Yeremiya 39 - Ala Wone Peenok Peebi Mbanak

O Yerutalem tebeni unggwogogwaarak wone

¹ O Yerutalem tebeni unggwogogwaarak nogo yi aret. Aap Terekiya nogo Yekura inowe endagembogut wonage kagak tahun 8 eeppunuk, ambi eeke tut 10 penengge ti paga aap Mbaben inowe endagembogut Nebukanetat nogo, awuri wim eeka abok aret inom o Yerutalem wogo nogogwaarik, tebenuwok nduk, eekwi iigak,

² aap Terekiya endagembogut wonage kagak tahun 10 eeppunuk, ambi eeke tut 4 penenak tanggal 9 paga o Yerutalem yugum pak wurik langgunogo pereegwaarak.

³ Langgunogo pogo nogogwaarik, aap Mbaben mendek inowe endagembogut awuri inengga warak, aap Neregan-Taretet inom, aap Tanggat-Nebo inom, aap endagembogut awi nggwok abe wurik arum menggaarak inowe Tarekim inom, aap nagawan Neregan-Taretet inom, aap it Mbaben inowe endagembogut awuri inengga warak eegu inom, tu endage, Oolo Unggwogo Menggam time kwi'nari unggwogogwaarak.

⁴ Kwi'nari unggwogwe nogo aap Yekura inowe endagembogut Terekiya awuri ineegin warak abok aret inom nen inigen iigo nogogwaarik, oonikiya ti paga o kota nogo teppunuk, tu aap endagembogut eyabu yarak me owa'nagat peenok-peenok wurik kagak oolo tu unggwogo menggam nogo paga wundi nanuk, kole mbaganit o Araba niyo Yoreran kobappaga ari nawok nduk, nogwe me,

⁵ it aap ineegin warak Mbaben mendek nen muguren nogo logonet, aap Terekiya nogo o Yeriko kobappaga ari nagagerak wonage me, pippunuk wonok, o Kamat kota Iribila aap Mbaben mendek inowe endagembogut Nebukanetat wonage me pi nogo mbareegwa, taati nen, “Ndogop eeppagagun o,” yinuk, yoge nagagerik,

⁶ o Iribila taati aret Terekiya enegen kagak apuri inoorogo piige, it Yekura inoweewi nagawan-nagawan nogo abok aret inoorogo piige, eeke nagagerik,

⁷ at Terekiya nogo enegen kilirogo punuk, eebe wonok o Mbaben pi naakit nduk, mbutigeele tembaga paga ogobakkigirik nogo paga eenggi-iyok maarogo pereegerak.

⁸ It aap Mbaben mendek nen aap endagembogut awi o nggwok abe wurik nogo kani pugwi, it aakumi inawi wurik kani mbelanogo pit nogwe, yugum pak Yerutalem wurik langgu-langgu eerogo wuppit nogwe, eereegwaarak.

⁹ Ti eerogo pogo nogogwaarik, aap endagembogut eebe wonok nega inowe Nebutararan nogo nen, it aakumi ando iigak nogogwaarak o kota time wonogwe nogo inom, it at inom ari wogogwaarak inom, it aakumi ugun nggininik iigak nogogwaarak nogo inom, wogoren o Mbaben naakit nduk, koonogo piige,

¹⁰ ndi, it aap inamendek lek ineenggi abu lek iinok perak, yabu anggur yarak inom, nggween yabu eekkologo logorak inom, wogorage, eereegerak.

Yeremiya wondet eerogo pereegerak wone

¹¹ Aap Mbaben inowe endagembogut Nebukanetat nen Yeremiya eeppuurak it aap at eebe wonok nega inowe Nebutararan yoge logonet,

¹² “Aap Yeremiya ti, maluk ambi eeppuurak mage o. Ata, eebe wagangge logomenggendik, liirogon unde wake me, Ndogop eeppaniyak o, ari kenok, yokkege ndak-ndak eeppege logomunggun o,” yinuk, yoreegerak me,

¹³ aap endagembogut wonok nega inowe Nebutararan inom, aap endagembogut awi o nggwok abe wurik me arum menggaarak inowe Nebutiyataban inom, aap nagawan ambi Neregan-Taretet inom, aap it Mbaben mendek inowe endagembogut awuri inengga warak eegu inom, abok aret nen Yeremiya nogo

¹⁴ aap endagembogut awi wurik arum waka inawoore'nggam wonage me time nen piinogo wumbuwak nduk, yorogogwaarak piinogo punuk, aap Tapan ombooluk Akikam aput Nggeraliya nen at Yeremiya ame lombok pi nawak nduk, wogori wogogwaarak at nen wonok ame pi nage mbareegi, owe-awot inenggela'me ugun aret wonagagerak.

¹⁵ At Yeremiya nogo aap endagembogut awi o nggwok abe wurik arum waka inawoore'nggam awo keele maarak wonage me, Aliku ALA nen wone yoreegerak nogo yi aret.

¹⁶ “Kat nen aap Kuti mendek Ebet-Melek wonage me nage logomenggendik, At Omaawi Lombok Menggerak Iterali inogoba Aliku Ala nen wone yoriyak yo'negerak nogo yi aret. O kota yi, obeelom eerogo piyaagin lek maluk eerogo piyaagin o, yinuk, yagarak nogo ti, a'me nggelok yikit nduk, eeke me, enegen kagak a'me nggelok yigin, yegerak kwe,

¹⁷ Aliku ALA nen ari logonet, Ne ti eyom paga at eebe aap at agabiti mbake nogo ineenggime piyaagin lek wondet eerogo pigin o.

¹⁸ An nen at agap ndarigin me, wooluwak paga warak kambigin lek o. Iniki an noba panggombanegerak paga kugun wogoren nogo mengga kwak, agap ndarak aret logogin o, yinuk, Aliku ALA nen aret yegerak, yori nak o,” yinuk, yoreegerak.