Ndawi 63 - Ala Wone Peenok Peebi Mbanak

“Ala kaakit lak, ao,” mbareegerak wone Ndawut nogo o Yekura karume logonet, ndawi yi aret pereegerak.

¹ Ala wae. 1 Kat an nogoba Ala aret o. Iri'ngga laganggeelik nggween mbuk paga logonet, Niyo abu wen-wen eeginake menggi kwak, Kat keebe lombok keyaakit lak, “Ao,” kombake, An lombok nen nimbirak lambunikit lak, “Ao,” mbake, Eeke logonet, Kwaakkabit nege agarik o.

² Kawi alik leenak wurik me wonage me nenegen keege, Komaawi ambik kendage abu tiyanak liippagage, Eekirak o.

³ Neenik wonage ti, iya negen aret kwe, Nabuwa nen kiniki kunik ee'nabit wundi wage ti, Mondok iya lombok me, Noone paga tiyappagage logogin o.

⁴ An kambuurak kuli ari nage kagak, tiyappagit nage, Neenggi nippege logonet, “Nogoba Ala o,” yinuk, nggino yokkege, Eeke logogin o.

⁵ Mbi ombat abe larak ndonggok togon nunggwi kwak, Kat togop aret eeppanege keenok, Niniki ale'nggen nen noone paga Ndawi wake logonet, tiyappagage logogin o.

⁶ Oonikiya at ambi tum wakak eekwi iigak, An nogo yege minggim winnage nagatik, koba abeke, Ninikime nen kat kabok mbininit nage, Eeke minggirak o.

⁷ Kat yeenggwa nege menggendak me, Towe a'naabit abu'na mengga kwak, an kabu'me logonet, Niniki ale'nggen paga ndawi wake agarik o.

⁸ An kat paga panggonak wonage neenok, Keenggi abe'nggan paga eyak wappaninuk menggendak o.

⁹ It an nooriyak koonggwi nogo inenggaawak lek ogwe, Nggween abu'na kiiniki paga wambi nogwe, Eerugun o.

¹⁰ Wim ineenggime piyamenggendak wooluwak paga inookwi iinok, Mba'ngge inambi-inambiingga aret arugun o.

¹¹ Togop arugun kwe, nendagembogut an perak, Kat nogoba Ala paga niniki ale'nggen mbake logogin o. It aap pilit pugungga nogo inoone lek arugun kwe, “Nogoba Ala owak o,” yinuk, Kumbuk mbanggo menggaarak nogo perak, Inoone wogok yigin o.