Etet 2 - Ala Wone Peenok Peebi Mbanak

Etet kwe nggwok mippereegerak wone

¹ Ti'nuk peebi, aap Akatiwerot anini mbake nagagerak nogo tayok ari mbareegi, at kwe Wati eereegerak paga wone lengganogo wumbereegerak nogo iniki nggilu ari nagagerak.

² Iniki nggilu ari mban mbareegi, at ake eeko menggaarak nen at endagembogut Akatiwerot nogo yogo logonet, “Kat ninogoba kendagembogut kake kumi tawe abu kigirikwe aap kigin waka'lek kenok, kwaakkiri nawok nduk yo'niret o.

³ Kat kabu'me piige menggenom yi o ndi o abok aret it kinom eeko menggaarak nen kumi tawe abu kigirikwe kero, wogoret kumi tawe wonogo menggam kawi o nggwok abe wurik me o Tutan yime piya woraawak nduk, mippiinet namunggun o. Mippiyamenggendak nogo nen kumi tawe kwaarogo wogoren piya wogwe iinok, aap ooli wogo kawot Kegayi kumi inarum menggerak nogo nen ndegeninake logonet, ineebe kigirikwe aruwak nduk, amburu obari abe mendek eeppiige logowak o.

⁴ Eeppiyamenggerak paga kolaga ambi kat kendagembogut kinikilom mbake keenok, Wati obaane'me kakwe kwe nggwok aret aruwak o,” yinuk, yogo mbareegwa, aap endagembogut nogo nen, “Wone ti, op aret kagi,” mbake nagagerik, ndak-ndak aret eereegerak.

⁵ Ndi, aap Yakuri anebunu Mbeniyamin mendek Kiti nen Timeyi ndake, Timeyi nen Yayit ndake, eereegwaarak me, at Yayit aput Morekayi nogo ne ti eyom paga aap endagembogut awi o nggwok abe wurik o Tutan time wonagagerak.

⁶ At Morekayi nogo it aap o Mbaben mendek inowe endagembogut Nebukanetat nen o Yerutalem tebenogo piinok, aakumi Yekura mendek inowe endagembogut Yoyakin aakumi apit inom keele maageren o Mbaben piya nage logonet, Morekayi inom, pi nagagerak.

⁷ At Morekayi ogobaluk apuluk kolaga endage Karata nogo agalo-ogoba kambeegwaarak me, at Morekayi nen tawe eereegerak. Kolaga Karata endage ambi, Etet, yogo nogogwaarak nogo enete-eebe abu amuni mbanak kigirikwe me, agalo-ogoba kanggo mbareegwa, at Morekayi nen apuluk negen eeppunuk, tawe eereegerak.

⁸ Ndi, aap endagembogut Akatiwerot nen wone lengganogo wumbereegerak nogo yi o ndi o yorenet nogo mbareegwa, kumi tawe apit aret wogoren aap endagembogut awi o nggwok abe wurik o Tutan piya wogo nogogwaarik, aap Kegayi nen ndegeninake logowak nduk, wogogwi, ndi, kwe tawe Etet kunduk, wonok aap endagembogut awi o nggwok abe wurik me, aap kumi tawe inarum menggerak Kegayi nogo nen unde logowak nduk, wogogwi, eereegwaarak.

⁹ Eeko mbareegwa, at Kegayi nen kwe tawe Etet nogo, abu kigirikwe togon kage nagagerik, iniki kunik eeke logonet, mbet-mbet aret enete-eebe obeelom aruwak nduk, amburu obari abe mendek eeppegak yuurak inom, mbi abe mendek wogogak yuurak inom, koonogo pege, ndi, kumi tawe aap endagembogut awi o nggwok abe wurik me eeko menggaarak inenggela'me nen kumi tawe ineebe 7 leenogo piinok, at Etet ndegenggo logowok nduk, kumi tawe wonogo menggam ko ambi abu obeelom me time inom piya nage, eereegerak.

¹⁰ At Morekayi nen Etet aruk pi'ngget wake logonet, “An kwe ndi mendek o. Ndi, nogobamini aap ndogop mendek nen nda'nabeegwaarak o, yinuk, yoroorak mage o,” yoreegerak me, “An kwe ndogop mendek,” yoraga'lek aret wonagagerak.

¹¹ Yoraga'lek aret time wonage kagak, at Morekayi nen, “Etet eebe nonggop wonage kaamun? Ndi, nonggop eeppugwi iyaamun?” yinuk, ko'lu-kii'me kumi tawe wonogo menggam yagat endekem nen enegen mangga nagak mban eeke nagagerak.

¹² It kumi tawe nogo aap endagembogut Akatiwerot wonage me ungguwok nduk, inete-ineebe obeelom aruwak nen tut 1 nen nok 12 penenak paga eeppiigo logorak wone yugu nogo ndak-ndak eeppiigo logonet, eyo mbit amburu netik-netak eeppiigwi iigak, tut 6 penengge, ti'nuk, obari abe eeka amburu inoba mbenanogo piigwi iigak, tut 6 penengge, eeppunuk, aap endagembogut wonage me, ambi ka unggwagak eeko nogogwaarak.

