Ala Unde 6 - Ala Wone Peenok Peebi Mbanak

¹ Yoge nagagerik, at Aliku ALA nen wone ambi Muta yoge logonet,

^2-3 “Aap ambi nen Naliku ALA noone yugu nogo liippunuk, ndak-ndak eekeelik maluk eeke logonet, oreeluk ambi amendek luulu porogo logowak nduk a, we luulu arum logowak nduk a, wogoremenggerak kwe, at kolaakit nduk, ore nogo we pilit aret, Kamendek nogo kobak agaarak ilik, aakumi nen kumaakaarak a? yinuk, yoge, wu nggwok kunggolegerak kwe, we, Wu mbuuluk kunggirak o, yinuk, ari, aap ambi amendek kobak aremenggerak kwaaremenggerak kwe, we pilit aret, An abet aret koolik o, yinuk, kumbuk mbangge, it aakumi maluk eekwi ti mendek abok aret at ambi eeke kenok ti,

⁴ maluk aret me, kiraakerak kenok a, wi-wi eerikit nduk, wu kunggolegerak kenok a, arum logowak nduk wogoremenggerak kobak age kenok a, aap ambi amendek kobak aremenggerak kwaaremenggerak kwe,

⁵ Kwaarulik o, yinuk, kumbuk mbangge kenok a, ti maluk aret me, omaluk ti, an nen lek eerogo pikit nduk, onggo pi wage logonet, wamenggerak nogo amendek unde wogoge logonet, oba lunogo ambinom seperlima aret wogoruwak o.

⁶ Wogoge logomenggerik, maluk eeremenggerak nogo, lek eerogo pikit nen onggo Naliku ALA nake wo'niri woroorak ti, aanggumi kambin-ndomba ngguunok ambi awinde-obaande eerak lek amuni mbanak, Onggo ndogop puurak, yugu nogo ndak-ndak aret wonok, aap an neebe unde wogori woraawak o.

⁷ Wogori wage kenok, an nen omaluk lek eerogo punuk, nimbirak lambunikit nduk, aap an neebe unde nen nggami aanggo wakwi negen Naliku ALA nake warogo pege kenok, aap ti eerit namenggerak paga maluk eerigin nogo an nen lek eerogo pigin aret o,” yinuk, Muta yoreegerak.

Ala ake warogo kani kunggo logorak wone

⁸ Yoge nagagerik, at Aliku ALA nen Muta yoge logonet,

⁹ “Karun apuri inom nake warogo kani kunggo logonet, eeko logorak wone lengganogo yoroorak nogo yi aret. Nake warogo kani kunggo logorak nogo ti, kani kunggo menggam pi wogwe iinok, kani nengge kagak, o aret weeruwak nen it an neebe unde nen kani nogo wunuk ari logowak nduk, arum liirogon aret logowak o.

¹⁰ Abu aret nengge kenok, aap an neebe unde nogo nen inayum yawenak abu obeelom akem mendek inom, inayum yawenak abu obeelom nggorek endekem mendek inom, yirippunuk, nake pugu kani nengge logonet, wun eerogo pugu kani kunggo menggam wonage nogo wonok, kani kunggo menggam eraaninu time luulu teppunuk,

¹¹ inayum yirik nogo nggoorogo pogo logomenggaarik, inayum we ugun mendek nogo yippunuk, wun pugu nogo nawooliya wurik me nen owa'nagat wurik endekem pogo menggam magame nogome aret pi nogo logowak o.

¹² Ndi, kani kunggo menggam kani kunik wonage ti, noguk yuwak nduk mbo puurak mage o. Ata, mondok wunuk ari logowak nen arum liirogon aret logonet, netik-netak kuubondendok paga kani ambi waganogo mambugwi, an nake warak mbanak nogo kani kunggo menggam ogumbaga koonogo pugwi, ndi, an ninom lambunik logokit nduk, nake warogo wo'nugwi nogo amok inom kani kumbugwi, eeko logowak o.

¹³ Kani kunggo menggam kani kunik wonage ti, noguk yuwak nen mbo puurak mage o. Ata, mondok wunuk ari mban logowak nduk, liirogon unde logowak, yegerak, yoret o,” yinuk, yoreegerak.

Gandum anggen yigirik Ala ake pogo logorak wone

¹⁴ Yoge nagagerik, Ala nen Muta ambinom yoge logonet, “Gandum anggen yigirik nake pugwi iinok, eeko logorak wone yugu yi aret. Gandum anggen yigirik nake pugu nogo ti, it Karun apuri nen wonok Naliku ALA nenggaanom paga kani kunggo menggam nogome pi wage iinok,

¹⁵ it ambit nen nake pugu gandum anggen abe yigirik amburu inom, obari abe kaga nogo inom, ne ambit eenggime woppunuk, Anggen yigirik yi abok kake aret o, yinuk, Naliku ALA nake kani kunemenggerak obari abe kage logonet, nale'nggen kaakit nduk, nake kani kunuwak o.

