Ndawi 27 - Ala Wone Peenok Peebi Mbanak

Aliku ALA endage tiyappereegerak wone Ndawi yi, Ndawut nen aret pereegerak.

¹ At Aliku ALA ti, Eya eerogo panega, nagap ndaka, At aret wonage me, Aap ta paga nagabiti mbake, Neenik logokit nduk, nomaawi eeppanega ti, Aliku ALA aret me, Ta paga naganak wake, Eeriyak mbakop? Lek aret o.

² It aap maluk eeka nen namiya nawok nduk wogwe, Nawim mendek inom, ninom ogoorak inom, Nen nooriyak nduk wogwe, Eeremenggaarak kwe, Iniyok lik togon yigeebu wambit nogo logogun o.

³ It aap ineegin warak apit aago nen nooruwok nduk wangge'nakwi iigak kwe, Nagabiti nen niniki ma'nage, It ninom wim eeriyak nduk wogwe iigak kwe, Niniki lek arigin lek kwippunuk aret wonage, Eeke logogin o.

⁴ Wone ambit ambi Kaliku ALA yokkiriyak mbake, Ambiriluk ambi an eeke logorak uugwe mbake, Eeke nogo yi aret. Keraambe abu obeelom lombok menggendak nogo liippagage, Kat kawi wurik me logorak ninikilom mbake, Eeke logokit nduk, An Kaliku ALA kawi wurik me wonage neegak, Mondok kambi noorak kuli ari nawak o.

⁵ Aaninggin ambi noba ari wage kenok kawooliya wurik me paninuk wonage, Kat kawi wurik me kumaappaninuk wonage, Neebe yugum lunik paga pani lagangge, Eerumunggun o.

⁶ Ti eerogo panege keenok, Nawim wangge'nabemenggaarak nogo, Nabu'me iigak nuut pilak ari, Kawi wurik me kake warogo wokkege logonet, Nale'nggen nen kuum-keek ari, Karuk konenenok nduk, ndawi wake, Ndawi paga kanep tenok-mbenok ari, Eerigin o.

⁷ Kaliku ALA wae. Noone nggwok paga yokkege neenok konengge, Nabuwa mbake logonet onggo yo'nege, Eerumunggun o.

⁸ Kat nen ari logonet, “Nenete neyaanok nduk kwaa'nabi mok o,” Yo'nege keenok, an niniki nen, “Aliku ALA enete kaakit nduk kwaari na o,” Yinuk, kwaakkabit wage me,

⁹ Pe'neyoorak keebi nomba'nuk kenete kumaakkolage, Kanini nen an kayeloman mbo panege, Eerugun o. Kat nen yeenggwa nege menggendak me, Nagap ndaka nogoba Ala wae. Yogondak an teppanege, mbo paninuk mbagangge, Eerugun o.

¹⁰ An nagalo-nogoba nen teppanemenggaarak kwe, Kaliku ALA mbo panumunggun lek wo'nabumunggun aret o.

¹¹ Togop me, Kaliku ALA wae. It tebenogo paniyak eekwi ineebe ambik wonogwe me, Tu kat eerit nage nogo titi'nege, Tu koonak paga pi'neren nage, Eeru o.

¹² It aap apit aret mi'nogo nagaarik, pilit-pilit, “Togop eekendak o,” yinuk, yo'nugwi, Iniki aagi paga, “Ndogop eeppagagun o,” yinuk, yo'nugwi, Eekwi me, It eeppaniyak uugwe mbakwi nogo Ineenggime paniyak mage o.

¹³ O nggween paga aakumi ineenik wonogo menggam yime At Aliku ALA nen Aakumi obeelom eeppiinet nage menggerak nogo An togon togop ee'nabigin abet aret mbake agarik o.

¹⁴ Togop aret me, Kit nogo Aliku ALA tokkogwe, Kinogogumbuk eekkologwe, Kiniki nu'lek eeppatinuk wonogwe, Eeko logomonggotik, At Aliku ALA tokkogo logonip o.