Ala Unde 20 - Ala Wone Peenok Peebi Mbanak

Maluk eekwi iinok, onggo eeppiigo logorak wone

¹ At Aliku ALA nen Muta yoge logonet,

^2-3 “It aakumi Iterali mendek wone yoroorak nogo yi aret. It aakumi Iterali mendek ambi ilik, aap nggiru aakumi Iterali inenggela'me wonage a, apuluk ambi kugi Molok ake warogo wogoge kenok, apuluk kugi Molok ake warogo wogoremenggerak paga an leenogo pateegim magame nogome maluk eerogo pege, ndi, nendage abu tiyanak alik leenak kwe, meek eerogo pege, eeremenggerak me, aap ti pekkoorak neebi me, nambokan pege neenok, oreewi aakumi Iterali kuwak aago nogo inenggela'me nen enggaawak lek aruwak nduk, yugum paga aret waruwak o.

⁴ Ndi, aap apuluk ambi kugi Molok ake warogo wogoremenggerak nogo oreewi nen waka'lek tebenogo teppugwi iinok,

⁵ an nen aap nogo owe-awot inom pegiyoorak neebi nen nambokan piige logominggirik, kwe ambi ogonggelo mbo punuk, aap alik wuruwak nduk, ngginoorage menggi kwak, an mbo paninuk, kugi Molok ake eeko logonet, ili yemenggerak nogo abok aret aap ti inom aakumi Iterali inenggela'me nen inenggaawak lek eerogo piyaagin o.

⁶ Kwe ambi ogonggelo mbo punuk, aap alik wuruwak nduk, ngginoorage menggi kwak, it an mbo paninuk aakumi kambak inogoma inom, tili pagangga inom, yoraawak nduk ngginoora nogwe iinok, it aap ti pegiyoorak neebi nen nambokan piinok, inoreewi inenggela'me nen inenggaawak lek eerogo pigin o.

⁷ Naliku inogoba Ala an aret me, it nen yogo logonet, An kikak nakeelik abu obeelom Aliku ALA ake leenak aret logokit o, yinuk, yogwe iinok, an Ala nake leenak aret logowak o.

⁸ It kikak naka'lek abu obeelom logowak nduk leenogo piige nogo ti, Naliku ALA an aret me, wone lengganogo yorage nogo nggirik-nggerok porogo logonet, eerit nogo logowak o.

⁹ Aap ambi nen agalo a, ogoba a, kugi pulunogo pege kenok, kambuwak nduk, at mondok warogo puurak aret o. Ndi, at agalo a, ogoba a, kugi pulunogo piyamenggerak paga aaninggin oba kwi'nage logonet, at amiya wungge kenok ti, wone ambi yuurak lek at obaalombok aret oba logowak o.

¹⁰ Aap ambi nen at inom menggaarak ambi akwe wuke kenok, aap kwe nogo imbirak kambuwak nduk, inoorogo piigo logowak o.

¹¹ Aap ambi nen ogoba akwe nogo imbirak nogo yege kenok, at ogoba enegen taanogo punuk, eeremenggerak me, wulaga nogo inom, kwe at agalo nogo inom, imbirak kambuwak nduk, inoorogo piigo logowak o. Inoorogo piyamenggaarak kambugun kenok, wone ambi yuurak lek inamiya it inobaalombok aret inoba logowak o.

¹² Aap ambi nen apuluk akwe kagak imbirak nogo yege kenok, eekulik mendek aret eeremenggerak me, imbirak kambuwak nduk, inoorogo piigo logowak o. Inoorogo piyamenggaarak kambugun kenok, wone ambi yuurak lek inamiya it inobaalombok aret inoba logowak o.

¹³ Aap ambit nen kumi wurinako mengga kwak, aap kagak wuke kenok, eekulik maluk lombok eeremenggerak me, imbirak kambuwak nduk, inoorogo piigo logowak o. Inoorogo piyamenggaarak kambugun kenok, wone ambi yuurak lek inamiya it inobaalombok aret inoba logowak o.

¹⁴ Aap ambit nen kwe ambi agalo aagaluk imbirak wogonake kenok ti, maluk nggwok aret me, maluk ti mendek inenggela'me wigak yukwak, aap inom, kwe nogo aagaluk imbirak inom, ineenik ngge-ngge aret kani kumbiigo logowak o.

¹⁵ Aap ambi nen wam a, nggeewo a, wurinake kenok, at eebe kambuwak nduk, warogo pugwi, ndi, wam a, nggeewo a, ti kunduk, warogo pugwi, eeko logowak o.

