Nakum 3 - Ala Wone Peenok Peebi Mbanak

O Niniwe aaninggin oba kwippuurak wone

¹ O kota aakumi inamiya wunako menggam, Inoone pilit mban yogo menggam, Puk aga'lek aakumi inagugun wonok pi wagak mban eeko menggam, O kota kat yi, kabuwa o!

² Yawi inookwi inagap oone ari, Nggweendo iyok oone nggelek mbuk ari, Kuda mbe agan nogo logonet, iniyogobit oone agan nogwe, Nggweendo langgok-panggok agan nogwe,

³ It aap kuda paga kwi'na'nuk mbe agan wim eeri unggwogwe, Mbuti wooluwak pindan-pindan eeke, Wooluwak ngget abinak lan ari, Aakumi ambik inoorak wanggwi, Inoorak nigabak ambik aret wonogwe, Ineebe inoorak ambik ineenggi lingginiyak meek me, ti paga iniyogobit lilin nage, Eekwi iigirak o.

⁴ Kwe ya wukak nen, “Ugun ee'nabuwak,” mba'nuk, eerit nage menggi kwak, Aap iniki nawak nduk, enete amuni mbangge menggi kwak, Tili pagangga iyagalo kwak, At kota Niniwe togop aret me, terak wuka kwak eerit nage logonet, yi aakumi ndi aakumi keele maarogo negen piige, Yogwi inooke paga aakumi inanebunu lombok apit aret ayeloman mini eerogo piige, Eereegerak paga At togop eeppege kagarak o.

⁵ Togop aret me, at Omaawi Lombok Menggerak Aliku ALA nen o kota Niniwe yoge logonet, “Kat nimbirak wim mbanak wonage me, kerali piyanogo kenaame nippege, Yi aakumi ndi aakumi kagabolo kin kaawak nduk, eeppege, It aakumi inabu'me piinet nogo menggam nen kamendek inigen kaawak nduk, kin eeppege, Eerigin o.

⁶ Ogole warak mendek keebe paga lengge eerogo pege, Ogole warak yi, neebi a, yinuk, yokkege, Aakumi nen, Yi aago wonage iya, yinuk, yokkogo logowak nduk eerogo piige, Eerigin o.

⁷ Kat togop aago wonage keenok, aakumi abok aret kat mbo paganuk kole mbaganggo logonet, O kota Niniwe nogo, muk maluk agaarak me, ta nen aleenggu maarigin o? yinuk, yugun me, Kiniki eyak wappagawak nduk, aap ngga nen kwaarogo nappiya woraagin, mbaken? Lek aret o,” yinuk, yokkege kagarak me, yagi o.

⁸ O kota Teba niyo Nin aa'nggi paga wonage ti, Yugum pak wurik kwak niyo mban wanggerak wonage me, tebenogo puurak meek wonage kwe, “At ti, meek, ndi, an perak, iya lombok,” mbake agandik ya? O kota Teba eebe op logorak ti, niyo Nin aret. Ndi, at ayugum pak wurik kwak ti, niyo wanggerak ti aret.

⁹ At Teba omaawi lek aga'lek panggonak wonage ti, o Kuti inom, o Metit inom, aret. Ndi, it inom a'nuk eerit nugwi ti, o Put inom, Libiya inom, aret wonagagerak.

¹⁰ Togop aret wonagagerak kwe, tebenogo punuk, aakumi keele maageren o nda time piya nogwe, At aagalogwe awo ngget ndarak nogo, tu irip-irip time inanobak yomba eerogo piinet nogwe, Inoweewi nagawan-nagawan nogo, Ta ayeloman eekkoloorak kaamun? yinuk, yugum paga wakkogwe, Ndi, inoweewi aap inendage warak nogo keele maarogo piigwi, Eereegwaarak me,

¹¹ Kat kunduk niyo amburu nenok kumili kunggo mengga kwak kumbunuk, It kinom wim mbanak nen kwaakkeyokwak, kumaa'nari nage, Kagap ndakko'nok kole mbagangge, Eerumunggun o.

¹² Eyo wuli anggen yegetak na'mbu nggwi eerogo pegetak me, eyo ero nogo nuk-nuk eekwi iinok, Anggen nggaru-nggaru it aap ero nuk-nuk eekwi inambe me yonggo'nari wambit wage menggi kwak, Kat keyagat pak wurik nogo ti, togop aret menggerak o.

¹³ It kawuri wim eeka kenggela'me wonogwe nogo ti, kumi kwak aret wonogwe iigi o. Togop wonogwe iigak, o kat kanggween paga tu unggwit nogo menggam wa'mbit narak nogo, Kani nen nenet nagaarak tu paarak ambe pan agan nage me, Kawim we negen unggwit wogo agaarik o.

¹⁴ Kawim nen kawi paga kwi'nari unggwi woroorak wakkagak eerugun me, kaniyo noorak toologo pake, Keyagat pak wurik mondok omaawi eerogo pit nage, Nggween nggabok amok mbanogo punuk, yugum negen longgo warogo pege, Nggabok amok mbanak punuk, yugum nggelenogo pit nage, Eno pelenak kenok, nabenogo pit nage, Eeke logot o.

¹⁵ Kat wonage me time keebe kani nengge, Wooluwak nen keebe ndanu eerogo pagage, Yibila nen iri'ngga pup eerogo nonggo mengga kwak, keebe togop aret eerogo pagage, Eerugun o. Togop me, yibila wiganggo mengga kwak wiganggwi, Wurin wiganggo mengga kwak wiganggwi, Eeko logonip ubi!

¹⁶ Laaluguragan ambik lombok mbogut paga wonage kwak lek, it aap kake kunit nega mendek ambik eerogo piyareegindak kwe, Wurin nen yi mendek ndi mendek mbelek togon nenok, nggarek yogo mengga kwak, It aap kake kunit nega ti, yi mendek ndi mendek kunit nugu nagaatik, togop aret nggarek yogo menggaarak.

¹⁷ It kat karum menggaarak ti, wurin ya nakak nugu mengga kwak wonogwe, It kat kawuri inom eeka ti, wurin aago o togwi kenok, yugum pak wurik enoona ninggiri unggwogo nagaatik, Ti'nuk, mo pege kenok, wundi nanuk, wiga agan, lek ari nagaatak aakumi ineenggo'lek mengga kwak, wonogwe, Eerak aret menggaarak o.

¹⁸ O Atiyut mendek inowe kendagembogut yi wae. Ndomba ndegeninakwi kwak kawuri aakumi inarum waka nogo, nogo yit nogwe, Kat kawuri nagawan-nagawan yonggonggolaawok nduk, winnogwe, Eekwi me, It aakumi kabu'me menggaarak nogo, kole mbaganit puut-puut time arit nagaarak wonogwe me, Aap ambi nen kuwak eerogo piya woroorak eebe lek me, inabuwa o.

¹⁹ Kooreegwaarak kawin kamiya ti ari wonage nogo, obeelom ariyak amburu lek aret me, ti paga aret kambumunggun o. Kat aakumi inabuwa nen puk aga'lek kogogumbuk logonet maluk mban eeppiinet nage nogo ti, Eeppiiga'lek ambi ta wonage mbaken? Abok aret eeppiinet nage menggendak me, It aakumi abok aret kat aremenggendak wonage ti, Inaruk konenggo logomenggaarik, inale'nggen nen ineenggi telak yogo logogun, yokkigi o, yinuk, yoreegirak.