komagena o Abraham womaginano de wakelelo kanaga o nyawa yaruwange imaokoye to una awi simaka. Wakeleloka, de womaoko de womagogora wasibubusu onaka. De wobukuku onaka wosuba

³ de wotemo, “Baba-baba tinihoromati, maha de ngini nia sininga ma loha ngohika tanu upa ka nigila-gila duma tanu nitulu kasi ngohi ai tahuka.

⁴ Hino la ngohi asa tasulo ai gilalo ileleleani o ake yodehe ma ngale to ngini nia dohu yatiodo kasi. Nimomodo so tanu niahino kanena o gota ilalamo ma litimika la nimasiwoma kasi.

⁵ De ai tahuka nitulu so ngohi foloi todupa ngini tinileleani gena asa o ino de o ake tosidailako la aku niputuru la nia dodagi gena niadofa kali.” Kagena de ona isango itemo, “Igogou! Ani sininga ka daloha poli. So ngomi asa mitulu ani tahuka.”

⁶ Una womatai-tai awi tahuka wowosa de ma pedekaka wotemo, “Taika! O terigu nadehe sutu ilamo bai gena o liter monahalo de sinoto la o roti noaka.”

⁷ Muna o roti moaka de una wotagi womatai-tai awi haiwani ma kurungaka, so o sapi ma goho moi ma rohe daloloha de dasasaki gena wahiri so wahike awi gilalo imomanaraka, la ma ngale taika yatola de yasakahi.

⁸ Kagena de una o susu biasa, de o susu lo itotokoru, de lo o sihode wadehe la wahike onaka, ma ngale ona aku yaodo. So orasi magena una masirete wasiodo awi nyawa ona magena kagena o gota ilalamo ma litimika.

⁹ So iodo dabolo de ona itemo, “So ani pedeka, ongo Sara gena, kiaka mahikaka.” De una wotemo, “Muna kadoke naga o dadaru ma rabaka.”

¹⁰ De ona manga sidongirabano moi wotemo, “O taungu ma simaka, de ma orasi maro komanena de igogou done asa tokahino kali. De o orasi magena ani pedeka ongo Sara done o ngopa yanau moi mamake.” Kagena o nyawa ona magena kanaga ma pedeka misitatabidudu so manga dadaru ma ngoraka momaokoye, de o demo magena moise.

¹¹ Ma roka lo wiperekika de ma pedeka lo miperekika so o ngoosa he mamake kawa, de idodooha o hali magena idadi.

¹² De komagena so muna ami sininga ma rabaka modohe de motemo, “Ngohi manena iperekika de komagena lo ai roka una he wiperekika, so nakoso maro o soka so he damalaika gena ai dupa lo ihiwaka ma ngale o ngopa tamake.”

¹³ Kagena de o Jou wisano ma rokaka wotemo, “Dadoohaso ani pedeka modohe de mongakuwa, ngaroko miperekika, done asa ka maakusi o ngopa yanau moi mosibuo.

¹⁴ Ngohi manena o Jou de kanaga o kia naga moi lo akuwa nitemo taaka taakuwa. O taungu ma simaka, de Ngohi asa tahino kali, de o orasi magegena done asa ani pedeka ongo Sara o ngopa yanau moi mowisibuo.”

¹⁵ Ma pedeka mimodo so muna momanosu de motemo, “Ngohi gena todohewa.” Duma Una womisango wotemo, “Igogou! Kangano gena ngona nodohe bai!”

O Sodom ma doku ma jarita

¹⁶ Dabolo de o Gikimoi de o malaikat yasinoto ona magena imajobo so ma roka o Abraham una masirete wasitota. So imasidiado kagena o riho moika, ma ngale kudaku o pidoku o Sodom ma doku gena aku yanano de yakeleloka.

¹⁷ De o Jou wotemo Awi sininga ma rabaka, “O kia done Ngohi taaaka gena bilasu towisingangasu o Abrahamka,

¹⁸ sababu to una awi ngopa de awi dano lo done asa yadala sidago idadi o bangsa ilalamo de yokokuasa. De kanaga lo Ai laha towisidumu ma ngale una so o bi bangsa o dunia ma dokuka aku o loha yamake.

