Marakut 14 - Ala Wone Peenok Peebi Mbanak

Yetut wariyak kooneegwaarak wone

¹ Laago Obaga Mbo Nagagerak inom, laago Roti Piika'lek Mendek inom, lariyak eyom nogo mbere yinuk, laruwok nduk eekwi me, it Ala unde inoweewi inom, it Ala wone liiru mbanak unde inom, “At Yetut nonggop togon kote pippunuk warumun o?” yinuk, abok mbanggo logonet,

² “Aakumi wat-wat yogwe iyo, laago lakwi me nen pigoorak meek o,” yereegwaarak.

Kwe ambi nen amburu Yetut oba kilippereegerak wone

³ At Yetut o Mbetaniya aap awin aaga'ne kunik endage Timon nogo, ame kwi'na'nuk mbi nengge me, kwe ambi iri'ngga narwastu amburu obari abu abe me onggo nggwok pogo menggaarak mendek yiiwak yugum mendek mendaarak me toolak wonok unggwi wagagerak. Unggwi wage nagagerik, yiiwak yugum mendek mendaarak nogo uut kalenogo amburu anobak paga kilikkagagerak.

^4-5 Kilikkage mbareegi, it aakumi ando time wonogwe nogo nen, “Nineebi,” mba'nuk it-it yogo logonet, “Eyo amburu obari abe mendek yi, nonggop nduk aanom warogo kilikkegerak mbakop? Amburu toolak yi, wu 300 dinar paga onggo mbanogo it inamendek lek wogoroorak op kwe, eekerak yi kiraap!” yinuk, inanini nen kwe nogo mberereegwaarak.

⁶ Mberogo mbareegwa, at Yetut nen, “Obeelom lombok ee'nakerak me, nonggop nduk mberogo ogotik?

^7-8 It aap inamendek lek ti, kinom mondok logomunggup me, yi mendek ndi mendek wogoroorak mba'nuk, wogoroorak ti op aret kwe, an perak, kit ninom mondok logogin lek me, kwe yi, an ee'naburak iniki abu koombunuk ee'nakerak kagi o. An kambiminggirak ndoome mambaniyak me, awo mambanega'lek iigak, amburu obari abe mendek yi, kilippanegerak me, kwe yi, teppinip o.

⁹ Obeelom wone wonok yi awi ndi awi yoranet nugu logonet, kwe yi ee'nakerak nogo, aberak logowak nduk, yoranet nugu logogun o, yinuk, abet aret yokkirage agarik o,” yoragagerak.

Yetut waruwak nduk, onggo mbaneegerak wone

¹⁰ Yorage mbareegi, Yetut oreewi 12 mendek ambi endage Yurat Ikariyot nogo, Yetut waruwak nduk wogoraakit mbake nagagerik, it Ala unde inoweewi inowagam nagagerak.

¹¹ Inowagam nage nagagerik, yorage mbareegi, it nogo iniki ale'nggen mbako logonet, “Onggo wokkirugun o,” yogo mbareegwa, “O ngge eyom paga eebe pigogo wogoroorak nanonggwan age kaamun?” yinuk, tokkage nagagerak.

Laago Obaga Mbo Nagagerak lareegwaarak wone

¹² Laago Roti Piika'lek Mendek lappunuk, ne aa'nduk nonggo logonet, laago Obaga Mbo Nagagerak lariyak ndomba wako nogogwaarak me, at Yetut oone waganggwi nogo nen at yogo logonet, “Yetut wae. Kabugo laago Obaga Mbo Nagagerak noorak nggeeme pipuk eerogo pagagwi a nawi o?”

¹³ Yogo mbareegwa, at oone waganggwi mbere nappiige logonet, “Kit o kota time unggwogo logomonggotik, aap ambi yugum yiiwak yi toolak wonok nage kinom lambunggo logomonggotik, kinom aret nanu o.

¹⁴ At oome time unggwi nage kenok, aap o time unde nogo yogo logonet, At ninogoba Ngguru nen, An noone waganggwi nogo ninom laago Obaga Mbo Nagagerak noorak nduk, o ko ogoorak nggeeme punogo panegerak o, yinuk, yegerak, yo'nu o.

¹⁵ Yogwi kiinok, tilaabaga ko nggwok ogoorak ogobakkigirik ambi ndigik-ndegek aago wonage yokkirage kenok, time aret nit abok ninake larogo pinanogo logonu o,” yinuk, nappiyareegerak.

¹⁶ Nappiyareegerak nogo nogogwaarik, o kota time unggwi nanuk, Yetut nen it yoragagerak nogo ndak-ndak aret age kogo nogogwaarik, time aret laago Obaga Mbo Nagagerak nogo larogo pereegwaarak.

