Dodadi 15 - O GIKIMOI AWI JAJI ma BUKU

O Gikimoi Awi jaji gena o Abram wacoho

¹ O bi moi-moi idadi gena ipasaka, de o Abram asa o gogelelo moi wamake, de o Jou wotemo unaka, “Abram, upa ngona nimodo. Done Ngohi asa tonisirese o bodito ma rabano, de tonihike o loha ma fanggali foloisi ilamo.”

^2-3 Duma o Abram wotemo, “Ya Jou, Ngona Nokokuasa! Kodo! Ngona gena o ngopa noihike waasi ngohika. So done to ngohi ai arata de ai moi-moi dangodu manena gena cawali ai nyawa woleleleani ai tahu ma rabaka o Eliezer o Damsyik ma nyawa moi una magena asa wacoho de wapareta. Ma ngale komagena so, ngaroko upa he o loha ma fanggali moili noihike ngohika.”

⁴ So kagena de o Abram woise o Jou wotemo kali unaka, “Hiwa! Upa lo notemo ani nyawa woleleleani gena asa wacoho de wapareta, duma done asa ani ngopa yanau masirete una magena asa wacoho de wapareta.”

⁵ O Jou gena o Abram wingaho de wisisupu ma duduka de unaka wotemoli, “Hika nomaginano o dipaye de nako o bi ngoma dangodu naaku naeto. Done to ngona ani ngopa de ani danoku gena yadala icarawa imatero maro o bi ngoma o dipaka.”

⁶ Komagena so o Abram gena o Jou wingaku de wipiricaya. De ma sababu magegena so o Jou wotemo o Abram awi sininga itiai Unaka.

⁷ Dabolo de o Jou wotemo kali, “Ngohi manena o Jou gena ngona toningahoka de tonisisupuka o Ur-Kasdim ma kotano, ena gena o Babilonia ma daeraka, ma ngale o tona manena tonihike ngonaka la idadi to ngona ani tona masirete.”

⁸ Duma o Abram wotemo, “Ya Jou, Ngona Nokokuasa! Idodooha ma ngale ngohi aku tanako ma diai igogou o tona manena gena to ngohi ai tona masirete.”

⁹ Ma ngale o Jou Awi jaji wosingangasu unaka, so wosango wotemo, “Notagi nadehe o sapi ma bedeka ngai moi, o kabi ma bedeka ngai moi, de o kabi ma nau ngai moi dangodu magena ma umuru o taungu saange, de o namo darafuru moi de lo o namo dara moi la noihike Ngohika.”

¹⁰ So kagena de o Abram wotagi o haiwani magena wadehe ma ngale o Jou-ka wihike. Dabolo de o sapi de o kabi dangodu magena asa waleta so idadi o leta sinotoka. So wahado de wafato ma leta magena wosikokisima so idadi o rei sinotoka. Komagena lo o namo ngai sinoto duma o bi namo magena he waleta kawa.

¹¹ O sapi de o kabi ma lake magena o bi namo maro o kawi duma ilalago gena yahino iuti la tanu o sihode yaodo, duma una o namo magena wodusu so ilodaka.

¹² Ma orasi o wange he itumu gena una wikiolo witotiwotuka. So kanaga o gogiolo ma rabaka, de o modo dasosihilo iwisitodokano.

^13-15 Kagena de o Jou wotemo, “Nososininga bai, ngona masirete done asa ani umuru ikuru de asa nosone lo nososanangi sidago lo nipoosu. Duma ani ngopa de ani dano done asa igoge maro o nyawa itatagino o doku ma somoaka, de o doku ma duhutu magena asa yaduhudu so yasidipito dasiri ma deka o taungu o ratu iha. Duma Ngohi asa tafanggali dasiri o bangsa nagoona yasidodipito ona magenaka, dabolo de ma orasi ona o doku magenano isupu de yodongosa done asa manga arata de manga moi-moi gena yaaho idala.

¹⁶ O doku magenaka nobuo-buo ma bati nogalawewe so done ona asa isupu nonena o Kanaan ma tonano yakahino kali, todamaha o Amori ma nyawa kanena o dorou datotorou foloi yaakaka de asa Ngohi tadusu so yamake o fanggali datotubuso.”

¹⁷ So kagena de ma orasi o bubutu ma rabano, isitodokano o muduku moi ka idopo-dopo de o obor isosora moi itagi yakahika o sihode yahahado magena ma risoako yanonu.

¹⁸ De o orasi magena dabolo de o Jou Awi jaji wosingangasu o Abramka, so wotemo, “Ngohi tonijaji gena done asa tinihike to ngona ani ngopa, de ani dano, de lo ani galaweweku o tona manena, gena ma bati isolano o Mesir ma dokuka de itagi sidago lo o Efrat ma Selera ilalamoka.

¹⁹ De o Keni ma nyawa manga tona magena lo ka ma rabaka so magena lo iwosa ngonaka. Komagena lo o doku Kenas, o Kadmon,

²⁰ o Het, o Feris, o Refaim,

²¹ o Amori, o Kanaan, o Girgasi de lo o Yebus dangodu magena idadi ka to ngona ma rehe-rehe.”