¹⁹ Una magena Ngohi towihiri daboloka, ma ngale to una awi ngopa-ngopa o tahu ma rabaka asa wadoto so aku ona Ngohi o Jou Ai demo yamote de yacoho daputuru de o moi-moi itotiai gena yodupa yaaka. Nakoso o bi moi-moi magena la yodupa yaakaka, de Ai jaji dangodu unaka igogou asa tosiganapu.”

²⁰ So kagena o Abrahamka gena o Jou wotemo, “Abraham, kanaga toise o galaki datotubuso moi o Sodom de o Gomora ma bi nyawaka gena ma ngale to ona manga dorou ilamo poli.

²¹ So Ngohi todupa touti la tahuku tanano o galaki magena igogou eko hiwa.”

²² Komagena so ona yasinoto itagi imajoboka, yakahuku o Sodomku iuti, duma o Jou gena wogogogesi de o Abraham.

²³ So o Abraham witorifa o Jou-ka, de wosano wotemo, “Jou, nagala igogou o nyawa ma dorou dede o nyawa manga sininga itotiai gena ona magena nabodito de lo nasisa ka ma moiku?

²⁴ Nakoso kanaga manga dala maro yamoritoha o nyawa o moi-moi itotiai gena yodupa yaaka, kodo, tanu o kota ma bi nyawa magena upa nasisa, duma nodupa nasimaha la aku ka iohosi.

²⁵ Ngona o nyawa manga loha de manga dorou ma sopo nahiri de Ani manara naaka onaka gena itotiai. So o nyawa ma dorou dede o nyawa manga sininga itotiai gena ona magena nasisa ka ma moiku, tanu upa komagena bai!”

²⁶ De o Jou wosango wotemo, “Nakoso kanaga tamake o Sodom ma kotaka o nyawa yamoritoha gena manga sininga itotiai, gena ma ngale so de ona magena Ngohi aku upa tasisa duma o kota yangodu tasimaha la aku ka iohosi.”

²⁷ De o Abraham wotemoli, “Jou, ngaroko ngohi manena ka o nyawa bato, duma ai tabea, de ai uru ma barani manena ma ngale ai demo tadofa kali, bilasu o kia naga moi todedemo Ngonaka.

²⁸ Duma nakoso kanaga ka cawali yamoruha de motoha o nyawa manga sininga itotiai gena, idodooha. O kota magena aku nabodito de nasisa dangoduka?” De o Jou wotemo, “O kota magena Ngohi asa toholu tasisa nakoso kanaga ma rabaka tamake o nyawa yamoruha de motoha manga sininga itotiai.”

²⁹ De una wotemo kali, “So idodooha nakoso kanaga ka cawali o nyawa yamoruha bato.” O Jou magena wotemo kali, “De ma ngale o nyawa yamoruha manga sininga itotiai gena to Ngohi Ai edekati lo he taaka kawa.”

³⁰ De una gena wotemo kali, “Jou, bilasu tonisano kali, so tanu upa noidoosa. Idodooha nakoso kanaga ka cawali o nyawa yamoruwange bato manga sininga itotiai.” De o Jou wotemo, “Nakoso kanaga yamoruwange komagena lo to Ngohi Ai edekati he taaka kawa.”

³¹ De una wotemo kali, “Ya Jou, ai tabea, de ai uru ma barani manena bilasu o kia naga moili todedemo kali Ngonaka. Idodooha nakoso kanaga ka cawali o nyawa yamonahalo bato manga sininga itotiai.” De o Jou wotemo kali, “Nakoso kanaga yamonahalosi, komagena lo to Ngohi Ai edekati he taaka kawa.”

³² Kagena de una magena wotemo kali, “Bilasu tonisano kali, so tanu upa noidoosa. Idodooha nakoso kanaga ka cawali o nyawa yamogiowo bato manga sininga itotiai.” So o Jou gena wotemo kali, “Igogou! Ngohi lo toholu o kota magenena tasisa de tabodito nakoso kanaga ma rabaka tamake o nyawa yamogiowosi manga sininga itotiai.”

³³ Dabolo so manga bicara lo ihiwaka, de o Jou wotagi womajoboka, de o Abraham lo asa woliho awi tahuka.