Ndawi Iya 8 - Ala Wone Peenok Peebi Mbanak

¹ “Kat nagalo nen elak kunggabeegerak niriluk logonok lak ao,” kombake agarik o. Niriluk logonetak en kat nimbirak endekem lambumbunuk kagandin neyak mbanggake neenok, Aakumi nen meek eerogo paninetak lek o.

² Kat ninondogowak nik-nik yogwe mamunnabenok nduk, An nen wokkeren nagalo ame an nda'nake nagagim pagi nage, Anggur amburu obari abe mendek inom nenggelak-kenggelak eerogo punuk, nanok nduk wokkege, Delima anggen amburu inom wokkege, Ee'netak o.

³ At eenggi kwaare'nggan paga nanep mbambaninuk wonage, Eenggi abe'nggan paga lamoppaninuk wonage, Eerak kwak aret agarik o.

⁴ O Yerutalem aagalogwe komologwe yi wae. Aap inoone yogonok lalok yogo mengga kwak eerukwak, “Aap iniki kunik imbirak inoba tayok yaga'lek iigak, ninoone yoraagun lek o,” yinuk, kumbuk mbaninip o.

Ndawi 5 wappunuk, ambi wareegwaarak wone Komologwe nen yogwe

⁵ O karume nen kwe iniki kunik imbirak pangget-pangget aago wage ti ta o? Eyo anggen abe abu'me an nen kat keenik eeppagagirak o. Time nen kat kagalo inikime logonggake, Time nen yagan wake logonet, kat ndakkake, Eereegerak o.

Kwe nen ari

⁶ Kambuurak eyom panggoni wage kenok, non mbambuurak meek kwak, it aap iniki kunik aganakwi ti, togop aret wonage, Aap kwe alik ambi wagangge kenok, “An neegak, kwe alik wagangge yi, neebi a!” mbake nogo ti, Aap kambunuk nogo menggam nen wundi noorak meek menggi kwak wonage, Imbirak eeriyak aganake nogo ti, kani omoonuk wunuk agan nage menggi kwak, aganake, Eeke menggerak me, Aap ineenggi amburu pugwi kwak, an neebe mban kinikime nabenogo pake, An nanobak mban kobaak paga lumbatinuk wonage, Eeke logot o.

⁷ Aakumi iniki kunik aganakwi nogo ti, niyo ambik lombok nen tebenogo pege, Niyo wu'nuk wage logonet, wonok nage, Eeriyak meek o. Ndi, aap ambi nen iniki kunik ambi eeka'lek kenok, amendek abe ame wonage nogo abok aret waganogo kuniyak nduk eeremenggerak kwe, kuniyak meek me, aakumi nen at agi'ndok kanggo logogun o.

Kwe awurilogwe nen yogwe

⁸ Nit ninawuluk kolaga ambi wonage o. At awo elak wungga'lek wonage me, “Kolaakit,” yo'nira wage kenok, ninawuluk ti ake nonggop koonogo puurak mbakop?

⁹ At yugum pak wurik kwak logonetak en, Nit nen pak wurik ti paga nggayo logorak o nggorek mbuti perak paga wurogo pit laganggwi, Ndi, at tungga kwak logonetak en, Eyo nggabina poorak paga nabenogo pugwi, Eeko logonetak o.

Kwe nen ari

¹⁰ An ti, yugum pak wurik kwak aret wonage, Ndi, nelak ti, o nggorek wurik kwak wonage, Eerak wonage neenok, “Niniki kwippanega yi aret kagi,” yinuk, ale'nggen nombake menggerak o.

¹¹ Aap Talomo eyabu anggur yarak o Mba'an-Kamon wonage o. Eyabu anggur yarak ti, it aap unde logowak nduk, wogoragagerak me, It inalitik-inalitak nen anggen mbanak kumbunuk, wu mbuti perak seribu wogogo nogogwaarak kwe,

¹² An neyabu anggur yarak ti perak, An mban unde logonet, nobaalombok koongge minggirak me, Wu seribu ti, kendagembogut kat Talomo wokkege, Ndi, wu dua ratus ti, it aap anggen mbanak unde wonogwe nogo wogorage, Eeke agarik o.

Aap nen ari

¹³ Kat yi yabu ndi yabu yarak me menggendak yi wae. Noreewi koone ari inaruk koneniyak uugwe mbakwi me, Koone konenikit nduk, yu o.

Kwe nen ari

¹⁴ Kijang inom, rusa aagaluk inom, obari abe eeka puut-puut yarak me mbe agan nogo mengga kwak, Kat niniki kunik yi, mbet-mbet neya mok o.