Ndawi 62 - Ala Wone Peenok Peebi Mbanak

“Ala nimbirak wonage me, nu'lek logogin,” wone Ndawut nen ndawi pereegerak yi aret me, it ndawi tiyangga inowe Yerutun wogoreegwaarak.

¹ Nagap ndaka ti, Ala aret me, At nen mban eeppaniyak niniki lunik logonet, Niniki ugun tayenak aret agarik o.

² Nayugum nu'lek menggi kwak inom, nagap ndaka inom, pak wurik kwak inom, Ti, Ala mban aret me, Niniki mondok kwi'ndak nu'lek aret agarik o.

³ Aap ambi oba kwi'narumonggotak mugurok nugwi kiigak, Ne mande ari nagin o? An neebe yi, O kobat langgo agan nage kwak, Yugum yagat langgu-langgu wangge menggi kwak, Wonage neegak, Kit abok nen an lek eerogo paniyak eekwi kiigi o.

⁴ “At amunggat oba tiyanak wonage nogo Lek eerogo puwok,” mba'nuk agan nugwi, Pilit puguniyak kinikilom mbakwi, Eeko logonet, Kit kinambe paga nen Aakumi kinale'nggen inoba piinet nogo logonet kwe, Kinikime nen kugi pulunogo piinet nugwi kiigi o.

⁵ Togop aret me, niniki yi wae. Ala nen mban eeppaniyak mba'nuk lunik logonet, Oba panggombunuk, ugun tayenak logot o.

⁶ Nayugum nu'lek menggi kwak inom, Nagap ndaka inom, pak wurik kwak inom, Ti, Ala mban aret me, Niniki mondok kwi'ndak nu'lek aret agarik o.

⁷ At Ala nen mban nagap ndake, At nen mban nendage tiyappanege, Eeke menggerak o. Nayugum omaawi mendek nu'lek menggi kwak, Neebe op logorak abu'me ari unggwaga kwak, ti Ala aret.

⁸ Kit aakumi kinanebunu lombok yi wae. Nineebe op logorak abu'me ari unggwaga ti, Ala aret me, Neetik-neetak Ala paga panggonak wonogwe, Kiniki mbako monggotak nogo abok aret at enggaanom paganogo pugwi, Eeko logonip o.

⁹ Inendage lek ndarak inoba panggonak wonogwe ti, We aanom warogo aret kagak eekwi, “Aap inendage warak ndarak inoba panggombinip o,” Yinuk, yogwe nogo ti, Abe ariyak lek pilit kagak panggombuurak yogwe, Eeko menggaarak me, “Op inoba panggombuurak ngge o?” yinuk, wakkaanuk, Aap inambe aagi ne ambit wungge menggi kwak, Imbirak ndak-ndak wonogwe iyaamunggup o.

¹⁰ Aakumi inamendek nomonogo kologwe paga Kiniki panggonak wonogwe, Inamendek ndinggologwe paga kiniki wogoppakwi, Eeko logorak mage o. Kinamendek ambik age kenok, Kiniki ti paga panggonak logorak mage o.

¹¹ At Ala wone ne ambit ari kagak, An nen wone mbere ari konenggirak nogo ti, Ambi, “Ala wae. Kat mondok komaawi aret wonage,”

¹² Ndi ambi, Nogoba wae. “Kat aakumi inabuwa lombok mbarit nage, Eeke menggendak,” Konenggirak me, Aakumi eekaatak ndak-ndak aret Onggo eeppiige logomunggun abet mbake agarik o.