¹³ Ka unggwagak eekwi ti eyom paga it kumi tawe nogo nen, “Ndi mendek yirippunuk, ka ungguurak me, wo'ninip o,” yorogwe nogo it kumi tawe wonogo menggam nogome nen wogorogwe iinok,

¹⁴ o kiyoma aap endagembogut wonage me unggwi nogo nagaatik, o weege kenok, iniyokan wundi woraanuk, o alik aap endagembogut akuwi luulu wogo wonogo menggam aap endagembogut awot ooli wogo Taatagat arum wonage me, nogo nagaatik, wonogwe me, aap endagembogut nen, “At ti, woraayok o,” yinuk, endage kunogo ari kenok mban ka unggwogo nogogwaarak. Ndi, lek kenok, ka unggwogo logolik.

¹⁵ Togop eekwi wonogwe me, at Morekayi ogobaluk Abikayin apuluk at Morekayi apuluk negen eekko'nok tawe eereegerak Etet nogo, aap endagembogut wonage me noorak eyom panggoni wage mbareegi, at Etet nen, “Ndi mendek eeppanu,” yoga'lek kagak, it kumi tawe wonogo menggam arum menggerak aap Kegayi nen Etet yoreegerak nogo ndak-ndak aret yum yirike mbareegi, it aakumi apit nen inigen kogo nogogwaarik, kwe tawe ti, iniki kundugu eekkologogwaarak.

¹⁶ Ndi, at Akatiwerot nogo inowe endagembogut a'nuk wone lengganogo yorage kagak, tahun 6 eeppunuk, ambi eeke tut 10 endage Tebet penenak paga at kolaga Etet nogo wonok aap endagembogut awi o nggwok abe wurik me pi nogogwaarak.

¹⁷ Pi nogo mbareegwa, it kumi eegu nogo iigak kwe, at Etet nogo perak, aap endagembogut inikilom nggwok mbake, ndi, kumi tawe aap kigin waka'lek eegu iigak, at Etet mban abuwa mba'nuk, iniki kunik eeke, eeke nagagerik, “Nendagembogut nakwe kwe nggwok aret logowak o,” yinuk, kwe Wati obaane'me mippunuk, nggare-nggare mendaarak negen anobak paga yippereegerak.

¹⁸ Yippege nagagerik, aap endagembogut Akatiwerot nogo nen Etet kolagagerak ale'nggen nen it aap inengga warak inoweewi inom, at inom eeko menggaarak inom, inake laago nggwok lake, “An nabu'me minggim yi o ndi o yonggonggo'net nogo logonip o,” yinuk, wone eerogo nagabit nage, ndi, it aap inendagembogut inale'nggen nen inamindik-inamendek tumburirogo mengga kwak at amindik-amendek tumburirage, eereegerak.

Morekayi nogo, “Aap endagembogut wariyak,” yogwe aruk koneneegerak wone

¹⁹ It kumi tawe aap kigin wogonaka'lek mendek ne ambinom kuwak eerogo piya wogogwaarak eyom paga, at Morekayi nogo aap endagembogut awi o nggwok abe wurik me tu unggwogo menggam at inom arum logowak nduk, mippereegerak.

²⁰ At Morekayi nen Etet tawe eeke logonet, yoge aruk konok eeke nagagerak nogo ndak-ndak, “An kwe ndi mendek o. Ndi, nogobamini aap ndogop mendek nen nda'nabeegwaarak o, yinuk, yoroorak mage o,” yoreegerak nogo ndak-ndak yoraga'lek aret wonagagerak.

²¹ At Morekayi nogo aap endagembogut awi o nggwok abe wurik tu unggwogo menggam eyabu eeke wonage kagak, it aap endagembogut ake eeko logonet, tu unggwogo menggam arum wonogwe aap Mbigatan, Terek imbirak inanini nen aap endagembogut Akatiwerot nogo wariyak wone mbaneegwaarak.

²² It iniki ambit a'nuk, wone mbanggwi nogo, at Morekayi eenu age nagagerik, wone nogo at kwe nggwok Etet yoge mbareegi, Etet nen aap endagembogut yoge logonet, “Kat kooriyak yogwe nogo at Morekayi nen konenggerak kenok, yokkiri wagi o,” yoreegerak.

²³ Yoge mbareegi, wone ti, alom kwaake nagagerik, abet aret mbareegi, it aap ineebe mbere nogo inenggaanok keele yilinogo eyo paga tugumbiyareegwaarak. Ti eereegwaarak nogo abok aret aap endagembogut Akatiwerot enegen kagak it aap inendagembogut eeko menggaarak liiru mbanogo pugwi nogome inom liiru mbanogo pereegwaarak.