Leendawi 1 - Ala Wone Peenok Peebi Mbanak

LEENDAWI WONE

O Yerutalem maluk eerogo pugwi iinok, le yereegerak wone

¹ O kota ti, aa'nduk aakumi ambik inale'nggen nen noone-koone agan nogo nogogwaarak kwe, Yogondak perak, yi oone ndi oone lek agaarak ti, iya! O aa'nduk nen yi aakumi ndi aakumi inenggela'me abu tiyanak wonagagerak kwe, Yogondak kwe nanu pugu kwak aret wonage, Aa'nduk yi kota ndi kota enggela'me kwe nggwok kwak aret wonagagerak kwe, Yogondak perak, aakumi inayeloman kwak agaarak wonage, Eerak aret agaarik o.

² Oonikiya iniki wakkolage logonet, leenggu maake, Ale amburu agandin paga yanggunik-ngganggunik eerogo wurabit wage, Eeke agaarik o. At inom iniki kunik ambi nen at iniki eyak wappega'lek aret wonogwe, At oreewi abok nen, “Nore aret o,” yogwi kwe, ineebi ombako logonet, inom ogookkologwe, Eeko agaarik o.

³ At Yekura aaninggin-paaninggin oba pugwi, Yabu nggwiirit-nggwaarit eeke logowak nduk, inoone omaawi paga at yogwi, Eeppunuk, wonok o nda time mbo pi nogogwaarak o. At yi aakumi ndi aakumi inenggela'me logonet, iniki ugun tayenak wonage lek aret o. Aaninggin oba agaarak paga yagan wake kagak, it aap at mugurok nugwi nen tebenogo pereegwaarak wonage agaarik o.

⁴ Inale'nggen paga laago nggwok lariyak koonak nogo lari waga'lek iinok, o Tiyon nogo menggam tu nogo nen le ari, O Tiyon tu unggwi wogo menggam abok aret aakumi nebek lek iinok, it aap Ala unde o time eekwi nogo nen, “Nonggop eeruwi o?” yinuk, iniki piirik wonogwe, At aagalogwe komologwe tawe nen iniki wakkologwe, At kunduk, iniki andi eerogo pake, Eeko agaarik o.

⁵ At inom ogoorak nogo ogobamini negen agaarak wonogwe me, iniki ale'nggen mbako agaarik o. At maluk eerit nage nagagerak paga Aliku ALA nen iniki wakkolaawak nduk, eerogo pereegerak o. At inom ogoorak nen aagalogwe keele maarogo inaa'nduk piinok, wogoren o nda time mbo piya nogogwaarak wonogo agaarik o.

⁶ O Tiyon Aagalukwe endage tiyanak, “Wi!” ugwi nogo, abok aret lek age, At arum waka oweewi nagawan-nagawan ti, rusa iri'ngga noorak lek kenok, noolik me, Aap wariyak mugurok nage kenok, eebe ndeyak kagak kole mbagangge menggi kwak togop aret ogwe, Eerak aret agaarik o.

⁷ O kota Yerutalem nogo aaninggin-paaninggin oba kwi'nage, andi nen yagan wake, eeke ti eyom paga O maan aa'nduk amendek obeelom mban iniki kundugu wonagagerak nogo iniki abe'nage menggerak o. Aagalogwe awim ineenggime agagerak me, it ambi nen at yeenggwaaga'lek aret wonogogwaarak o. At yigirik-noonom eerak awim nen inigen kenok, agi'ndok kanggo nogogwaarak.

⁸ O kota Yerutalem ti, maluk lombok eerit nage nagagerak me, ogole warak aret wonage agaarik o. Aa'nduk at ayuk wuko nogogwaarak abok aret nogo nen agap mbelanak wonage inigen kenok, meek eerogo pugwi, Ndi, at kunduk, “Nonggop agi?” yinuk, enggali nen ena ambokan na'nagik wonage, Eeko agaarik o.

⁹ Omaluk nogo ayum irip paga lenggenak wonage, “Peebi ndogop eeppaniyak,” iniki liippega'lek wonage, Eereegerak me, At tebenogo pereegwaarak nogo ti, mondok iya aret o! It ambi nen iniki eyak wappega'lek aret wonogogwaarak me, “Kaliku ALA wae. Nawim ineegin tiyak yegerak paga eerogo panugwi yi, kenegen pe'neyet o,” yinuk, yoge agaarik o.

¹⁰ Awim nen amendek obeelom iniki kundugu nogo waganeegwaarak o. Kaliku ALA nen, “Nawi wurik abu leenak nogome aakumi ugun ungguurak lek an napuri nen mban unggwi nogo logorak,” yereegindak kagak, Yi aakumi ndi aakumi endekem mendek nen unggwi nogwe enegen iyareegerak o.

