Ala Unde 19 - Ala Wone Peenok Peebi Mbanak

Yi wone ndi wone eeko logorak wone

¹ At Aliku ALA nen Muta yoge logonet,

² “It aakumi Iterali wonogwe abok aret wone yoroorak nogo yi aret. Naliku inogoba Ala kikak nakeelik abu obeelom leenak minggirak me, it togop aret kikak naka'lek obeelom leenak mban aret logowak o.

³ Naliku inogoba Ala an aret me, inalitak lombok nen inagalomini-inogobamini inayuk wukwi, ndi, nogo 6 yippunuk, ko'lu paga yonggonggologo logorak nake leenogo pateegirak nogo liirogon aret abekwi, eeko logowak o.

⁴ Naliku inogoba Ala an nalik aret me, it nen inena nomorogon, inagugi amugurok nogwe, mbuti paga inagugiwak ogobakkigirogo patinuk, alut eekwi, eeko logogwaarik o.

⁵ Ninom lambunik logokit nduk, Naliku ALA nake warogo wo'niriyak mbakwi kenok, niniki ale'nggen inombarikit nen an wone lengganogo yoragagirak nogo ndak-ndak aret eeko logonet, nake puurak nogo warogo punuk,

⁶ mbanak ne ti eyom aret noorak ilik, ko'lu nen noorak a, eeriyak ti op aret kwe, ando ndiinik wonage kagak nogo mbere yippunuk, ko'lukwak ari nage kenok, kani kunggo logowak o.

⁷ Nogo mbere yippunuk, ko'lukwak nunggwi iinok, nake pugu mbanak ti muk maluk aremenggerak me, an waagin lek o.

⁸ Ndi, aap ambi nen Naliku ALA nake pugu leenak ti nengge kenok, at noorak mage yugu kagak, meek mbake logonet namenggerak paga obaalombok aret maluk eekkolaagin me, oreewi inenggela'me nen enggaawak lek eerogo puurak o.

⁹ It Iterali nen yaremenggaarak anggen kole aremenggerak mbanggo logonet, ineyabu ambet paga wundit namenggerak abok aret mbanggwi, anggen mbanggo logonet, nggigi-nggigi wagangge kenok nabenggwi, eeriyak mage o.

¹⁰ Ndi, eyo anggur awi yaremenggaarak anggen yugu mbanggo logonet kunduk, ando teppemenggaarak nogo, peebi ambi mbani nogwe, anggen nggaru-nggaru nggween paga wambemenggerak nogo ambinom nabeni nogwe, eeriyak mage o. Ata, it aakumi ineenggi lek mendek inom, aakumi nggiru inom, kolaawak nduk, teppiigo logowak o, yinuk, Naliku inogoba Ala an nen aret yagi o.

¹¹ It Iterali nen yogoot ambi waganggwi, aakumi inambokan laganggwi, inoone pilit yogwe, eekak yuurak mage o.

¹² Naliku ALA an aret me, inogoba Ala an nendage yuurak mage yugu nogo meek eerogo pukwak, pilit yogo logonet, nendage kunogo kumbuk mbaniyak mage o.

¹³ It inom menggaarak nogo wi-wi aganakwi, inamendek yogoot waganggwi, eeriyak mage o. Ndi, onggo wogoroorak nduk, ineyabu eeppiyamenggaarak nogo, wogoraga'lek iigak nogo ambi yuurak mage o.

¹⁴ Naliku ALA an aret me, inogoba Ala an nayuk wuko logonet, aap inaruk logu iinok kugi pulunogo piigwi, aap inigen mbuk iinok inaganak waawak nduk, yugum inenaame pi wogwe, eeriyak mage o.

¹⁵ Aakumi inowak loonggo logonet, maluk-maluk inowak loonggwi, aap ineenggi lek iinok, inawone abe koonogo piiga'lek yiri-wuri eerogo piinok, aap ineenggi warak iinok, inawone abe koonogo piigwi, eeriyak mage o. Ata, Aap yi ninom ndak-ndak aret o, yinuk, eeremenggaarak ndak-ndak aret inowak loonggo logowak o.

¹⁶ Naliku ALA an aret me, inoreewi inabok mbanggo logonet, miyuk-meya eerogo piigwi, inooriyak nduk koonggwi iigak, Inobaalombok o, yinuk, teppiigwi, eeriyak mage o.

¹⁷ Inore ambi maluk eeremenggerak paga, Peebi maluk eeppikit o, yinuk, inikime mban kumaapporogo wonogwe iinok, inom ndak-ndak maluk aret me, Aap yi neebi o, yinuk, ambi eeppikit nduk inikime kumaapporogo logorak mage o. Ata, maluk eeremenggerak nogo kin paga aret aruk wako logowak o.

¹⁸ Naliku ALA an aret me, inore ambi nen maluk eeppiige kenok, inanini nen onggo at maluk eeppugwi, ndi, Yi ee'nakerak ao, yinuk, inikime mban porogo wonogwe, eeriyak mage o. Ata, it ineebe iniki kunik eekkologo menggaarak ti kwak, aakumi inom menggaarak ti, togop aret iniki kunik aganako logowak o.

¹⁹ Wone lengganogo yorage nogo ti, porogo logonet, liirogon eerit nogo logowak o. Wam nen nggeewo imbirak lambumbiigulik kagak, anebunu ambi nen anebunu alik ambi imbirak lambumbiigwi, yabu ambit wogo paga anggen awi alitak mendek kagak, imbirak lambunogo yakwi, ndi, ligi awut ero alitak mendek kagak, yum ambit yugwi, eeko logorak mage o.

