Ndawi 76 - Ala Wone Peenok Peebi Mbanak

Aakumi inanebunu lombok inowak loongga ti, Ala aret Aap Atap ndawi ambi pereegerak yi aret me, it nggitat eekugak wako logowak nduk, ndawi tiyangga inowe wogoreegwaarak.

¹ It o Yekura wonogwe nogo nen Ala ineenu wonogwe, It o Iterali wonogwe nogo nen at endage tiyappugwi, Eeko menggaarak o.

² At awooliya wurik ti, kota Talem wonage, Ndi, at wonage menggim ti, puut Tiyon wonage, Eeke menggerak o.

³ Time nen wim eeka maale pinda agan naga inom, Nggeemu inom, wooluwak inom, kalenogo pit nagagerak o.

⁴ Ala wae. Kat kabinak mondok alik negen kwindagala aago wage, Puut-puut o maan nen itok menggerak mondok iya kwe, Kat perak, mondok iya lombok kombakwi iigak wage, Eereegindak o.

⁵ Aap wim wakaa'ngget kwe, inamendek kugun wagangge, Nogo nggaruk lek yogo mengga kwak eerogo piige, It aap kalu-kalu abok aret inomaawi lek eerogo piige, Eereegindak o.

⁶ Yakup ogoba Ala wae. Kat mberiragagindak paga Inaguda inom, inanggweendo wogoren nega inom, Inagabolok lek agagerak o.

⁷ It aakumi abok aret kat keenok, Inamineeri ne agan nage menggerak me, Kat kanini inoba piige keegak, Aap ta nen ko wappunuk logogin mbaken? Lek aret o.

^8-9 Ala wae. It aakumi nggween paga tebenak wonogwe nogo, Abok aret inagap ndarikit nduk, mi'nage nagagindik, Mbogut paga nen, “Maluk eekotak onggo an yogop aret eeppinagagin o,” yinuk, yorage nogo, It nggween paga wonogwe inaruk konembunuk, inagabiti nen inoone lek aret agagerak o.

¹⁰ Kat kanini aakumi inoba piige nogo, Aakumi inigen kenok, kendage tiyappugwi iigak, Kanini ando nogo ti, kagabee'le kwak yikkolage menggendak o.

¹¹ “An yogop eeke logokit o,” yinuk, Aliku kinogoba Ala endage kumbunuk, Kumbuk mbanumonggotak nogo ndak-ndak aret eekwi, It aakumi kinaagan-ambokan koorok wonogwe nogo, Abok aret at ayuk wukwi ake pugu nogo wogori wogwe, Eeko logowak o.

¹² At Aliku ALA nen It aakumi inoweewi nagawan-nagawan nogo inendage lek eerogo piige, Aap inendagembogut o nggween paga wonogwe yi, Inamineeri ne agan nawak nduk eeppiige, Eeke menggerak o.