Ndawi 68 - Ala Wone Peenok Peebi Mbanak

Ineegin tiyappiyareegerak paga ndawi pereegerak wone Ndawut nen ndawi ambi pereegerak yi aret me, it ndawi tiyangga inowe wogoreegwaarak.

¹ Ala pilak ari kenok at awim nogo ma'nogwe, Inom ogoorak muguren nage kenok kole mbaganggwi, Eeko logowak o.

² O wiya nen ka'luk wonok lek age menggi kwak, At Ala nen it togop aret eeppiige kenok ineebe lek ogwe, Teemok kani aganggen nen amburu wungge logonet, Lek age menggi kwak, it aap maluk eeka nogo, At Ala enegen kagak togop aret lek ogwe, Eeko logowak o.

³ Togop aret eeko logogun kwe, It aap iniki abe koonak perak, iniki ale'nggen ogwe, Ala enggaanom paga kwirabik-kwirabok yogwe, Inale'nggen mondok alik negen nggelok ari kenok, keekok piyanggogwe, Eeko logowak o.

⁴ At Ala aruk konenuwak nduk ndawi wakwi, Ndawi paga anep tenok-mbenok yogwe, At ndugwi paga nega nogo endage wogoppugwi, Eeko logonip o. At endage ti, Aliku ALA aret me, Enggaanom paga kinale'nggen nen kwirabik-kwirabok yogo logonip o.

⁵ At Ala alik leenak menggim nogome logonet, Elege mono inogoba age, kumi togwe inawone mbangge, Eeke menggerak o.

⁶ It inoreewi lek inalik tayorogon menggaarak nogo Aakumi inenggela'me logowak nduk piya wage, It aap keele maarak nogo inale'nggen mbarit wundi woraawak nduk, Wondet eerogo piige, Eeke menggerak kwe, It aap Ala ineebi mbaka nogo perak, Inawi iri'ngga wunggeelik nggween mbuk paga piige menggerak o.

⁷ Ala wae. Kapuri wundi wogwe iinok, Kat kaa'nduk a'nuk wage, Aakumi lek me karume kapuri wogoren wage, Eeke keegak,

⁸ Puut Tinayi paga eeke kat Ala nogo kenggaanom paga, Aakumi Iterali inogoba kat Ala kenggaanom paga, O nggween ndipuk eeke, Mbogut paga nen mayu lubu-lubu wurabit wage, Eereegerak o.

⁹ Ala wae. O mayu mondok wuppi wagak eeke, Keyate nggween wo'niragagindak abu mbuk agaarak nogo, Obaane'me amburu warak eerogo pege,

¹⁰ Kapuri inaanggumi inom o time logorak piya nage, Kat abu obeelom aret me, Aakumi inamendek lek iinok, inamendek wogorage, Eereegindak o.

¹¹ Ninogoba nen, “An noone yi, wonok nanip o,” ari kenok, Kumi ambi aago ineebe ambik lombok nen wone ti yoranet nogwe,

¹² Aap inendagembogut inom, ineegin warak inom, mbet-mbet aret kole mbaganggwi, Eekwi iinok, It kumi iname wonogwe nen Inamendek yumbunogo punuk mbaganeegwaarak nogo tumbukkologogwaarak.

¹³ It ando inandomba inawi wurik me kumaarak inagabiti mbakak wonogwe iigak, It an napuri Iterali ando nogo Towe puume ogut eerak a'naabit paga mbuti perak nabenak kwak, Eeruwak paga mbuti emas pindan-pindan aago kwak, Eerak wonogo logonet eereegwaarak.

¹⁴ At Omaawi Lombok Menggerak nen Aap inendagembogut o time mak eerogo piyareegerak Kambit nogogwaarak inowak nggininik nogo ti, Puut Talomon paga nen ndugu-ndugu wambi wage logonet, Nggween enete lek eerogo pege menggi kwak Aret ogogwaarak o.

¹⁵ Puut Mbatan ti, abu tiyanak iya aret me, Puut Mbatan elaganggen ndarogo nappit nagagerak Ambik aret wonage o.

¹⁶ Kit puut-puut elaganggen yi wae. Ala wone lengganogo yorage logowam leenogo pake, Aliku ALA nen mondok-mondok logorak koonogo pake, Eereegerak puut ti kenok, kit nen yogo logonet, “Nit puut ti kokwak logowok lak, Ao,” yinuk, Pekkogo logonet, kineebi mbakwi ti, nonggop nduk o?

¹⁷ At Ala anggweendo wim eeka nogo ambik aakumi ineenggi lingginiyak abu meek aago, Mondok iya lombok me liippuurak meek aago, At enaagan-ambokan wogwe iigak, Nogoba Ala puut Tinayi nen At alik leenak menggim nogome unggwi wagagerak o.