¹⁷ Larogo pogo nogogwaarik, wonogwe me, o kiip age mbareegi, at Yetut awuri 12 nogo inom nogogwaarak.

¹⁸ Nogo nogogwaarik, kwi'na'nuk, mbi nonggo logonet, at Yetut nen, “Kit an ninom mbi nunggwi yi, ambi nen nooruwak nduk aakumi yoraagin kagi o, yinuk, abet aret yokkiragi o.”

¹⁹ Yorage mbareegi, it iniki maluk age nagagerik, ambi nen yogak, ambi nen yogak eeko logonet, “An aret me, yagan ilik?”

²⁰ Yogo mbareegwa, at nogo nen, “Kit nawuri 12 yi, ambi roti ninom tenggap ambit paga tamonogo nunggwi ti, at aret o.

²¹ An aap aret nda'nagagirak nogo, an eeriminggirak nabok wone liiru mbaneegerak nogo ndak-ndak aret arigin kwe, at nooruwak nduk aakumi yoraagin ti perak, abuwa o! Eebe nda'nariyak lek mendek, nda'nagagerak o,” yinuk, yoragagerak.

Mbi amburu noorak mamuniragagerak wone

²² Yorage nagagerik, mbi nonggo logonet, at Yetut nen roti eenggim wagangge nagagerik, “Nogoba Ala wa,” yinuk, roti karerogo at oone waganggwi nogo wogorage logonet, “Roti yi, an neebe aret me, wanip o.”

²³ Yorage nagagerik, amburu niyowa'na toolak nogo eenggim wagangge nagagerik, “Nogoba Ala wa,” yinuk, wogorage mbareegi, it abok aret nunggugwaarak.

²⁴ Nonggo mbareegwa, Yetut nen it yorage logonet, “Ala kinom lambumbinagarak wone abok yokkirage yi, kit abet mbarubagip nduk, kit aakumi ambik kinake namiya kilirik yi aret o.

²⁵ An o yogondak kuli paga nen nok, peebi Ala abu'me piige menggim logonet, anggur amburu ngget mendek noorak nogo eyom ari waga'lek kagak, anggur amburu yi, an nengga'lek aret logogin o, yinuk, abet aret yokkiragi o,” yoragagerak.

²⁶ Yorage nagagerik, ndawi wappunuk, wundi nogo nogogwaarik, puurom Tayitun paga lagi nogogwaarak.

“Yetut neenggo'lek, yumunggun,” yoreegerak wone

²⁷ Lagi nogo nogogwaarik, at Yetut nen it yorage logonet, “An nen aap ndomba ndegeninaka wake neenok, Ndomba nogo kole ma'narugun o, yinuk, Ala nen yereegerak liiru mbanak me, kit abok aret, Aap ti, nineenggo'lek o, yinuk, teppaninuk aret mbaganumunggup kwe,

²⁸ an neenik agago mippanege kenok perak, kit naga'lek kiigak an naa'nduk o Nggalileya time nagin o.”

²⁹ Yorage mbareegi, at Peterut nogo nen, “Lek o. It abok aret, Yetut nineenggo'lek o, yinuk, teppaganuk mbaganggwi iigak kwe, an nalik perak, teppaganuk mbaganigin mondok lek o.”

³⁰ Yoge mbareegi, at Yetut nen, “Yogondak oonikiya yi paga aret ayam oone ne mbere paga yikit nduk eeke kagak, kat ne kenagan paga, Yetut ti, an neenggo'lek, yumunggun o, yinuk, abet aret yokkege agarik o.”

³¹ Yoreegerak kwe at Peterut nen, “Lek o. Kat nimbirak kambuurak kenok, kambuurak aret me, Yetut neenggo'lek ti perak, an yigin abu lek o,” yinuk, oone omaawi aret yoge mbareegi, it abok nen togop mban aret yoreegwaarak.

Yetut o Nggetemani logonet tamban eereegerak wone

³² Ti'nuk, o endage Nggetemani nogogwaarak. Nogo nogogwaarik, Yetut nen at oone waganggwi nogo yorage logonet, “An tamban eeri nage me, kit yime logonip o.”

³³ Yorage nagagerik, Peterut togon, Yakobut togon, Yaya togon, wogoren nage nagagerik, at nogo nen agabiti ambik age nagagerik, iniki aaninggin lombok agagerak.

³⁴ Age nagagerik, it yorage logonet, “Wologo wae. An niniki puru ari logonet, kambuurak ee'nake me, kit yime logonet, tum wako logonip o.”

³⁵ Yoraanuk, nirurogon nage nagagerik, enete wanduk nggween paga ngginna'nuk at ndi eyom paga eeppuurak Ala nen kooneegerak nogo, “Eeriyak lek,” mbakerak kero, ogoba Ala yoge logonet,

³⁶ “Ai, nogoba. Kat yi mendek ndi mendek abok eeriyak op mban me, ee'naburak amburu toolak an porogo wonage yi, wamen o. An niniki mbake eerigin ti lek o. Kat kiniki mbake aret eeriyak o,” yinuk, tamban eereegerak.

