Ndawi 100 - Ala Wone Peenok Peebi Mbanak

Ala awi wurik me endage tiyappogo logorak wone Ala, “Wa,” yogo logonet, ndawi yi aret wako nogogwaarak.

¹ Kit yi awi ndi awi monggotak abok aret yi wae. Aliku ALA konenuwak nduk, Kiniki ale'nggen nen keekok yogo logonip o.

² Kinale'nggen paga Aliku ALA alut eekwi, Ndawi kinale'nggen ariyak mendek warit owagam wogwe, Eeko logonip o.

³ At Aliku ti, Ala aret me, kineenu a'nip o. At nen aret nineebe ogobakkigirogo pinaneegerak me, Nit at mendek aret ogoorik o. Ndomba ndegeninako mengga kwak, Ndegenninake menggerak at apuri nit aret o.

^4-5 At Ala awi owa'nagat wurik Tu unggwi wogo menggam unggwi wogo logonet, Ndawi paga, “Wa!” yogwi, Oore'nggam unggwi wogo logonet, endage tiyappugwi, Eeko logonip o. At Aliku ALA ti, obeelom aret o. Ninabuwa nen iniki kunik ee'ninabit nage nogo ti, Lek ageelik mondok eeppinanege, Aa'nduk nda'narit wundi wogwe, Peebi nda'narit wundi nogwe, Eekwi niigak, At liirogon eeppinanege menggerak me, At, “Wa,” yogwi, endage tiyappugwi, Eeko logonip o.