Ndawi 116 - Ala Wone Peenok Peebi Mbanak

Agap ndareegerak kenok, “ALA wa,” yoreegerak wone

¹ At Aliku ALA noone aruk konengge, Yeenggwa niruwak nduk yoge nogo liippanege, Eekerak me, Niniki kunik eeke agarik o.

² Noone yoge at aruk liirogon konenggerak me, At aret nggino yogak mban eeke neegak, kambi noorak kuli aret ari nawak o.

³ Kanggwi ageele yerek-perek eerogo panege, Kambunuk nogo menggam nogwe iinok, Inagabolo ne agan nage nogo an noba ari wage, Eekerak o. Aaninggin noba age, niniki puru aago wonage, Eekerak paga Niniki lek-lek ee'nake mbaki,

⁴ Aliku ALA endage kunogo yoge logonet, “Kaliku ALA wae. Nagap ndaru o,” yinuk, yogirak o.

⁵ At Aliku ALA ti, Iniki yanggo yinuk eeppinanege, Eekwi ndak-ndak eerogo pinanege, Ninogoba Ala ti, ninabuwa lombok mbake,

⁶ Aap tebenak mendek Aliku ALA inarum wonage, Eeke menggerak me, An nomaawi lek abu meek ee'nake mbaki, At nen nagap ndakerak o.

⁷ Togop me, niniki yi wae. Aliku ALA nen obeelom eeppagage menggerak me, Aa'nduk wonagandak kwak ugun aret logot o.

⁸ Kaliku ALA wae. Nooriyak eekwi me, kat nen nagap ndake, Nale ari me, nale mbanogo panege, Niyogobit lik yuurak eeke me, pi'nake, Eekendak me

⁹ Kaliku ALA kenegen keegak, aakumi ineenik logonet, Nugu menggam nggween paga yime an awo aret nege agarik o.

¹⁰ “An aaninggin abu meek eerogo panggerak o,” ari logonet kwe, Niniki koba panggombunuk abet kombake,

¹¹ “Nonggop eeri?” mbake logonet, “It aakumi abok ti, pilit pugungga aret o,” ari, Eekirak o.

¹² At Aliku ALA nen Obeelom mban eeppanit wundi wage menggerak me, An nen onggo nano wogoriyak mbakop? Lek o.

¹³ Amburu toolak kwak inagap ndariyak wone tiyappege, “Aliku ALA nen aret yeenggwa nigi o,” yinuk, noone nggwok paga agan nege,

¹⁴ “Kaliku ALA wokkirigin o,” yinuk, Kumbuk mbaneegirak nogo Aakumi at apuri inigen iigak wogoge, Eerigin o.

¹⁵ At apuri alik leenak kanggwi enegen iinok, Iniki kundugu lombok me, “Ao,” inombake menggerak o.

¹⁶ Kaliku ALA wae. An kayeloman abet aret wonage, Kwe kayeloman aagaluk an kayeloman aret wonage, Eeke agarik o. Mbutigeele maarak wonage me, Kat nen aret piinogo panggendak o.

¹⁷ An nen, “Wa,” yokkege logonet, ambi warogo wokkege, “Aliku ALA nen aret yeenggwa nigi o,” yinuk, noone nggwok paga agan nege,

¹⁸ “Kaliku ALA wokkirigin o,” yinuk, Kumbuk mbaneegirak nogo, Aakumi kat kapuri abok inigen iigak wokkege,

¹⁹ Kat kota Yerutalem yi wae. Kat keegak, Aliku ALA awoore'nggam taati nen wokkege, Eerigin o. Aliku ALA tiyappogo logowok o.