Yotuwa 3 - Ala Wone Peenok Peebi Mbanak

Niyo Yoraran mogombunuk wundogogwaarak wone

¹ Yogo mbareegwa, Yotuwa aakumi Iterali mendek abok aret inom o Titim nogo yinuk, ko'lu kuubondendok niyo Yoraran aa'nggi paga ari wogo nogogwaarik, awo wunda woraawok nduk, inawooliya wuppatinuk, wonogogwaarak.

² Taati nogo kenagan yippogo nogogwaarik, it aap Iterali inoweewi nen aakumi Iterali apit inawooliyana wonogwe me,

³ yoranet nogo logonet, “It aap Ala unde inanebunu Lewi mendek nen at Aliku kinogoba Ala wone yugu aloobut mbanak me yonggolak nogo eewu'nuk wonok inaa'nduk nogwe kinigen iigo logomonggotik, kit apit aret kinawooliyana nen wundi woraanuk, muguren namunggup o.

⁴ Tu nogwe kit kineenggo'lek me, it nogwe muguren mban noorak kwe, Ala aloobut mbanak wonage me panggorogon owagam nagup o. Ata, aloobut mbanak wonok oolo nogwe iigak, tayorogon metet seribu negen peenok-peenok namunggup o,” yinuk, yoragagerak.

⁵ Yorogo mbareegwa, at Yotuwa nen it aakumi Iterali mendek nogo wone ambi yorage logonet, “Ko'lu kit kinenggela'me at Aliku ALA nen eerubok mendek alik negen ambi eerigin me, kiniki kikak naka'lek at ake leenogo patinuk logonip o.”

⁶ Yorage nagagerik, it aap Ala unde nogo yorage logonet, “Wone yugu Ala aloobut mbanak me yonggolak nogo, eewu'nuk wonok kinaa'nduk yi enebaga wunda namunggup o,” yinuk, yorage mbareegi, Ala aloobut mbanak nogo eewu'nuk wonok inaa'nduk wunda woraawok nduk, eekwi iigak,

⁷ at Aliku ALA nen Yotuwa yoge, “An Muta nimbirak wonagagirak nogo pogom yogondak kat nimbirak wonage nogo it aakumi Iterali ineenu aruwak nduk, inenggaanom paga kat kendage tiyappagagin o.

⁸ Togop me, it aap Ala unde wone yugu Ala aloobut mbanak me yonggolak wonok nogo menggaarak nogo nen Ala aloobut mbanak eewurik wonok niyo Yoraran aa'nggi paga panggo yi nogo logomenggaarik, nok-nok aret niyo inikime time mi'nari unggwi nawak nduk, yoret o.”

⁹ Yoge mbareegi, at Yotuwa nen it aakumi Iterali yorage logonet, “At Aliku kinogoba Ala oone ari nogo kit kinaruk konenubagip nduk, ya'i panggo yi woraanip o.”

¹⁰ Yorage nagagerik, panggo yi wogo mbareegwa, it yorage logonet, “At eenik menggerak Ala nogo kinenggela'me wonage logonet, it aakumi Kanan mendek inom, Ket mendek inom, Kewi mendek inom, Perit mendek inom, Nggiragati mendek inom, Amori mendek inom, Yebut mendek inom, it apit aret at Aliku ALA aa'nduk a'nuk, mugogo wumbiyaagin abet aret kineenu arumunggup nduk, ambi yokkira o.

¹¹ At o yi unde menggerak Aliku ALA awone yugu aloobut mbanak me yonggolak yi, eewurik wonok kinaa'nduk yi Yoraran inikime awo kiniyok pi unggwogwe kiigak, ambi eeriyak me,

¹² kit Iterali kinanebunu ambitak nggigik 12 aret leenogo piyaamunggup o.

¹³ At o yi unde menggerak Aliku ALA awone yugu aloobut mbanak me yonggolak eewu'nuk wonok nogo menggaarak it aap Ala unde nogo nen aloobut mbanak piyaninuk yi Yoraran inikime awo iniyok mbaangga unggwogwe iigak, niyo nage nogo ogu mogonogo wuppege, ndi, agi mogonogo nippege, eeke kaamunggup o,” yinuk, yoragagerak.

¹⁴ Yorage mbareegi, it aakumi Iterali mendek inawooliya wuppunuk wonogogwam nogome nen niyo Yoraran wunda woraawok nduk, eekwi iigak, it aap Ala unde nogo nen Ala awone yugu aloobut mbanak me yonggolak nogo eewu'nuk wonok inaa'nduk ogogwaarak.

¹⁵ Mbi put age eyom paga niyo Yoraran nogo nggwok wu'nuk wage logonet, yi mendek ndi mendek apit aret taanogo pit nage menggerak me, ne ti eyom paga niyo wu'nuk wage kagak, it aap Ala unde nogo nen Ala aloobut mbanak eewurik wonok niyo Yoraran aa'nggi paga ari nanuk, niyo inikime ungguwok nduk, iniyok niyo awo mbaanggogwe iigak,

¹⁶ niyo wage nogo moguk togon ee'nuk, o Taratan yaga'lelo o nda Aram taati yenggenogo pit lagangge, ndi, niyo ambut mayu ogup yenggenak laut Araba paga kuni nage nogo ti, nage menggi kwak aret nage, eeke kagak, oolo taati ne ambit liingge aret niyo nogo porok yereegerak.

¹⁷ Porok ari mbareegi, it aap Ala unde wone yugu Aliku ALA aloobut mbanak me yonggolak piyaninuk nogo menggaarak nogo, niyo Yoraran inikime nggween kin eerogo pereegerak paga unggunuk, mi'ndak wonogwe iigak, it aakumi Iterali nogo abok aret nggween woloonak paga o Yeriko pa'nggwe yibaga wunda wogogwa-wogogwa age yobok togon aret wunda wogogwaarak.