Oroma 7 - Ala Wone Peenok Peebi Mbanak

Kumi wogonakwi paga in wakkagak yoragagerak wone

¹ Noreewi o. “Ala nen Muta wone yoreegerak nogo ineenu me, yora,” mbake logonet, yokkirage agarik o. It aakumi ineenik wonogo logonet, Ala nen Muta wone yoreegerak nogo eeko logorak kwe, kanggo nagaatik perak, eekulik nogo, kit kineenggo'lek me yogo ogotik?

² Wone wakkagak ambi yokkira o. Wone eeko logorak yugu nogo mugurok nogo logonet, kwe ambi onggo pugu kenok, ogonggelo eenik kagak, oone konengge logomenggerak kwe, kangge kenok perak, wone yugu eeke logomenggerak nogo lek aret aremenggerak me, wondet aago aret nege logogin o.

³ Togop kenok, at kwe nogo ogonggelo eenik kagak, aap alik wagangge kenok perak ti, “Mbabi aret eeke,” mbarugun kwe, ogonggelo nogo kangge kenok perak, wone yugu eeko logomenggaarak nogo lek age me, aap alik wagangge kenok, “Mbabi eeke,” mbarugun lek o.

⁴ Noreewi o. Ti ndak-ndak, kit kunduk, anggen yi'nage menggi kwak, Ala ake eeko logobagip nduk, at kanggo menggam nen eenik agagerak nogo kinogonggelo negen a'nuk, at oone konenggo logobagip nduk, Keritut kinom kunik logonet, kambeegutak nogo paga Muta yoreegerak wone nogo lek aret agagerak o.

⁵ Nit niniki maan mendek nen yo'nirage kenok, eerit nogo logonet, Ala nen Muta wone yoreegerak nogo konembunuk, “Niniki nen nengge nogo eeruwam, Mu-mage, yo'nirage yi, nineebi a,” yinuk, ninanini mi'nage kenok, maluk ugun eerit nogo nogogurak anggen yugu ti, kambit nogo nogogurak ti aret.

⁶ Ala nen Muta wone yoreegerak nogo eeko logowok nduk, keele maarak negen wonogogurak kwe, Keritut ninom kambeegurak nogo paga piinogo pinaneegerak me, Ala ake eeko logonet, nit aa'nduk Ala wone yugu liiru mbanak kenok mban eeko nogogurak nogo ti, eekulik o. Ata, nit yogondak niniki ngget mendek paga Aberiniki nen yo'nirage kagak Ala ake eeko ogoorik o.

Wone Muta yoreegerak paga maluk eekwi kin agagerak wone

⁷ Ti kenok, nit wone nonggop yuwok mbakop? Ala wone yugu Muta liiru mbaneegerak nogo ti, maluk aret mbakop? Mondok lek o. Wone Muta yo'netak lek en, an maluk eeke minggirak neenu a'netak lek o. Wone yugu ti paga nen, “Uugwe-uugwe eerugup o,” yenetak lek nen, an uugwe-uugwe mbake ti, neenu a'netak lek o.

⁸ Wone togop ye'netak lek nen, maluk eeriyak ee'ninake nogo ti, “Maluk aret kagi o,” yinuk, mbako logonetak lek o. Ala wone Muta liiru mbaneegerak paga nen, “Uugwe-uugwe mbariyak mage o,” yereegerak ti, neenu logonet kwe, maluk alom niniki me wonage nogo nen mi'na'nuk, “Uugwe-uugwe mbariyak nanonggwan kagak mu-mage mban yo'nege yi, neebi a,” yinuk, wone yugu nogo taganogo punuk, uugwe-uugwe mban mbarit nege nagagirak.

⁹ Aa'nduk ti, Ala nen wone Muta yoreegerak nogo, an neenggo'lek logonet, ninikiigun teeluk nege nagagirak kwe, wone, “Eeriyak mage,” yugu nogo kin age mbareegi perak, maluk eeriyak ee'nake alom nogo ninikime pilak ari nagagerik, noorogo negen paneegerak o.

¹⁰ At Muta wone yoreegerak nogo nineenik logorak nduk, yoreegerak kwe, an perak, wone ti paga nen mondok noorogo negen paneegerak.

