Ayup 35 - Ala Wone Peenok Peebi Mbanak

At Eliku nen ambinom Ayup yoreegerak wone

¹ Yoge nagagerik, Eliku nen Ayup ambinom yoge,

² “Kat nen ari logonet, Ala nen, An aap maluk eeka'lek neege agaarik o, Yinuk, ari menggendak nogo ti, Op aret ari agarik, mbake agandik?

³ Ndi, kat nen Ala ambi yoge logonet, An maluk eeka'lek logorak kenok, kat nano eekkolage, Ndi, an kunduk nonggop eekkolage, Eeko logorak o, yinuk, Yoge nogo ti, op mbake agandik?

⁴ Kat ari ti, an nen onggo yokkege, Koreewi kinom wonogwe nogo inom yorage, Eerikit o.

⁵ Kena mbogut paga ni'na'nuk kenegen pekkage, Ndugwi kat kirimbaga tiyarogon wonage nogo malik-malok eerogo pege, Eeru o.

⁶ Kat maluk eeke kenok, Ala nonggop eerogo pege, Maluk ambik eerit nage ti paga Ala nano eeppege,

⁷ Ndi, abe koonak mban eeke paga kunduk at nano obeelom eeppege, At nano eekkolaawak nduk eeppege, Eeriyak mbaken?

⁸ Lek aret me, kat maluk eerit nage nogo ti, It aap kat kokwak mban maluk eeppiige, Ndi, kat abe koonak mban eerit nage nogo ti, Aakumi inapuri aret obeelom eeppiinet nage, Eeke menggendak o.

⁹ Aakumi aaninggin inoba agaatak logonet, inoone, Ai ao, yogwe, Aap ineenggi omaawi paga tebenogo pinanggwi yi, Yeenggwa niraanip ubi, yinuk, yoranet unggwogwe, Eekwi kwe,

^10-11 At ogobakkigirogo piige, Oonikiya pogom aaninggin inoba wonage kagak ndawi wako logowak nduk, eeppiige, Ndiimbu-nggwiya paga wakkagak mamunirage, Towe-pagi paga wakkagak ineenu eeppiige, Eeke menggerak, Ninogoba Ala ngge o? Yinuk, it ambi nen yaga'lek aret agaarik o.

¹² It inoone, Ai ao, yogwe nogo ti, Aap maluk eeka wogoppako logonet yogwe me, Inoone Ala konengga'lek aret agaarik o.

¹³ At aret konenuwak o, yinuk, yogwe lek inoone we ugun, Ai ao, yogwe me, Ala aruk konengge, At Omaawi Lombok Menggerak nen liippiige, Eerigin lek abet aret mbake logot o.

^14-16 Togop aret me, Kat nen, Ala eeke an kaga'lek aret, ari, Nawone mbanuwak o, yinuk, yogirak naana'le mbanigin me, tokkage agaarik o, ari, Ndi, ambi, It aap maluk eeka nogo at Ala liippiige, Anini mbake logonet maluk onggo eeppiige, Eekeelik o, yinuk, ari, Eeke menggendak ti paga Ala nen kat ari liippagarak mbaken? Abunuk koone konengga'lek mbo pagage logonet, At Ayup, Ai ao, ari ti, we aanom warogo ari, At eenggo'lek logonet, oone ambik agan nage, Eeke agaarik o, Yinuk, yokkirigin mbake logot o,” yinuk, yoreegerak.