¹⁸ Kaliku nogoba Ala wae. Kat agi tiyarogon lagi nage logonet, It aakumi keele maarogo piirogo wonogwe nogo, Apit aret ndiniren lagi nage mbareegin, Aakumi nen inamendek onggo lek we aret wokkugwi, It aap kat koone ineebi mbaka nogo kunduk, Inamendek wokkugwi, Eereegwaarak me, It ti, kinom aret logomunggun o.

¹⁹ Aaninggin-paaninggin ninoba age nogo, At ninagap ndaka ninogoba Ala nen ko'lu-kii'me wagangge menggerak me, Endage tiyappogo logowok o.

²⁰ Ninogoba Ala ti, Nit ninagap ndaka Ala aret me, An nooremenggaarak kangge neyo, Aliku Itok Menggerak ALA nen An neebe nili ari logogin o.

²¹ At Ala nen at inom wim mbanak nogo Inanobak aan lebenogo piige, It aap maluk mban eerit nogo menggaarak Ineeruwak awi wurik nogo, Inanobak taganak-mbaganak eerogo piige, Eerigin, mbako logonip o.

^22-23 Nogoba Ala nen ari logonet, “It kinawim inamiya paga kiniyok kookkologwe kiigak, Kinanggeewo nen inamili penak nunggo logowak nduk, An kinawim o Mbatiyan nen iniyokan wogoren wage, Yi nggwok laut kiiniki paga nen Iniyokan wogoren lagi wage, Eerigin,” yereegerak o.

²⁴ Ala wae. It kawim tebenogo piinok, Mbigin-mbigin eerogo piinok wogoren wage nogo ninigen nakkeegwi, Kendagembogut ninogoba Ala wae. Mbigin-mbigin eerogo piinok, Kalut eeko menggam alik leenak nogome Wogoren unggwi nage keegwi, Eekwi niigak,

²⁵ It ndawi tiyangga inaa'nduk ogwe, Nggitat paga eeka inom, nggawiwak paga eeka inom, it inambokan ogwe, Ndi, komologwe tawe oone lobale eerit inom ogwe, Eeppunuk Ndawi wareegwaarak nogo yi o.

²⁶ “Ala apuri kuwak aago inenggela'me nen at endage tiyappugwi, Kit Iterali ombowologwe wiganak yi, Aliku ALA alut eekwi, Eeko logonip o.

²⁷ Mbeniyamin paga ineebe mbuuluk wiganak nogo inaa'nduk ogwe, Ndi, aap Yekura paga wiganak Nagawan-nagawan kombogonak inambokan nogwe, Aap inengga warak nagawan-nagawan Tebulon paga wiganak inom, Natali paga wiganak inom, Age mbanit inambokan nogwe, Eekwi iigo o,” yinuk, Ndawi wareegwaarak ti aret.

²⁸ Ala wae. Komaawi keyaawok nduk, kawuri wiirage, Ala wae. Kat kawuri kinom eerit nogogutak nogo ndak-ndak eekwi kiyaawok nduk, kin eeppiya wage, Eeru o.

²⁹ Kawi abe wurik o kota Yerutalem wonage me, It aap inendagembogut nen kake pugu wonok wokkiri wogo logogun o.

³⁰ Tapi pogom wam kole niyo aa'nggi paga Mbereewa'na nugu mengga kwak ninawim nogo inaruk wake, Tapi aagalogwe inenggela'me Tapi ngguunok kombogonak nugwi kwak Yi aakumi ndi aakumi inomaawi lombok menggaarak nogo, Tebenogo piinok, mbuti perak wonok Wokkiri wogo logowak nduk, koone omaawi paga yorage, It wim namburiyak mban inikilom mbaka nogo mappiige, Eeru o.

³¹ Aap inendage warak o Metit nen mbuti tembaga paga Yi mendek ndi mendek ogobakkigirik wonok wogwe, It o Kuti mendek nen, “Ninarum wonage onggo o,” yinuk, Mbet-mbet kat Ala kiri wogwe, Eerugun o.

^32-33 O nggween paga yime yi aakumi ndi aakumi inabu'me pinaganuk menggaarak kit aakumi yi wae. At mbogut itok menggerak irimbaga nege-wege, Ngguurubu kwak oone omaawi ari, Eeke menggerak Ala konenuwak nduk ndawi wakwi, Kinogoba Ala endage tiyappogo logonet, ndawi paga alut eekwi, Eeko logonip o.

³⁴ At mondok iya, “Wi,” ugwi iigak Iterali inarum wonage, Omaawi lombok paga mbogut eerogo pit nage, Eeke ti paga “At Ala mondok omaawi lombok menggerak kogo o,” Yinuk, agan nogo logonip o.

³⁵ Ala wae. O abu alik leenak menggenom nogome nen kayuk warak lombok wundi wage, Iterali inogoba kat Ala nen kapuri omaawi eeppiige, Inayuk warak logowak nduk eerogo piige, Eeke menggendak me, Ninagabiti nen, “Iya!” kombako ogoorik o. Kendage mondok-mondok tiyappogo logowok o.