Ayup 23 - Ala Wone Peenok Peebi Mbanak

Ayup nen wone onggo Elipat yoreegerak wone

¹ Yoge mbareegi, Ayup nen wone onggo at Elipat yoge logonet,

² “Ti yagandak kwe, O yogondak ee'nabit unggwage an neebi lombok mbake yi, Niniki andi eerogo panege me, Neebi, lombok mbake agarik o. Andi nen niniki oone ari neegak kwe, Ala nen eeppanegak mban eeke agaarik o.

³ At wonage menggim neenu nen kwaari nage, At wonage me tu noorak neenu nen nimbirak lambuni nage, Eerikit lak, Ao, mbake agarik o.

⁴ Neenu ee'netak nen At owagam ka nage logominggirik, nawone nogo enggaanom paga paganogo yoge, Ndogop kagak eeppanege agandik o, yinuk, an naana'le li'lak mbanggolage, Eeke neenok,

⁵ Wone onggo an yo'nege nogo neenu age, Ndi, at nen an yo'nege nogo liippege, Ee'netak o.

⁶ At omaawi lombok menggerak me, Oone omaawi paga an noone lek eerogo paniyak mbakop? Lek o. Noone konenigin aret o.

⁷ At enggaanom paga time aap iniki abe koonak nogo nen An ndogop o, yinuk, yoge kenok, at nowak loongga nen, Kat maluk eeka'lek aap obeelom aret o, Yinuk, yo'nenetak kwe,

⁸ Oonegen wundi wage menggim kwaariminggirak kwe, At eebe time aret kage, Oonegen kilu yi nage menggim naminggirak kwe, At nimbirak lambungge,

⁹ O omarip paga pa'nggwe at eeke menggim time Kwaari naminggirak kwe, eebe aret kage, Melak togon o ame pa'nggwe nage kagak, at eebe nenegen liippege, Eeka'lek aret agarik o.

¹⁰ Togop aret kwe, An eeke minggirak perak, at eenu aret me, Mbuti emas kani paga worakwi iinok, Abe age menggi kwak, an nabut mbanogo togop aret eerogo panigin o.

¹¹ At iyok pit nage me, an niyok time aret pit nage, Nena agi-ogu agak eeka'lek tu at nage menggim mban nage,

¹² At lombok nen, Yogop ee'nu ndogop ee'nu, yo'nege nogo, Mbo pega'lek ti mban mugurok nage, At oone ari menggerak nogo niniki kunik eekko'nok li'lak mban eeke, Eeke agarik o.

¹³ Ala ti, iniki alik agak eekeelik aret me, Aap ta nen at eeriyak mbake nogo, non mbanogo pigin mbakop? At iniki mbake nogo mban aret eeke,

¹⁴ Eeppaniyak koonogo pereegerak nogo aret eeppanege, Eerit noorak koonak ti mendek ambik lombok wonage nogo aret eeke, Eeke menggerak ti paga

¹⁵ Ala owagam noorak nagabiti mbake, Eeriyak koonak ambik lombok wonage nogo, Niniki koonit nage logonet, at eebe paga naganak wake, Eeke agarik o.

¹⁶ Ala nen niniki lek-lek eerogo panege, At Omaawi Lombok Menggerak nogo nen namineeri ne eerogo panege, Eeke logonet,

¹⁷ O apit noba lenggenogo panege, O yumaak lombok netenggen naberogo panege, Eekerak kwe, Nooni-noone agan nage agarik o.