Ndawi 79 - Ala Wone Peenok Peebi Mbanak

Iterali maluk eeppiigwi iyo, tamban eereegerak wone Aap Atap nen ndawi ambi yi aret pereegerak.

¹ Ala wae. Keyate kanggween wo'niragaginom nogome Aakumi inanebunu lombok nen tebenggola unggwogwe, Kawi wurik abu abe alik leenak nogo maluk eerogo pugwi, O Yerutalem yigirik-noonom eerogo pugwi,

² It kayeloman mini ineebe inoorak nogo Towe wiganinuk nugwi inambi aruwak nduk wogorogwe, It kapuri kake leenak ineebe inoorak nogo Nggwiya inambi negen nawak nduk mbo piigwi,

³ It aakumi inamiya niyo kwak, O Yerutalem yendok-wandok kilirogo pit nogwe, Eekaarak me, Ineebe inoorak nogo nggween taambiyoorak lek me, We tene aago wonogo agaarik o.

⁴ Togop aago wonogwe iinok, Aakumi ninom korotok wonogwe nen ninagi'ndok kanggwi, Ninaagan-ambokan menggaarak nen, “Op eeppiiga,” yinuk, Miyuk-meya eerogo pinanugwi, Eeko agaarik o.

⁵ Nit togop aago niigak, ne mande ari nagin o? Kanini mondok-mondok ninoba kwippinanegak eeke logomunggun ilik, lek a? Nit mbo paganuk alik mugurok nogwe niinok, Keebi lombok ninomba'nuk kanini kani omoonuk negen Ninoba kwippinanegak eeke keegak ne mande ari nagin o?

^6-7 Yi aakumi ndi aakumi nen kat liippagagwi, Yi aap ndi aap inabu'me piinok menggaarak nen, “Ninogoba Ala aret o,” yinuk, kendage tiyappugwi, Eekulik nogo nen Nit Yakup paga wiganak inambeme yonggo'ninakwi, Nit wonogo monggom o wogo logowak nduk, ninawi kani mbilak-mbalak eerogo pugwi, Eekaarak me, Kat kanini it aap ti, inoba kwippiyet o.

⁸ Nit ninombomini maluk eeko nogogwaarak onggo nit ninoba kwippinaniyak ti mage o. Ata, nit niniki abu lek-lek ee'ninake me, Ninabuwa mba'nuk mbet-mbet aret ninomaawi eeppinani woraamunggun o.

⁹ Kat ninagap ndaka Ala wae. Kendage abu tiyanak wonage me, yeenggwa nira wage, Kendage tebek yukwak, Wondet eerogo pinanege logomenggendik, Ninomaluk lek eerogo pinanege, Eeru o.

¹⁰ It yi aakumi ndi aakumi alik mendek nen Ninabok mbininggo logonet, “It aakumi ti, inogoba Ala nggeeme wonage o?” Yinuk, yogwe ti, nonggop nduk yogo agaarik o? Nit kayeloman mini ninookwi iinok, Ninane'me wagangge it aakumi ti, ineenu aruwak nduk, Nit ninigen niigak, ninookaarak onggo eeppiiyet o.

¹¹ It aap keele maarak logonet, Iniki nggilu yogwe wonogwe nogo liippiige, It kambuwak nduk koonogo pugu nogo, Kat keenggi omaawi paga inagap ndake menggendak ndak-ndak inili ari, Eeke logot o.

¹² Nogoba o. It aakumi ninaagan-ambokan wonogwe yi, Kat meek eerogo pagagaarak onggo ne 7 kuli melak togon inoba kwippiyet o.

¹³ Togop eeke keenok, Kandomba ndegenninake nit kapuri yi nen, mondok-mondok, “Wa,” yokkugwi, Kabok mbininogo kendage tiyappagagwi nogo, Ninapuri nda'narit wundi nogwe iinok, mbininogo yoranet nogwe, Eeko logogun o.