¹¹ Maluk alom niniki me wonage nogo mi'na'nuk, wone eeriyak mage yugu nogo konembunuk, nambokan lagangge logonet, “Wone yugu nogo taganogo punuk maluk eeriyak nanonggwan agaarak me, eeru o,” yinuk, yo'nege kenok eeke minggirak me, wone yugu nogo nen aret noorogo negen paneegerak agarik o.

¹² Ti kenok, wone yoreegerak Muta liiru mbaneegerak ti, maluk lek abu obeelom alik leenak aret o. Ndi, Ala nen, “Yogop ee'nu, ndogop ee'nu,” yinuk, yereegerak wone nogo ti kunduk, mondok obeelom mot-mot alik leenak aret agaarik o.

¹³ Ndi, noorogo negen paneegerak nogo ti, wone yugu obeelom nogo nen an noorogo negen paneegerak mbakop? Abu lek o, noreewi. Ata, an maluk eeriyak ee'nake nogo ti, maluk aret yelok kaakit nduk, wone obeelom yugu nogo nen, “Kit maluk eekwi kiinok kambumunggup o,” yinuk, yereegerak nogo paga kambigin neenu agagirak me, “Eeriyak mage,” wone yugu nogo ti paga, “Maluk eekwi ti, abu maluk aret me, kambigin aret kagi,” mbarikit nduk, yo'nirage menggerak kogo o.

Niniki maan mendek ngget mendek imbirak ogoorak wone

¹⁴ Wone Muta yoreegerak ti, Ala nen aret yoreegerak nineenu kwe, an perak, aakumi aret o. Aap ambi ayeloman onggo mbanggetak me, at oone konembunuk mban eeke menggi kwak, an togop aret maluk eeke logokit nduk maluk ayeloman aret agagirak o.

¹⁵ An eerikit mbake nogo, eeka'lek logonet, eeriyak neebi mbake nogo aret eeke minggirak me, nonggop ee'nake kenok, eeke minggirak o, obak!

¹⁶ An eeke minggirak ti, neebi mbake logonet kwe, eeke minggirak kenok, eeke minggirak ti paga, wone Muta yoreegerak nogo ti, “Op aret kagi,” mba'nuk, wone ti aret omaawi eerogo pege minggirak.

¹⁷ Togop eeke minggirak nogo ti, “An nen eeri,” yinuk, eekeelik o. Ata, maluk ninikime wonage nogo nen aret, “Eeru,” yo'nege kenok, eeke minggirak o.

¹⁸ An obeelom eerikit mbakitak kwe, eeriyak meek tit aga o. An aakumi aret me, ninikime obeelom ambi eeriyak ee'naka'lek aret neenu agarik o.

¹⁹ An obeelom eerikit mbake nogo eeka'lek logonet, maluk eeriyak neebi mbake nogo aret eeke minggirak.

²⁰ Togop me, an eeriyak neebi mbake nogo aret eeke kenok, an nen aret eekeelik o. Ata, maluk ninikime wonage nogo nen, “Eeru,” yo'nege kenok, eeke minggirak o, noreewi.

²¹ Eeko logorak wone yugu niniki me mugurok nage nogo yi aret. An obeelom eerikit, mbake neegak kwe, maluk eeriyak ee'nake kenok mban eeke minggirak kagi o.

²² Ala nen, “Yogop ee'nu, ndogop ee'nu,” yereegerak wone ti, an ninikime nen eeriyak ti ninikilom aret kwe,

²³ wone yugu alik ambi niniki me wonage nogo nen pilak ari logonet, wone abe yugu niniki me nen eeriyak mbakitak nogo tebenogo pegak eeke me, an keele maarak negen logonet, “Maluk eeriyak,” yo'nege wone yugu ti mban eeke minggirak o, obak!

²⁴ Maluk eeriyak ee'nake nogo mban eerit nage logonet, irip paga yobok togon kambuurak aret ari nage me, “Ta nen nagap ndarigin o?” yinuk, niniki abu maluk tit aga o.

²⁵ Nagap ndaruwak nduk, ninowe Yetut Keritut wo'niragagerak me, “Ala wa,” yinuk, keyage wake agarik o. Togop me, niniki peenok paga nen Ala yereegerak wone yugu, “Eerikit,” mbake paga, “An Ala ayeloman aret kagi,” mbake, ndi, niniki maan mendek peenok nogo nen maluk eeriyak ee'nake nogo aret eeke paga, “An maluk ayeloman aret kagi,” mbake, eeke minggirak o, obak!