³⁷ Tamban eeppunuk, iyokan at oone waganggwi nogo inowagam wa'nuk, nogo yugwi iige nagagerik, Peterut yoge logonet, “Peterut wae. Kat nogo yege agandik ya? We ne ambiriluk ninom tum wako logorak meek kenok, nogo yege agandik ya?

³⁸ Niniki nen obeelom eeriyak mbakwi kwe, nineebe nen eeriyak meek ee'ninake menggerak me, maluk eeriyak kiniki nggagani wage kero, tum wako logonet, tamban mban eeko logonip o,” yinuk, yoreegerak.

³⁹ Yoge nagagerik, aa'nduk tamban eeri nagagerak nogo mendek aret eeri nagagerak.

⁴⁰ Tamban eeppunuk, iyok paga wage nagagerik, it nogo, nogo yuurak eeginabeegerak me, nogo yugwi enegen iige kenok it nen, “Nonggop yoruwi?” yinuk, puk ogogwaarak.

⁴¹ Puk ogo mbareegwa, ne mbere paga yora wagagerak me, ti'nuk, peebi ne ambi paga wage nagagerik, yorage logonet, “Kit yonggonggologo logonet, nogo mban aret yogo logorak mbako ogotik ya? It maluk eeko menggaarak nen an aap aret nda'nagagirak nogo neebe nooruwak nduk wogoroorak eyom abu panggo yi wagaarak me, abu aret o.

⁴² At neebe nooruwak nduk nonggo nggerenggerak nogo abu koorok wage yi aret me, nawok nduk mi'na'nip o,” yoragagerak.

Yetut pigaganeegwaarak wone

⁴³ Awo yorage me, it Ala unde inoweewi inom, Ala wone liiru mbanak unde inom, aap inanggok inom, it nogo nen aap ambi aago paloowi waganggwi, yawi mbanak waganggwi, ee'nuk, nappiyareegwaarak nogo, it 12 mendek ambi Yurat nogo inom aret nogogwaarak.

⁴⁴ At Yetut eebe waruwak nduk onggo nggereneegerak nogo nen aa'nduk inom wone mbanggo logonet, “Yelok kaabagip nduk, an aap ambi kambugege neenok, Aap nogo ti aret, mba'nuk, piganok liirogon wonok nanu o,” yinuk, wone mbaneegwaarak me,

⁴⁵ at nogo nok-nok Yetut owagam nage nagagerik, “Nogoba Ngguru wa,” yinuk, kambugereegerak.

⁴⁶ Kambugege mbareegi, it nogo nen kok aret pigaganeegwaarak.

⁴⁷ Pigaganggo mbareegwa, aap time ugun wonogogwaarak nogo ambi nen paloowi nggigik togon agago aap Ala unde inowe nggwok ayeloman nogo aruk tabok togon nappereegerak.

⁴⁸ Tabok togon nappege mbareegi, at Yetut nen, “An yogoot wagangga me, pi'naburak nduk tege wooluwak inom, yawi mbanak inom, wonok wogotak ya?

⁴⁹ Ko'lu-kii'me ninom Ala awi wurik me mamunggirage neegak, pi'naka'lek wonogotak kwe, Ala wone liiru mbanak nogo a'me lik yuwak nduk pi'nabi wogotak me, op aret o,” yorage mbareegi,

⁵⁰ at oone waganggwi nogo abok aret at teppunuk, kole mbaganeegwaarak.

⁵¹ Kole mbaganit nogwe iigak, wulaga tawe ambi Yetut inom nagagerak nogo ambogoyum obate paga mban perenak me kok pigaganggo mbareegwa,

⁵² ambogoyum nggorok togon eerogo mbo punuk, we agap mbelanak aret kole mbaganeegerak.

Yetut owak looneegwaarak wone

⁵³ At oone waganggwi nogo mbaganggwi iigak, Yetut piganok, at aap Ala unde inowe nggwok nogo owagam nogo mbareegwa, it Ala unde inoweewi inom, it aap inanggok inom, aap Ala wone liiru mbanak unde inom, it abok aret at owagam kuwak ari nogogwaarak.

⁵⁴ At Yetut nogo wonok nogwe iigak, Peterut nogo ambokan yanabek nage nagagerik, at aap Ala unde inowe nggwok nogo awoore'nggam nok-nok unggwi nagagerak. Unggwi nage nagagerik, at aap nggwok nogo awuri inom kwi'na'nuk, kani kunik me togwi worakkolage wonage me,

⁵⁵ it Ala unde inoweewi inom, it wone amburu mbanggo menggaarak abok inom, kuwak aago wonogo logonet, “At Yetut waruwok nduk, at eekerak alom ta nen liippegendak o?” yoragagerak mendek, lek aret kogogwaarak.

