Ndawi 70 - Ala Wone Peenok Peebi Mbanak

Yeenggwaaruwak nduk, tamban eereegerak wone Ndawut nen, “Aliku ALA abe'nake logowak o,” yinuk, ake warogo wogoge logonet, ndawi pereegerak yi aret me, it ndawi tiyangga inowe wogoreegwaarak.

¹ Ala wae. An nagap ndari wage, Kaliku ALA wae. Mbet-mbet yeenggwa niri wage, Eeru o.

² It aap an nooriyak eekwi nogo Inenggali ogwe, iniki kobak a'nuk ma'nogwe, Eeruwak o. Ndi, it maluk eeppaniyak mbakwi nogo kunduk, Inenggali a'nuk yungguninuk nogwe,

³ It aap, “Kayik a! Ha! Ha!” Yo'nugwi nogo nen inenggali mbakak inakom niruk kole nogwe, Eeruwak o.

⁴ It kat mukkeren nogwe perak, inale'nggen mbakwi, Kat eeke paga inale'nggen kani kunik negen wonogwe, “Ninagap ndakerak o,” yinuk, Iniki kunik eekkologwe nogo nen, “Ala tiyanak mban logowak,” mondok-mondok yogwe, Eeko logowak o.

⁵ Ala yi wae. An nogo aap ineenggi lek kwak abu tebenak aret wonage me, Mbet-mbet neya mok o. Kaliku ALA wae. Kat nen yeenggwa nege, wondet eerogo panege, Eeke menggendak me, Mbo paninuk elaambirik logorak mage o.