Ndawi 75 - Ala Wone Peenok Peebi Mbanak

Aap inowak loongga mondok iya ti, Ala aret Aap Atap nen ndawi ambi pereegerak yi aret me, ndawi endage, Pup Eerogo Puurak Mage, yogo nogogwa kwak, yogo logowak nduk, it ndawi tiyangga inowe wogoreegwaarak.

¹ Ala wae. Nit, “Wa!” lombok yokkugwi, Keebe nda lek ninom wonage me, “Wa,” yokkugwi, Eeko logonet, Kat iya tit eerit nage menggendak nogo, nit nen wone mbininogo yoranet nogo monggoorak o.

² Kat Ala nen ari logonet, “Ne ndi eyom paga aakumi inowak looniyak o, yinuk, An nen aret koonogo punuk, An nen aret a'me nggelok mban inowak loongge logogin o.

³ Nggween nuk-nuk eeke logonet, Aakumi inom nuk-nuk eeginake kenok, An nen aret nggween alom yarak nogo pipporogo minggirak me,

⁴ It aap wogoppaka nogo yorage logonet, Kiniki ambinom wogoppatiyak mage o, yorage, Ndi, it aap maluk eeka nogo yorage logonet, Ninomaawi ambik o, yinuk, wogoppakwi,

⁵ Ninomaawi mondok iya o, yinuk, tiyappatit nugwi, Nit iya o, yinuk, keegi-woogi aago nugwi, Eeriyak mage o, yorage, Eeke minggirak o,” Yinuk, ari menggendak.

⁶ Inowak looni woroorak endage tiyanak lombok ti, Oonegen lagi wage menggim pa'nggwe nen, O kilu yi nage menggim pa'nggwe nen, O karume agi-ogu nen, Woraagin lek o.

⁷ Ata, at Ala nen aret aakumi inowak looni woraagin o. Inowak loongge logonet, It ambi tebeppiige, it ambi tiyappiige, eerigin o.

⁸ Niyo toolak kwak, Aliku ALA anini nogo, Togolowa'na toolak at eenggime porogo wonage, Anggur amburu eyak-nggweyak obari abe eeka inom nenggelak-kenggelak eerogo toolak kwak wonage me, At nen kilirogo nappi wage kenok, It aap maluk eeka nggween paga wonogwe nogo abok aret Amburu ti, mondok porok togon nonggo logogun o.

⁹ Ndi, an perak, Yakup ogoba Ala eeke menggerak mondok yoranet nage, At, “Wa!” yinuk, ndawi paga endage tiyappit nage, Eeke logogin o.

¹⁰ It aap maluk mendek inomaawi nogo, at Ala nen lek eerogo piige logonet kwe, It aap iniki abe koonak nogo perak, inomaawi ambik eeppiige logogin o.