Ndawi 126 - Ala Wone Peenok Peebi Mbanak

Wondet eerogo piyaawak nduk tamban eereegwaarak wone Ndawi warit lagi nogogwaarak.

¹ Nit aap keele maa'niren pinani nogogwaarak nogo, Aliku ALA nen niniyokan o Yerutalem wo'niren pinani wagagerak nogo ti, Ninabi kogwe negen mbakak wogogurak o.

² Ti eyom paga I'ndok kambuurak mban ninambe paga wonage, Ndawi wariyak mban ee'ninake, Eereegerak me, Aakumi inanebunu lombok i'mban-mban yogo logonet, “At Aliku ALA nen Aakumi ti mondok iya lombok eeppiigerak kogo o,” Yinuk, yogo nogogwaarak.

³ Ti yogo nogogwaarak ti, Abet aret Aliku ALA nen mondok iya lombok eeppinaneegerak kenok, Ninale'nggen mban yogo ogoorik.

⁴ Togop me, Kaliku ALA wae. O ame pa'nggwe karu nggwok nogome yi porok ari kenok, Obaane'me woraawak nduk eeppege menggendak pogom Nit aa'nduk wonogogu kwak eerogo pinanu o.

⁵ It aap le yogo logonet, Yi anggen ndi anggen yumbunit nogwe nogo Inale'nggen mbako logonet, Anggen yugu mbanggologo menggaarak me,

⁶ Aap ambi anggen awi wonok nage logomenggerik, Le ari logonet, yumbunit nage kenok, Anggen mbanggolage logomenggerik, wonok Ale'nggen nen ndawi warit ame wage logogin o.