¹⁶ Ndi, ando nogo Karun apuri inom nen nonggo logorak kwe, ragi inom pega'lek oroti mban worarogo punuk, ninom lambungge minggim nawooliya owa'nagat wurik me nenggak yuwam leenogo pugume taati nen nonggo logowak o.

¹⁷ Yi mendek ndi mendek an nake kani kunuwak nduk, wo'niri wogwe nogo ti, it aap an neebe unde noorak inake ti aret me, ragi inom punuk, worariyak mage o. Aakumi inomaluk mbo puurak nduk, an nake warogo wo'nugwi, ndi, an nake leenogo pugu lalenggwi nogo obaane'me pi wogwe, eekwi ti, nake leenogo pateegirak ti kwak, gandum anggen yigirik worarogo kani kuniyak nduk, Naliku ALA nake wo'niri wogwe nogo kunduk nake leenogo pateegirak o.

¹⁸ Kani kuniyak nduk, nake puurak nogo abok aret ti, Karun inom, apuri-ombowologwe wigannarit nogo logogun inom, inake aret me, aakumi ugun mendek nen nunggwi iinok, maluk eekkolookwak, noorak mage o. Ata, Karun inom, apuri-ombowologwe wigannarit nogo logogun inom, nogo nen aap kenok mban nonggo logowak, yegerak, yoret o,” yinuk, yoreegerak.

¹⁹ Yoge nagagerik, at Aliku ALA nen Muta ambinom yoge logonet,

²⁰ “Karun apuri inom nen it ambi an neebe unde logowak nduk mippiigwi iinok, ne ti eyom paga aret Naliku ALA nake pi wogo logorak nogo yi aret. Gandum anggen abu obeelom yigirik 2 liter negen waganogo, Yi Aliku ALA ake o, yinuk, pugwi nogo mendek ando kuubondendok pugwi, ando kiyoma pugwi, eeko logowak nduk, pi woraawak o.

²¹ Pi wogo logomenggaarik, gandum anggen yigirik nogo amburu paga amok mbanogo togolowak paga ndoonogo worappunuk mbuulogwe-mbaalogwe longgo warogo, Naliku an ALA obari abe kage logonet, nale'nggen kaakit nduk, nake aret kani kunuwak o.

²² It aap an neebe unde inobaane'me inapuri ndarak nen an neebe Ala unde logowak nduk, mippiigo logonet kenok ti, Gandum anggen yigirik Naliku ALA nake pugwi nogo mondok aret pogo logowak o, yinuk, koonogo pereegirak nogo, nake pogo logomenggaarik, pugu nogo apit aret kani kunuwak o.

²³ Togop me, it aap an neebe unde leenogo mippiigwi nogo inalitak lombok nen gandum anggen yigirik Naliku ALA nake pi wogwe iinok, ambi noorak mage. Apit aret kani kunuwak o,” yinuk, yoreegerak.

Inomaluk lek eerogo piyoorak nduk, Ala ake warogo pogo logorak wone

²⁴ Yoge nagagerik, at Aliku ALA nen Muta yoge logonet,

²⁵ “Aakumi inomaluk lek eerogo piyaawak nduk, nake warogo pi wogwe iinok, Karun apuri inom eeko logorak yoroorak nogo yi aret. It aakumi inomaluk lek eerogo puwak nduk, nake pi wogwe nogo ti, an nake pugu abu alik leenak aret me, an nenggaanom paga nake pugu warogo kani kunggo menggam nogome aret warogo pege kenok,

²⁶ omaluk lek eerogo puwak nduk, nake warogo pugu nogo ti, aap an neebe unde nen ninom lambungge minggim nawooliya owa'nagat wurik mage menggim taati nen aret nonggo logowak o.

²⁷ An nake leenak warak nogo mbaanggoorak mage aret me, aap ambi nen mbaanggage kenok, agap aret mbugunggolaagin o. Ndi, aap ambi nake warak amiya nogo tenggek togon ayum paga nabek yemenggerak kenok, o mage menggim time nen koorogo puwak o.

²⁸ Ndi, togolowak nggween mendek ogobakkigirik paga nake warak ti, lako logomenggaarik, togolowak nogo telenogo pugwi, ndi, togolowak mbuti tembaga paga ogobakkigirik nogo paga lako logomenggaarik kenok perak, niyo paga mbilik-mbelek koorogo pugwi, eeko logowak o.

²⁹ Naanggo nake warak ti abu mage lombok me, it an neebe unde aap kenok mban nonggo logowak o.

³⁰ Ti nonggo logorak op kwe, inomaluk lek eerogo punuk, an ninom lambunuwak nduk, nggami aanggo wakwi negen warak amiya nogo wonok lambungge minggim nawooliya wurik mage menggim nogome pi unggwage kenok perak, noorak mage me, kani nawak nen kani kumbege logowak, yegerak, yoret o,” yinuk, yoreegerak.