⁵⁶ It aap ambik nogo nen pilit wone oba lenggeneegwaarak kwe, it ambi nen wone alom liirogon ambi yorulik we naalop-kaalop eerogo pereegwaarak.

⁵⁷ Ti'nuk, it ando nogo mi'nogo nogogwaarik, pilit aret oba lenggenogo pogo logonet,

⁵⁸ “At nen, Aakumi nen Ala awi ineenggi paga wureegwaarak yi, an minogo punuk, obaane'me aap ineenggi paga wuriyak meek nogo mendek ambi wuke neegak, nogo mbere yigin, yegerak, konenggoorak o,”

⁵⁹ yinuk, yereegwaarak kwe, wone ti kunduk, alom ambi liirogon yorulik eereegwaarak.

⁶⁰ Wone ambi liirogon yoga'lek aret eeko mbareegwa, at aap Ala unde inowe nggwok nogo inenggela'me oolo mi'nage nagagerik, Yetut yoge logonet, “Wone yagandak konenggaarak yi nen koba lenggenogo pagagwi me, kat wone onggo ambi yoraamunggun ilik, lek a?”

⁶¹ Yoreegerak kwe, at Yetut wone onggo ambi yaga'lek puk aret wonagagerak. Puk aret wonage mbareegi, at aap Ala unde inowe nggwok nogo nen, “Nit alut eeko monggoorak aput Ala nen leenogo pereegerak Mesias nogo, kat aret ilik?” yinuk, kin wokkagagerak.

⁶² Kin wokkage mbareegi, at Yetut nen, “Yagandak nogo ti, an aret o. An aap aret nda'nagagirak nogo, peebi at Omaawi Lombok Menggerak eenggi abe'nggan kwi'ndak wonage logominggirik, ti'nuk, mbogut paga nen ndugwi enggela'me wambi wage neyaamunggup o.”

⁶³ Yoge mbareegi, at aap Ala unde inowe nggwok nogo at ayum mondok nggoguk togon eerogo nappege logonet, “At nonggop yuwak nduk ambinom nabenak mban kin wokkenet unggwogo ogoorik?

⁶⁴ At Ala miyuk-meya eerogo pege yi, muk kinaruk konenggotak me, nonggop eeriyak mbakop?” Yorage mbareegi, it abok nen, “Mondok wariyak aret o,” yereegwaarak.

⁶⁵ Yogo nogogwaarik, it ando nogo nen woori oba lenggenggogwe, enegen nobappunuk ineenggi lingginik paga wakwi, eeko logonet, “Ta nen kooke kagan? Yu nda!” yinuk, yogo mbareegwa, it aap Ala unde inowe nggwok ayeloman mini nogo nen kunduk, ineenggi telak paga wareegwaarak.

“Yetut ti, an neenggo'lek,” yereegerak wone

⁶⁶ Wakwi iigak, at Peterut nogo oore'nggam kogona time wonage me, kolaga aap Ala unde inowe nggwok nogo ayeloman ambi wage nagagerik,

⁶⁷ at Peterut togwi worakkolage enegen kage nagagerik, looge logonet, “Kat kunduk, Yetut Nataret mendek kimbirak menggendak nogo aret keegi o.”

⁶⁸ Yoreegerak kwe, at Peterut nogo nen, “Kat yagandak ti, an abu neenggo'lek kobak o,” yinuk, wundi nanuk tu nda'nggi paga ari nagagerak.

⁶⁹ Ari nagagerak wonage me, kolaga nogo enegen kage nagagerik, it aakumi ugun wonogogwaarak nogo yorage logonet, “Lek o. At aap ti, at awuri nogo mendek aret o.”

⁷⁰ Yorage mbareegi, Peterut nogo nen ambinom ari logonet, “An lek ubi.” Ari mbareegi, ti'nuk, it Peterut inom taati ugun wonogogwaarak nogo nen Peterut yogo logonet, “Kat Nggalileya mendek me, it mendek abet aret keego o.”

⁷¹ Yogo mbareegwa, at nogo nen, “Aap yogotak ti, an neenggo'lek me, nombo owak o!” yinuk, ombo owak awo mbangge kagak,

⁷² ayam oone ne mbere paga yereegerak. Ari mbareegi, at Peterut nogo, “Ayam oone ne mbere paga yaga'lek kagak, kat nen ne kenagan paga, Yetut an neenggo'lek, yumunggun o,” yinuk, Yetut nen at yoreegerak nogo iniki abe'nage mbareegi, iniki puru ari logonet, le yereegerak.