²⁰ Ndi, aap ambi ayeloman kwe wonage logonet, onggo kungge, wondet eerogo pege, eeka'lek kagak, aap alik ambi nen kwe nogo wuke kenok, maluk aret eeremenggerak me, onggo puurak aret kwe, ogoba nen kwe nogo wondet agago puurak kwe, awo porogo wonage kagak eeremenggerak me, imbirak kambuwak nduk, inoorogo piyoorak mage o. Ata, maluk eeremenggerak nogo mban onggo puwak o.

²¹ Ndi, aap nogo omaluk lek eerogo puwak nduk, onggo ndomba ngguunok kenok wonok an ninom lambungge minggim nawooliya wurik tungga'nggi paga taati Naliku ALA nake pi woraawak o.

²² Omaluk lek eerogo pikit nduk, onggo ndomba pi wage nogo aap an neebe unde nogo nen waganogo maluk eeremenggerak nogo lek eerogo punuk, nimbirak lambunikit nduk, nggami aanggo wakwi kwak, Naliku ALA nake warogo pege kenok, an nen omaluk lek eerogo pigin o.

²³ It o Kanan time unggwi nogo logomenggaarik wonogo logonet, yi eyo ndi eyo anggen nonggo menggaarak mendek awi yappunuk, Anggen yege kenok, mbanogo noorak mage o, yinuk, mbanogo nengga'lek iigak, tahun 3 aret aruwak o.

²⁴ Ndi, tahun 3 eeppunuk, tahun ambi eeko logonet perak, eyo yaremenggaarak anggen yemenggerak nogo abok aret an nake leenak me, At Aliku ALA nen wo'niragaarak me wa, yinuk, nake mban aa'nduk pogo logowak o.

²⁵ Ndi, tahun 4 abu eeppunuk, tahun ambi eeke logonet kenok perak, eyo anggen yit namenggerak nogo mbanogo it nonggo logorak op aret o. Togop eekwi iinok, yaremenggaarak anggen ti oba lu'luk yi'nage aret logogin o, yinuk, Naliku inogoba Ala nen aret yagi o.

²⁶ Yi mendek ndi mendek amiya wungga'lek kagak warak mbanak noorak mage o. Tili paganggwi, ninggirak iyak wukwi, eeriyak mage mban o.

²⁷ Ineeruwak inanobak yendok-wandok mbanggwi, inamboro irip to eerogo mbanggwi, eeko logorak mage o.

²⁸ Naliku ALA an aret me, it inagabolo paga liiru mbanak negen a'lip kaawak nduk, liiru ndanuk eerogo pugwi, aakumi kanggwi iinok, inagabolo paga nggawi penek eerogo pugwi, eeriyak mage o.

²⁹ It o unggwi nanuk logowam time nen inapurilogwe ugun-ugun wurinabit nogo logonet, o time maluk lombok wigak yukwak me, it inapurilogwe komologwe maluk eeka'lek abu obeelom aret wonogwe iigak, maluk eeppiigo logowak nduk, Komologwe yi terak wurinaka logowak o, yinuk, leenogo piyoorak mage o.

³⁰ Naliku ALA an aret me, nogo 6 yinuk, ko'lu paga yonggonggologwe puk logowak nduk, leenogo pateegirak nogo abekwi, nawooliya wurik magame nogome ayuk wukwi, eeko logowak o.

³¹ Naliku inogoba Ala an aret me, aakumi kambak inogoma inom, tili pagangga inom, Wone ambi yo'niraawak o, yinuk, inowagam nogwe iinok, inawone kiliriramenggaarak paga maluk eeginabukwak me, inowagam nogo logorak mage o.

³² Naliku ALA an aret me, aap inanggok iinok, inabu'me tebe yinuk inayuk wukwi, ndi, an inogoba Ala inagabiti nombakwi, eeko logowak o.

³³ Naliku inogoba Ala an aret me, aakumi nggiru inenggela'me inom wonogwe kenok ti, meek inombako logonet, tebenogo piyoorak mage o.

³⁴ It Iterali o maan Metit time aakumi nggiru negen aret wonogogwaarak nogo iniki abeko logonet, aap nggiru inenggela'me inom wonogwe nogo ti, Nit Iterali mendek negen aret wonogwe o, yinuk, ineebe iniki kunik eekkologo mengga kwak, it aap nggiru kunduk togop aret iniki kunik aganako logowak o.

^35-36 Naliku o Metit nen wogoren wagagirak inogoba Ala an aret me, irip nggorek metet paga wakkogwe, yi mendek ndi mendek aaninggin wakkogwe, eebe yonggolak wakkogwe, eeko logonet, wi-wi aganabuwak nduk, pilit-pilit, Ndogop kuli agaarak o, yinuk, yoroorak mage o. Ata, aaninggin abe paga aret wakkogwe, aaninggin wakkogo logonet ari nage menggerak paga aret wakkogwe, eebe yonggolak ndak-ndak aret wakkogwe, eebe toolak ndak-ndak aret wakkogwe, eeko logowak o.

³⁷ Naliku ALA an aret me, wone lengganogo yorage nogo inom, eeko logorak wone yorage nogo inom, abok aret porogo logonet, liirogon eerit nogo logowak, yegerak, yoret o,” yinuk, yoreegerak.