Yetaya 48 - Ala Wone Peenok Peebi Mbanak

Peebi alik ngget mendek eerogo piyoorak yoragagerak wone

^1-2 At Ala nen ari logonet, “Nit ninendage Iterali aret, yogwe, Nit Yekura paga nen wiganak o, yogwe, Aliku ALA endage kumbunuk kumbuk mbanggwi, Nit Iterali mendek ninogoba ti, Ala aret o, yinuk, yogwe, Eekwi kwe, Inoone abet aret yogwe, iniki abe koonak logonet yogwe, eeka'lek we aret nendage kumbunuk yogwe, O kota abe alik leenak aret ti, nit ninaworak ninawi aret o, yogwe, Iterali inogoba Ala endage Omaawi Lombok Menggerak Aliku ALA yogwe nogo paga iniki panggonak wonogwe, Eeko menggaarak Yakup paga wiganak ti, An wone yorage yi, inaruk konenggo logowak o.

³ O maan aa'nduk togon wone arit wagagerak nogo, eeka'lek kagak, Ndogop eerigin o, yinuk, yorage, Eeka'lek kagak yorage, ineenu eeppiinet nage, Eeke nagagirik, Ti'nuk, yini-panip eereegirak paga wone ti abok aret kin agagerak.

⁴ Ti eereegirak nogo ti, it, E wa! yogolik inogogumbuk wonogwe, inanobak yugum pogom wonogwe, Eeko menggaarak an neenu me eereegirak o.

⁵ It nen, Wone ti, ninagugiwak nen eekaarak o, yogwe, Nagugi ogut eyo paga ogobakkigirogo pigirak inom, mbuti worarogo longgo warogo pigirak inom, nen wone lengganogo yorage kenok, agaarak o, yinuk, yogwe, Eekwi iyo, Peebi ndogop age kaamunggup o, yinuk, wone nogo maan aa'nduk togon yorage, Eerigin nogo aga'lek kagak ineenu eeppiige, Eereegirak o.

⁶ Eeriyak yorage nagagirak koneneegwaarak nogo muk eerit wagagerak liippogo logowak o. Liippunuk, Ala yereegerak ndak-ndak arit wage abet aret o, yinuk, yaga'lek nonggop nduk wonogo agaarik? O yogondak kuli nen an yorage nogo ti, peebi eeriyak wone alik ngget mendek yorage, It ineenu aga'lek tabarak wone nogo yorage, Eeke logogin o.

⁷ Aa'nduk yorage nagagirak nogo mendek lek o. Yogondak wone alik mendek koonogo punuk yorage nogo it awo inaruk konengga'lek wonogwe me, Nit muk nineenu aret o, yinuk, yuurak meek o.

⁸ An yorage nogo inaruk konenggwi, liippugwi, eeka'lek aret agaarik o. O aa'nduk nen inaruk logu negen eeppunuk wonogwe iinok, Nda'nogogwaarak kuli nen nok yogondak kuli aakumi nen, Inogogun ambik o, yinuk, yorogwe iige, Ndi, an kunduk, wone yorage taganogo punuk, alik agan nugwi abet aret iige, Eeke minggirak kwe,

⁹ Nendage maluk age kero, nanini mbet-mbet inoba piiga'lek teppiige, Nendage wiganinuk nawak nduk, inenggaawak lek eerogo piiga'lek inabuwa nen niniki yanggoppunuk puk wonage, Eeke agarik o.

¹⁰ Mbuti perak at mendek mban aruwak nduk kani paga worako mengga kwak an ti ndak-ndak eerogo piyoolik kwe, togop negen aret eerogo piige, Ndi, maluk-abe leennaruwak nduk, worako menggam worako mengga kwak, Aaninggin inoba piige ti paga inabut mbangge, Eekirak mbako logowak o.

¹¹ Ti eeke minggirak nogo ti, nendage maluk age, nendage lek age, eeke kero, eeke minggirak o. An nendage maluk eerogo pugwi iigak, nonggop togon mbo piyoorak mbakop? Meek aret me, An nendage abu tiyanak minggi kwak, it ambi inendage ndak-ndak tiyak yuwak nduk eekwi iinok, an, E-wa, yigin lek aret o,” yinuk, yegerak me yokkiragi o.

