Ndawi 1 - Ala Wone Peenok Peebi Mbanak

NDAWI MBANAK

NDAWI PUGU KUWAK EERAK AA'NDUK LIIRU MBANAK YI ARET. (Pasal 1-41) Aap maluk aap obeelom eerit nogo menggaarak wone

¹ Aap ambi it aap maluk eeka nen yogwe nogo mugurok nage, It aap maluk mendek nen yogwe nogo konenikit mba'nuk inom ari nage, Ala wone meek eerogo pega nogo inom kwi'nage, Eekeelik kenok, Ale'nggen aret mbake menggerak o.

² At aap ti nen Aliku ALA wone yugu nogo inikilom mbake, Ala wone ko'lu-kii'me inikime koonit nage, Eeke menggerak o.

³ Eyo niyo eneeri me yarak logonet, anggen yege eyom paga anggen yege, Engga mbuk ageelik ki wonage, Eeke menggi kwak, Aap ti, eeriyak mbake nogo A'me nggelok mban arit nage logogin o.

⁴ It aap maluk eeka ti togop lek o. O wiya nen wiiri anggen wonok nage menggi kwak It aap ti togop aret wonogwe o.

⁵ Togop me, it aap maluk eeka nogo aakumi inowak loongge menggim nen, “Nit ndogop nduk eekoorak o,” yinuk, yogwe, Ndi, aap obeelom mendek kuwak eeko menggam nen, “Aap maluk mendek ninom aruwi o,” yinuk, yorogwe, Eerugun lek o.

⁶ It aap iniki abe koonak nen eerit nogwe nogo, Aliku ALA nen enegen wogonake menggerak kwe, It aap maluk eeka nen eerit nogwe nogo, Lek eerogo piige menggim time aret nogo menggaarak o.