Dodadi 13 - O GIKIMOI AWI JAJI ma BUKU

O Abram de o Lot imakitinga

¹ O Abram, de ma pedeka, de lo awi arata dangodu de kanaga lo ma nongoru awi ngopa o Lot wamote o Mesir ma bi dokuno yosupu de yotagi yokahuku o koremiaku, de manga dodagi ma meta o Kanaan ma tona gena ma koresaraye magena o Tona Negeb.

² O Abram gena wokaya icarawa, kanaga to una awi duba, o kabi, o sapi de lo awi pipi gena he podedemo kawa.

^3-5 De o Lot una lo kanaga de awi pedeka de awi gilalo ileleleani de awi duba, o kabi de lo o sapi. De ona gena yodupa yotagi de yomatotuluru o riho moika dabolo de yomatuluru kali o riho ma somoaka, de yogila-gila so yokahika o Betelka. Sidago ona imasidiado o Betel de o Ai ma risoaka, o riho moi gena idodoma kagena o Abram una masirete awi dadaru wosigokoka de o teto maro o nonako moi watopuka, ma ngale kagena o Jou wisuba de wigiliri kali.

⁶ Kanaga o riho magenaka, nakoso o Abram de o Lot imatekesikogoge, de o dumule ma pido gena imakaadowa so ona imatekesikogoge gena idadi kawa, sababu manga biara he idala poli.

⁷ So o Abram awi nyawa o haiwani yososowohi de o Lot awi nyawa o haiwani yososowohi gena imatekekangamo. O orasi magena o Kanaan ma nyawa de o Feris ma nyawa o tona magenaka yodogogesi.

⁸ Kagena de o Abram o Lotka wotemo, “Dalohawa nakoso kanaga ngone manena o gianongoru pomatekekangamo, de lo to ngone nanga nyawa imatekekangamo.

⁹ Ma ngale upa idadi komagena, lebelaha ngone pomatekekitinga. Kanaga o tona manena ilamo de ingoha, so hika ngona aku nahiri o tona kiaka ngona foloi nodupa. La nakoso ngona nodupa sadina nokahisa, de ngohi asa kodai tokahoko.”

¹⁰ O Abram wobicara dabolo, de o Lot womaginano wahisa de wahokoka, de wakelelo gena igogou o Yordan ma pido dangodu magena ma selera idala, imatero de ka idodoma o Jou Awi doro de Awi joro-joro, eko lo imatero maro o bi selera o Mesir ma tona ma bati o Zoar ma kotaka. (Ma loha gena komagena ma orasi o Jou o bi kota o Sodom de o Gomora o pido magenaka wasisa waasi.)

^11-12 Dabolo de o Lot gena wahiri o Yordan ma pido magena dangodu so ona yasinoto gena imakitingaka. De o Abram gena o Kanaan ma tonaka wogoge so he womatuluru kawa, duma o Lot womajobo de wotagi wokahisa o wange ma siwasa, de kagena o bi doku ma pidoka wogoge so o dadaru womasigoko o Sodom ma dateka.

¹³ Kagena o Sodom ma kotaka igogoge gena o bi nyawa yangodu manga sininga datotorou de o Jou wanako ona yodupa o dorou yaaka foloisi idala.

O Abram gena womatuluru o Hebronka

¹⁴ Ma orasi o Lot gena wotagika, de o Jou gena wotemo, “Abram, hika ngona nomaginano kasi bai kudahe de idake, bai lo sadine de kodade.

¹⁵ O tona dangodu magegena Ngohi asa tonihike ngonaka de lo ani ngopa de ani danoku, idadi to ngini nia pusaka o orasi manena de ka sidutu ikakali.

¹⁶ De Ngohi asa tonihike ngonaka, ani ngopa, de ani dano de lo ani galawewe gena yadala icarawa. Maro o nyawa yaakuwa yaeto o dowongi o teo ma dateka, komagena lo ani ngopa de ani danoku o nyawa moi lo yaakuwa yaeto.

¹⁷ So hika notagi de o tona magena nakiloli ma ngale nomasitongona, sababu Ngohi asa tonihike ngonaka.”

¹⁸ Dabolo de gila-gila o Abram awi dadaru watuluru wokahika o Hebron ma dateka, so de o Mamreka manga seri ma riho o bi gota yomomodo imatekedalateku, so kagena maro o nonako moi o Jou-ka so o teto watolomu de watopuye.