Nakum 2 - Ala Wone Peenok Peebi Mbanak

O Niniwe maluk eerogo puurak wone

¹ Kat o Niniwe yi wae. Kat maluk eerogo pagawok nduk muk wogwe yi aret me, Pak wurik me tum wake, Tu unggwi wogo menggam kenegen liirogon wonage, Keegin-komaale mondok li'luk eeppunuk wonage, Komaawi eeppatinuk wonage, Eeke logot o.

² Eyo anggur anggen yenenak-menenak eerogo mbanggwi, Eno'mbak kalenak-pugunik eerogo pugwi, Eeko mengga kwak Aap maluk eerogo pega nen it Yakup mendek wonogo menggam togop eerogo pogo nogogwaarak kwe, It Iterali wonogo menggam aa'nduk iya lombok iinok, “Wi!” irogo nogogwa pogom It Yakup mendek wonogo menggam togop aret eerogo pigin o.

³ Wim eeriyak ina koonggo logonet, at maluk eerogo pega awuri inanggeemu maa'ngga kunik nogo waganggwi, At awuri wim eeka inayum maa'ngga amu kunik yikkologwe, Inanggweendo wim eeka mbuti owak paga eerak nogo pipuk eekwi iigak, abinak pigan-pigan eeke, Inaguda, “Nawi,” yinuk, ke'mbogonik yogwe, Eeko agaarik o.

⁴ Ndi wuninik kwak, o kimbik pindanggage menggi kwak, It inanggweendo nogo iniyogobit oone agan tu paga wogwe, Kota nggween aagome time muguren-magaren nugwi, Eeko agaarik o.

⁵ Eeko logonet, aap endagembogut nen awuri wim kalu-kalu nogo wiiramenggerak tu paga nogwe me, Iniyogobit lik togon wanggak nogwe, It mbe agan o kota-kota yugum pak wurik me time ari nanuk, Endekem nen punggagak eekak nogo waganogo pi wogwe,

⁶ Niyo mbininogo mambit nogogwam nogome tu paarogo pit nanuk, unggwit nogwe, Aap endagembogut awi o nggwok abe wurik me nogome oba kwi'nari unggwogwe,

⁷ Kwe nggwok nogo pigogo ayum nggoorogo punuk, wonok wundi nogwe, Komologwe tawe at ame ake eeka nogo, towe puume inoone nggu-nggu yogo mengga kwak yogo logonet, ineenggi paga inamiguwak wakkologwe, Eekwi iigirak o.

⁸ O Niniwe ti, niyo yenggenak eno poloninuk wungge menggi kwak, togop aret agaarik o. Pelen-pelen wundi nogwe iigak, “Puk o! Puk o!” yinuk, inoone nggwok paga yorogwe kwe, It ambi nen ina yunggunogo na'nari waga'lek wundi nogwe mban iigirak.

⁹ Togop me, o kota yi, amindik-amendek lek ageelik abe mban pugu wonage me, “Mbuti perak nogo waganggwi, mbuti emas nogo kologwe, ee'nip o,” yinuk, yorage mbaki,

¹⁰ O Niniwe amindik-amendek abe pugu nogo waganggwi, O wogo eerogo pugwi, Yarak alom kinogo nappit nogwe, Eekwi iinok, Iniki ma'nage, iniyok yandek-yandek eekwi, Inaganak wake, Inagap nggilaame nik togon eerogo piige, Eekwi iigirak o.

¹¹ Singa awi mbanak nogo yogondak ngga wonage mbakop? Singa aagalogwe yilak kuninake menggim nogo nonggop aga o? Singa ngguunok-kooli aagalogwe inom inagabiti lek yinggwi-unggwogwe eeko menggam nogo ngge o?

¹² Singa ngguunok nogo nen apuri ndonggok togon nawak nduk it noorak mendek wake, At ore kooli nen nawak nduk, nibinogo pege, Ee'nuk Wonok nonggo menggam yagabit eerogo pi unggwage, Awi mbanak me yagabit eerogo pi unggwage, Eeke menggerak nogo nonggop aga o?

¹³ At Omaawi Lombok Menggerak Aliku ALA nen it yorage logonet, “Kit an ninom wim mbanak wonage me, Kinanggweendo wim eeka nogo kani piminggirak ka'luk ndi wurogo pege, Singa awooluk kwak kinawuri wim eeka nogo wooluwak nen nawak nduk eerogo piige, Kit nen aakumi inagugun wonok kiname pi unggwagak eeko nogogutak nogo, ambinom togop eeko logokwak non mbanogo pinagage, Ndi, kinarum logorak onggo wu puwak nduk, kinawuri nen aakumi yora nagak nogo inoone lek eerogo piige, Eerigin o,” yinuk, yorage kagarak o.