Ndawi 25 - Ala Wone Peenok Peebi Mbanak

Omaluk mbo pege, arum wonage, eeruwak nduk, tamban eereegerak wone Ndawi yi, Ndawut nen aret pereegerak.

¹ Kaliku ALA wae. An niniki kat paga koonit nage,

² Nogoba Ala wae. Niniki kat koba panggombunuk wonage, Eeke agarik o. An nenggali eerogo panugwi, Nawim nen an tebenogo paninuk kunu waganggwi, Eekwi iyo, non mbanogo piyet o.

³ “At nen aret yeenggwa niraagin o,” yinuk, Iniki kat paga lunik wonogwe iinok, inenggali arugun lek kwe, Alom lek kagak aap maluk eeppiyoorak kote negen koonggwi iinok perak, Inenggali arugun o.

⁴ Kaliku ALA wae. Kat eeke menggendak neenu eeppangge, “An naru yi aret o,” yinuk, titi'nege, Eeru o.

⁵ Kat nogoba Ala nen nagap ndake keenok, Niniki kat paga mban lunik neegak, o kiip age, weege, eeke menggerak me, “Wone yi abe o,” yinuk, ari menggendak nogo Eeke logokit nduk, pi'neren nage, Liirogon mamunnake, Eeke logot o.

⁶ Kaliku ALA wae. O aa'nduk lombok nen mondok iya tit aakumi inabuwa mbake, Kiniki kunik eeginabit wundi wage, Eerit nage menggendak nogo abeke logot o.

⁷ An tawe logonet maluk eeke, Wone yugu taganogo pit nage, Eeke nagagirak nogo, Kiniki aberak logorak mage o. Ata, Kaliku ALA obeelom aret me, Aakumi kiniki kunik aganabit wundi wage menggendak ndak-ndak an noba abeke logot o.

⁸ Kaliku ALA kiniki obeelom koonak mban wonage me, It maluk eeko menggaarak nogo Tu abe paga nawak nduk, titik irage menggendak.

⁹ It aap iniki tebenak menggaarak nogo Tu obeelom paga wogoren nage, Kat kiniki mbake nogo mamunirage, Eeke menggendak.

¹⁰ Kat wone abuk nggaruk togon koonogo pege logonet, “Yogop ee'nu ndogop ee'nu,” yoragagindak nogo It aap liirogon woppunuk eekwi iinok, Kaliku ALA nen eeppiyoorak mbake nogo ti, Inabuwa nen kiniki kunik eeginabit nage logonet, Liirogon obeelom mban eeppiige menggendak aret o.

¹¹ Kaliku ALA wae. An maluk mondok nggwok lombok eekirak me, Kendage obeelom logowak nduk, Nomaluk ti lek eerogo panu o.

¹² Aap ta nen Kaliku ALA agabiti kombake menggerak? It aap inagabiti kombakwi iinok, It eeko logorak koonogo piigendak nogo liirogon mamunirage logomunggun o.

¹³ It aap ti, abe mendek mban kologo logonet, Iniki ale'nggen paga wonogwe, Ndi, it paga wiganak nen o nggween yi, ineyate kwak unde ogwe, Eeko logogun o.

¹⁴ Kaliku ALA nen wone kote koonogo pege ti, It aap inagabiti kombakwi nogo aret yorage, Kinom wone nggaruk togon koonogo piyareegindak nogo, aret ineenu eeppiige, Eeke menggendak.

¹⁵ Keele pugu kwak niyok yilinogo panugwi iinok, Kat Kaliku ALA nen mban Piinogo panege menggendak me, Kat nengga loolo paganuk agarik o.

¹⁶ Nalik mbo panegaarak wonage, Tebenogo panegaarak wonage, Eeke me, Kena koonogo pe'neege, Nabuwa nen obeelom eeppanege, Eeru o.

¹⁷ Niniki mondok aaninggin ee'nabit unggwagak mban eeke paga niniki andi negen ee'nake yi, Teeluk eerogo panu o.

¹⁸ An ee'nakwi paga yagan wake, Tebenak logonet niniki andi negen wonage, Eeke yi, Pe'neege logomenggendik, nomaluk lek eerogo panu o.

¹⁹ It nawim nogo ineebe ambik aret ogwe, Ineebi lombok nombakwi, Eekwi yi, pegiyet o.

²⁰ Neebe op logorak kabu'me aret minggirak me, Nenggali arukwak kat nen narum wake, an nagap ndake, Eeru o.

²¹ Kat paga niniki lunik minggirak me, An pilit ariilik abet mban ari, Koonak mban eerit nage, Eeke minggirak ti paga nen wo'neren nawak o.

²² Ala wae. It aakumi Iterali nogo Aaninggin-paaninggin abok aret Inoba kwi'nagaarak wonogwe yi, Wondet eerogo piyet o.