Iterali wondet eerogo piyoorak yereegerak wone

¹² “It Yakup paga wiganak ti, An leenogo piyareegirak Iterali mendek ti, An wone yorage yi, inaruk konenggo logowak o. An ti, nalik an aret o. Aa'nduk togon wonagagirak peebi irip paga mondok logogin ti, an nalik aret o.

¹³ An lombok neenggi paga nen nggween alom kwippege, Neenggi abe'nggan paga mbogut mbiganogo pege, Eereegirak me, Inendage kunogo wiirage neenok, kin ari wundi wogo menggaarak o.

¹⁴ It apit aret kuwak ari woraawak o. Kuwak ari wogwe iinok, wone yorage neegak, inaruk konenggo logowak o. Wone an yorage yi, inagugi inenggela'me wonage nen ambi yoragaarak mbakop? Naliku an ALA nen aakumi Mbaben mendek eeppiyoorak kooneegirak nogo ndak-ndak eeruwak nduk, Aap an leenogo pereegirak nogo nen aret eerigin o. At eenggi omaawi paga aakumi Mbaben mendek eeppiyaagin o.

¹⁵ An o! An nen aret ari, an nen aret ayonggo pege, eekirak me, An nen aret wonok wage neenok, eeriyak koonogo pigirak nogo at ndak-ndak aret eerigin o,” yinuk, yegerak me, yokkiragi o.

¹⁶ “Togop me, koorok panggorogon neya woraawak o. Koorok panggorogon neya wogwe iinok, wone yorage neegak, koneniyak nogo yi aret. O aa'nduk lombok nen wone it yorage nagagirak nogo kote kiraarogo yorage logolik. Ndi, wone yorage nogo arit wage kagak an kunduk wonage mban minggirak o,” yinuk, yegerak me, At Aliku Itok Menggerak ALA nen at Aberiniki noba panege nagaarik, nappani wagaarak o.

¹⁷ At Kikak Nakeelik Alik Leenak Wondet Eerogo Pinagaga Iterali inogoba Aliku ALA nen yegerak nogo yi aret. “It obeelom logowak nduk, mamunirage, Tu ndi paga nogwe iinok, op aret ari nage kaamunggup o, yinuk, yorage, Eeke minggirak Naliku inogoba Ala an aret o.

¹⁸ An, Yogop ee'nu ndogop ee'nu, yorage nogo liippogo logorak me eekaarak, ao! Lippogo logonetak en, niyo wage porok arilik wage mban menggi kwak iniki ugun tayenak wonogwe, Niyo laut puk aga'lek kilanogo wunabi wagak mban eeke menggi kwak, it obeelom mban eerit nogwe,

¹⁹ It paga wiganak mbini-kale'ngga kwak wigannogwe, Inombowologwe mbini lingginiyak meek kwak ogwe, Inendage lek aga'lek ki lombok wonogwe, An neegak aakumi nen inooka'lek inaani ndegenak wonogwe, Eeko logonetak o,” yinuk, yegerak me yokkiragi o.

²⁰ Kit o Mbaben nen wundi woraanip o. Kit Mbaben mendek ineenggime nen kole mbaganip o. Wone yi, kinikime nggelok ari kenok, kuum-keek agan nugwi, Wone yi wonok o irip-irip time yoranet nugwi, “Aliku ALA nen ayeloman mini nit Yakup paga wiganak nogo wondet eerogo pinanegi o,” yinuk, agan nugwi, Eeko logonip o.

²¹ At Ala nen kinombomini tu niyo lek me, o karume wogoren wage logonet, Yugum paga nen niyo wundi woraawak nduk eeke, Yugum nggaganogo pege kenok, it inake niyo kila-kila wundi wage, Eereegerak me, It niyo abu lek aret wogogwaarak o.

²² “It aap maluk eeka nogo perak, iniki ugun tayenak logogun lek aret o,” yinuk, Aliku ALA nen aret yegerak me, yagi o.