¹¹ At aagalogwe time menggaarak abok nen mbi kwaarit nugu logonet, “Ai-ao,” yogwe, Kangga'lek ineenik logowok nduk inamendek onggo iya mendek paga mbi kunggologwe, Eeko agaarik o. Eekwi me, “Kaliku ALA wae. Aakumi nen, Ogole o, yinuk, yo'nugwi yi, kenegen pe'neege, liippanege, Eeke logot o.” Yinuk, yoge agaarik o.

O Yerutalem ai-ao ari nagagerak wone

¹² “Kit aakumi tu an paga wogwe yi wae. An noba agaarak yi, meek aret nombako ogotik ya? At Aliku ALA anini kani kunik negen eeppaniyak eyom agaarak paga eeppanege kenok, yagan wake yi, It ambi nen it ambi eeppiigwi iigak, yagan wakwi ti kwak ambi wonogwe ilik, lek a? Wonogwe iyo, kinaagan-ambokan time pegiinet nugu logonet, liippiinet nugu logonip o.

¹³ Agi nen kani wuppi wagaarak paga nowak enoona nenet unggwage, Niyok yiluk yuwak nduk, towe pigagangga yum yugu nenaame mbiganogo nappi wage mbaki, nakom niruk ari, Mbo paneegerak nalik logonet, o kubondendok nen nok, oonikiya niniki lek ee'nake, Eeke agaarik o.

¹⁴ An maluk noba luurik wonage nogo, Aliku ALA nen ambit lambunogo keele maarogo pege, Eyo aaninggin tapi uut paga pugu kwak, eerogo pege, Eeke nagagerik, Nuut paga kwippaneegerak wonok nege logonet, nomaawi lek aret aga o. An neebe waganogo it an nen tebenogo piyoorak meek nogo mendek ineenggime paneegerak o.

¹⁵ Nogoba nen it aap an nawuri wim eeka ninom minggirak abok aret mbo piige, An tebenogo panugo logonet, naagalogwe aap tawe lek eerogo piyaawak nduk, nawim yonggo piige, Aakumi nen anggur amburu aambiranggo mengga kwak, nogoba Ala nen o Yekura Aagalukwe Aap Kigin Waka'lek an nogo iyok aan lebenogo panege, Eereegerak o.

¹⁶ Togop aret me, nale yikkolage, Nale amburu niyo negen wambit wage, Eeke agaarik o. An niniki eyak wappanega ambi ninom wonage, Niniki teeluk eerogo panega ambi koorok wonage, Eerak lek aret o. An nawim nogo inomaawi ambik lombok me, naagalogwe inamindik-inamendek mondok lek agagerak wonogo agaarik o,” Yinuk, ari agaarik o.

¹⁷ “Yeenggwa niruwak o,” yinuk, o Tiyon nen eenggi ndek ari kwe, it ambi nen at iniki eyak wappega'lek aret agaarik o. It Yakup paga wiganak inom koorok wonogwe nogo nen, inom ogookkolaawak nduk, Aliku ALA nen wone lengganogo yoragagerak me, “Kota Yerutalem ninenggela'me wonage ti, ogole warak aret o,” yinuk, yogo agaarik o.

¹⁸ “At Aliku ALA ti, obeelom lombok wonage kagak, an nen at eeriyak yo'nereegerak nogo taganogo pereegirak me, Kit yi aakumi ndi aakumi abok yi wae! An naagalogwe komologwe inom, wologwe tawe inom, keele maageren mbo piya nogogwaarak kenok, Niniki andi negen wonage yi, liippanugwi, Noone yokkirage yi, kinaruk konenggwi, Eeko logonip o.

¹⁹ An ninom kunik nogo nen yeenggwa niruwak nduk, wiiragagirak kwe, E o, E o, mban yo'nugwi, It aap Ala unde narum wonaga inom, it aap noweewi inom, ineenik logowok nduk, inambi kwaakko'net nugu logonet, O kota yime abok aret kambit nogwe, Eereegwaarak o.

²⁰ Kaliku ALA wae. Niniki abu piirik wonage yi, pe'neyet o. Niniki andi negen ee'nabit unggwage, Eeriyak yo'nege nogo, neebi mbakak eeke nagagirak paga niniki yi koonggak ndi koonggak eeke, Eeke agarik o. Endekem nen wooluwak paga inookwi, Ndi, akem nen kugilingga paga kanggwi, Eeko agaarik o.

²¹ An nen, Ai-ao, ari nogo, aakumi inaruk konenggwi kwe, it ambi nen niniki eyak wappanega'lek aret agaarik o. An noba agaarak nogo, nawim abok aret nen nabok konenggo nagaarik, kat eerogo paneegindak paga inale'nggen mbakwi me, An aago wonage kwak it ndak-ndak aago logowak nduk, eeppiyoorak yoragagindak nogo mbet-mbet eeppiya mok o.

²² It maluk eerit nogo nogogwaarak abok aret kat abeke, Ndi, an maluk eeke paga eeppaneegindak ndak-ndak it togop aret eeppiige, Eeke logot o. Niniki andi negen logonet, ai-ao ari, Niniki lek-lek ee'nabit unggwage, Eeke kenok yokkigi o,” Yinuk, yoreegerak.