Wone Alom Kibingga 4 - Ala Wone Peenok Peebi Mbanak

Tebenak logonet eekwi, nggwiirit eerit nugwi, eeriyak wone

¹ Kage nagagirik, oonegen abu'me aakumi abok tebembiinok wonogwe nogo iyareegirak. It tebenak wonogwe nogo nen le yogwe iigak, iniki eyak wappiiga'lek wonogwe, It aap tebenogo piiga nogo inomaawi ambik wonogwe iigak, it tebenak mendek nogo iniki eyak wappiiga'lek wonogwe, Eekwi iyareegirak o.

² Iige nagagirik, Yi aap ndi aap kambunuk nogogwaarak nogo nen inale'nggen nggwok mbakwi, Ndi, it aap kangga'lek awo ineenik wonogwe nogo ti, inale'nggen mbuuluk mbakwi, Eekwi iige nagagerik, “Ao,” mbareegirak kwe,

³ “It imbirak nogo ti, inale'nggen mbuuluk negen mbakwi iigak, It aap awo nda'naga'lek wonogwe, Oonegen abu'me yime maluk eekwi inigen kaga'lek wonogwe, Eekwi ti perak, Abunuk inale'nggen mondok iya lombok wonogwe kagi,” mbareegirak.

⁴ Mbake nagagirik, aap yabu nggwiirit-nggwaarit eekwi, ndi, ineenggi amburu paga eerit nugwi, eekwi iinok, aap ambi nen, “It eekwi ti, an togon eerikit lak, it mban eekwi yi, ao,” yinuk, anini inombake ti paga at ndak-ndak eerit nage kagagirak. Ti eekwi ti kunduk, o wiya mugurok nogwe kwe, pigoorak meek kwak aanom warogo aret eekwi iyareegirak.

⁵ Aap iniki lek wi nen eenggi awiirak wonage logonet, mbi abu nen kangge menggerak o.

⁶ Iniki ugun tayenak logonet, eenggi ambiret paga woppunuk nengge logorak ti op lombok kwe, Yabu ligak wuundamo eeppunuk eenggi mbere paga woppunuk, nengge logorak ti perak, meek aret o. Ti eeke ti, o wiya mugurok nogwe kwe, pigoorak meek kwak aret eeke kagagirak.

⁷ Ti eeke kage nagagirik, oonegen abu'me alik ambi aanom warogo age maloppereegirak nogo an mbinini o.

⁸ Aap ambi aput wulaga inom, awot wulaga inom, wonogwe lek iigak, alik mban wonage logonet, Amendek wonage nogo, “Abu aret wonage,” yinuk, kuli pega'lek yabu nggwiirit-nggwaarit eerit nage nagaatik, iniki mbake logonet, “An aap ta ake nggwiirit-nggwaarit eerit nage, Ndi, nonggop nduk nale'nggen lek kagak eerit nage, Eeke agarik o?” yereegerak. Ti eereegerak ti kunduk, aaninggin eerogo patiyak kagak aanom warogo eerit nage kagagirak.

⁹ Aap mbere nen yeenggwa-yeenggwa eekwi paga op aret age menggerak me, Aap ambit nen eerukwak, mbere nen eeko logorak op aret o.

¹⁰ Aap mbere nen eerit nogo logonet, ambi yigeebu wangge kenok, ore nen pilanogo mippuurak op aret kwe, Aap ambi yigeebu wambemenggerak pilanogo mippuurak ore lek kenok perak, at abuwa o!

¹¹ Ineebe mbere imbirak tabonak nogo yugwi kenok, inoba aganggen aret menggaarak kwe, Ambit mban nogo yege kenok perak, nonggop togon oba aganggen ariyak mbakop?

¹² Aap ambi nen aap alik ambi tebenogo puurak ti op negen kwe, Aap mbere iigak, tebenogo piyoorak eeke kenok perak, pilak yogo logonet, at aap ti tebenogo pugun o. Keele kenagan perenak kenok, mbet-mbet nggaruk yaga'lek wonage menggerak.

Ninendage tiyak yuwak mbakwi ti, we aanom warogo wone

¹³ Aap anggok ambi endagembogut kagak iniki lek wi eeko mengga kwak wone yoremenggaarak mbo pege kenok ti, maluk aret kwe, aap tawe ambi eenggilek tebenak aret kwe, iniki warak lombok wonage kenok perak, abu obeelom aret o.

^14-15 Aap tawe endagembogut obaane'me aremenggerak nogo ti, aakumi tebenak mendek inenggela'me nen it aakumi o time wonogwe inowe endagembogut age ilik? Aap keele maarogo piigo menggam wonagaatik, ti'nuk, wone lengganogo yorage menggim ari unggwage a? eeremenggerak kwe, it aakumi oonegen abu'me ineenik logonet eerit nugwi nogo, wulaga ti mban oone konenggwi,

¹⁶ aakumi at unde wogonake logomenggerak nogo ineebe ambik ineenggi lingginiyak meek aret kwe, eebe lek age kagak obaane'me mi'naremenggerak nogo togop mban oone konenggo logonet, aa'nduk wonagagerak nogo meek eerogo pugwi, eekwi iyareegirak. Ti iyareegirak nogo ti kunduk, o wiya mugurok nogwe kwe, pigoorak meek kwak aanom warogo aret eekwi mbareegirak.