¹⁶ Kwe ambi nen wam a, nggeewo a, Wu'nabuwak, mba'nuk inowagam namenggerak wuke kenok, kwe nogo kambuwak nduk, warogo pugwi, nggeewo a, wam a, ti kunduk, kambuwak nduk, warogo pugwi, eeko logowak o. Inoorogo piyamenggaarak kambugun kenok, wone ambi yuurak lek inamiya it inobaalombok aret inoba logowak o.

¹⁷ Aap ambi nen at ogoba apuluk kolaga a, agalo kwe ambi wogo aagaluk kolaga a, wagangge logomenggerik, wuke kenok, at awuluk kagak eeremenggerak nogo ti, eekulik mendek kagak, enggali lek eeremenggerak me, owe-awot inigen iigak, imbirak inenggaawak lek eerogo piigo logowak o. Aap ti, awuluk kagak wuremenggerak me, aaninggin at obaalombok aret kage logogin o.

¹⁸ Aap ambi nen kwe ambi tut kage kagak wuke kenok, aap nogo nen tut kage menggim kin eerogo pege, ndi, kwe nogo nen eeruwak nduk, amendek kin eeppege, eeremenggaarak me, inoreewi inenggela'me nen inenggaawak lek eerogo piigo logowak o.

¹⁹ Aap ambi nen agaloluk a, ombakelo a, wurinake kenok, it mendek maluk eerogo piyookwak me, wurinaburak mage o. Wurinake kenok, kwe-aap imbirak aaninggin inoba aremenggaarak nogo it inobaalombok aret inoba logowak o.

²⁰ Aap ambi nen ogobaluk akwe imbirak nogo yege kenok, at ogobaluk meek eerogo punuk, eeremenggerak me, kwe-aap imbirak maluk eeremenggaarak onggo inaagaluk-inapuluk ndaka'lek wubiliwak aret iigak, kambugun o.

²¹ Aap ambi nen oreeluk akwe mbaka'lek meek eerogo punuk, ndingge logomenggerik, kolamenggerak kenok, it imbirak maluk eeremenggaarak onggo inaagaluk-inapuluk ndaka'lek wubiliwak aret iigak kambugun o.

²² An Ala nen o piya naminggim nggween ti nen peyak wurogo piyookwak, an nen wone lengganogo yorage inom, eeko logorak wone yorage inom, it mondok nggirik-nggerok porogo logonet, eerit nogo logowak o.

²³ It o unde logowak nduk an nen yi aakumi ndi aakumi o time menggaarak mugogo wumbiya nawam nogome mendek nen wone eeriyak mage yagarak nogo eerit nogwe iinok, an abu neebi inombake minggirak me, it eerit nogo menggaarak nogo it Iterali nen mugurok noorak mage o.

²⁴ Yi aakumi ndi aakumi iigak, Naliku inogoba Ala an nen it inalik mban napuri logowak nduk, leenogo piyareegirak me, it aakumi ti, inanggween abu obeelom yilak amburu inom, nggiin amburu inom, niyo eneeri negen kila-kila wungge menggi kwak wonage nogo, Kit unde logomunggup nduk, wokkiraagin, yoragagirak nogo aret wogoraagin o.

²⁵ Togop me, it an napuri Iterali nen yi mendek ndi mendek amiya warak inom, yirowe-ndirowe inom, etenggen liippunuk, Yi mage aago me noorak lek kagi. Yi mage lek ugun noorak kagi, yinuk, eeko logowak o. Yi mendek ndi mendek amiya warak inom, yirowe-ndirowe inom, inaanogum paga nugu menggaarak inom, Ti mendek noorak mage o, yinuk, nggomoorogo pereegirak nogo nunggwi iinok, ineebe maluk eekkolookwak me, noorak mage o.

²⁶ It an napuri lombok logowak nduk, an kikak nakeelik abu obeelom Naliku an ALA nogo nen yi aakumi ndi aakumi iigak, it Iterali mban leenogo piyareegirak me, it an nake leenak aret logowak o.

²⁷ Ndi, aap ambi ilik, kwe ambi a, aakumi kanggaatak inogoma nen abinggaanggo paga yogwi iigak aakumi yorage, tili pagangge, eeke kenok, kambuwak nduk, yugum paga togu eerogo wako logowak o. At waremenggaarak kambigin kenok, amiya wundigin nogo ti, wone ambi yuurak lek obaalombok aret oba logowak, yegerak, yoret o,” yinuk, yoreegerak.