Ala Unde 17 - Ala Wone Peenok Peebi Mbanak

Amiya nonggo logorak mage yoreegerak wone

¹ At Aliku ALA nen Muta yoge logonet,

² “Naliku an ALA nen wone, Yogop ee'nu ndogop ee'nu, yinuk, at Karun inom, at apurilogwe inom, it aakumi Iterali mendek abok aret inom, yoroorak nogo yi aret o.

^3-4 It aakumi Iterali mendek ambi nen tapi-ndomba ilik, kambin a, Ala ake warogo pikit, mba'nuk, wonok an ninom lambungge minggim nawooliya wurik me tungga'nggi paga taati Naliku ALA nenggaanom paga wari wage lek aakumi inawooliya oore'nggam ilik, we ugun endekem a, warogo pege kenok, at nen wone yugu nogo taganogo pege logonet, amiya we lek me kilirogo wuppemenggerak onggo puurak nogo at oba aret ariyak me, oreewi inenggela'me nen enggaawak lek logowak nduk, endekem wumbogo logowak o.

⁵ Wone yi nogo ti, it aakumi Iterali mendek nen an nake warogo puurak mbakwi kenok, endekem yabu yarak me nen ugun warogo pugwi nogo mbo punuk, nawooliya wurik me tungga'nggi paga nen mban Naliku ALA nake warogo pogo logowak nduk, yokkigi o. Nake warogo puurak nogo wonok an ninom lambungge minggim nawooliya wurik tungga'nggi paga taati Naliku ALA wo'niri wogo logomenggaarik, it ninom lambunik logowak nduk, aap an neebe unde nen an nake warogo puurak nogo mendek me nduk, wogogwi iinok, nenggaanom paga nake warogo wo'niruwak o.

⁶ Warogo punuk, amiya nogo ninom lambungge minggim nawooliya wurik me tungga'nggi paga Naliku ALA nake kani kunggo menggam eraanu time werenogo pege, ndi, amok-ape kenok, kani kunemenggerak Naliku ALA obari obeelom kage logonet, niniki ale'nggen mbarikit nduk, kani kungge, eeke logowak o.

⁷ Kwe ambi ogonggelo mbo punuk, aap alik ambi imbirak lambungge menggi kwak, it aakumi Iterali mendek nen inogoba Ala an mbo paninuk, inagugi kambin pogom ake warogo pugwi nogo, ambinom ake pogo logorak mage o. Wone yi nogo ti, it aakumi Iterali mendek inom, inapuri-inombowologwe nda'narit nogo logogun nogo inom, mondok-mondok eeko logowak o, yinuk, yoroorak.

⁸ Ti yorage logomenggendik, ambinom yoroorak nogo yi o. It aakumi Iterali mendek ambi nen ilik, aakumi nggiru Iterali mendek inenggela'me wonogwe ambi nen a, inaanggo warogo an nake kani kunggwi kenok ilik, an nake warogo pugwi kenok a,

⁹ an ninom lambungge minggim nawooliya wurik me tungga'nggi paga taati Naliku ALA nake warogo pege lek endekem ugun warogo pege kenok, aap ti oreewi inenggela'me nen enggaawak lek eerogo endekem wumbogo logowak, yegerak, yoret o,” yinuk, yoreegerak.

Amiya inom, kambak mendek inom, nonggo logorak mage yoreegerak wone

^10-11 Yoge nagagerik, wone ambinom it nogo yoraawak nduk, Muta yoge logonet, “Yi mendek ndi mendek ineenik nugu menggaarak abok aret nogo ti, ineenik aganake menggerak alom inamiya aret o. Amiya ti paga nen maluk onggo inooka'lek teppiige minggirak me, it inooka'lek inomaluk mbo punuk, ninom lambunikit nduk, nggami aanggo wakwi kwak, nake warogo kani kunggo menggam inake amiya kilirogo pogo logowak o, yinuk, yoragagirak me, it aakumi Iterali mendek ambi nen ilik, aakumi nggiru inenggela'me inom wonogwe ambi nen a, amiya ambi nengge kenok ti, an pekkoorak neebi me, nambokan mbo punuk, oreewi inenggela'me nen nggiginogo enggaawak lek logowak nduk wumbigin aret o.

¹² Togop me, it aakumi Iterali mendek inom, aakumi nggiru inenggela'me inom wonogwe nogo inom, Amiya nonggo logorak mage o, yinuk, it aakumi Iterali mendek yoraanok nduk, yokkigi o.

^13-14 Yi mendek ndi mendek abok aret ti, ineenik aganake menggerak alom inamiya aret me, it aakumi Iterali mendek ambi nen ilik, aakumi nggiru inenggela'me wonogwe ambi nen a, nonggo menggaarak mendek towe ilik, pagi a, ambi eenik maappunuk, wake logonet, amiya kilirogo wuppunuk, nggween tebenogo pogo logomenggaarik, eebe nonggo logowak o. Ti eeko logorak nogo ti, Yi mendek ndi mendek abok aret ineenik aganake menggerak alom inamiya aret kagak nunggwi iinok, inoreewi inenggela'me nen nggiginogo enggaawak lek logowak nduk wumbukwak, amiya ambi nonggo logorak mage o, yinuk, aakumi Iterali mendek yoragagirak nogo alom ti nduk aret yoragagirak o.

¹⁵ Ndi, it aakumi Iterali mendek ambi nen ilik, aakumi nggiru it inenggela'me menggaarak ambi nen a, alik en kambemenggerak enggaanggum inom, nggeewo ta'ngge anini warak nen nibinemenggerak enggaanggum mendek inom, nengge logomenggerik kenok ti, ayum liirogon yi kooke, eebe liirogon ngguu'mo wake, eeke logomenggerik, eebe maluk eekkolamenggerak wonage kagak, oonegen kilu yi nage kenok, obeelom aret arigin o.

¹⁶ Ndi, ayum kookkolage, eebe ngguu'mo wakkolage, eeka'lek kenok perak, aaninggin at obaalombok aret kaagin, yegerak, yoret o,” yinuk, yoreegerak.