Ala Unde 15 - Ala Wone Peenok Peebi Mbanak

Kumi-aap inoona mendek paga inanggore'na a, inamiya a, wungge kenok, eeko logorak wone

¹ At Aliku ALA nen Muta Karun yorage logonet,

² “Aakumi Iterali yoroorak nogo yi aret. Aap ambi oona mendek paga anggore'na wundi wage kenok, anggore'na ti, ogole warak aret mbaruwak o.

³ Oona mendek paga anggore'na wundi wage kenok a, wundi waga'lek wonage kenok a, nogo ti, at eebe maluk aret eerogo pigin me, eebe maluk aremenggerak wonage kagak, aap ambi nen mbaanggage kenok eeko logorak nogo yi o.

⁴ Aap ambi oona mendek paga anggore'na wungge kagak nogo yege kenok, nogo yemenggim maluk age, kwi'nage kenok, kwi'naremenggim taati maluk age, eeremenggerak me,

⁵ nogo yemenggim nogome aap ambi nen mbaanggage logomenggerik kenok, at ayum koorogo pake, niyo paga ngguu'mo wakkolage, eeke logomenggerik, aap oona mendek paga eebe maluk aremenggerak nogo wonage kagak, oonegen aret kilu yi nawak o.

⁶ Aap oona mendek paga anggore'na wungge kagak kwi'naremenggim aap ambi nen kwi'nage logomenggerik kenok, ayum koorogo pake, niyo paga ngguu'mo warogo pake, eeke logomenggerik, aap oona mendek paga eebe maluk aremenggerak nogo wonage kagak oonegen aret kilu yi nawak o.

⁷ Aap oona mendek paga anggore'na wungge nogo aap ambi nen eebe mbaanggage logomenggerik kenok, ayum koorogo pake, niyo paga ngguu'mo wakkolage, eeke logomenggerik, aap oona mendek paga eebe maluk aremenggerak nogo wonage kagak oonegen aret kilu yi nawak o.

⁸ Aap oona mendek paga anggore'na wungge nogo nen awoori aap agap ki ambi oba lenggenogo nappege kenok, aap agap ki nogo nen ayum koorogo pake, niyo paga ngguu'mo wakkolage, eeke logomenggerik, maluk oba aremenggerak nogo wonage kagak, oonegen aret kilu yi nawak o.

⁹ Aap oona mendek paga anggore'na wungge nogo nen kuda amborowak paga yum ndoonogo kwi'nage kenok, yum ti kunduk maluk mban aret arigin o.

¹⁰ Ndi, aap yum ndoonogo punuk, kwi'naremenggerak nogo aap ambi nen mbaanggage kenok, eebe ogole warak maluk aret arigin me, wonage kagak oonegen aret kilu yi nawak o.

¹¹ Aap oona mendek paga anggore'na wungge nogo nen eenggi kooka'lek kagak aap ambi mbaanggage kenok, aap mbaanggamenggerak nogo eebe ogole warak maluk aret aremenggerak me, ayum kookkolage, eebe niyo paga ngguu'mo warogo pake, eeke logomenggerik, ogole warak maluk oba aremenggerak nogo wonage kagak oonegen aret kilu yi nawak o.

¹² Aap ti nen togolowak nggween mendek ogobakkigirik nogo mbaanggage kenok, togolowak ti telenogo pugwi, eyo mendek paga yi mendek ndi mendek eeko menggaarak mbaanggage kenok, niyo paga koorogo pugwi, eeruwak o.

¹³ Ndi, aap oona mendek paga anggore'na wungge nogo abu aret lek age kenok, ne 1 nen 7 kuli linggimbunuk, Abu obeelom agaarak, kaawak nduk, ayum koorogo pake, eebe niyo eneeri abe wungge paga ngguu'mo wakkolage, eeke kenok, eebe obeelom aret arigin mbaruwak o.

¹⁴ Nogo 7 yippunuk, ko'lu paga towe puume mbere ilik, towe kurona mbere a, wagangge logomenggerik, Naliku ALA nenggaanom paga nawooliya wurik me an ninom lambungge minggim tungga'nggi paga aap an neebe unde wonage me taati owagam pi woraawak o.

¹⁵ Pi wage kenok, aap an neebe unde nen towe ore aap nogo omaluk lek eerogo pikit nduk, nake warogo wo'nege, ndi, towe ore nogo nake warogo kani kungge, eeruwak o. Togop eeko logorak ti, aap oona mendek paga anggore'na wungge logonet, eebe maluk aremenggerak nogo obeelom eerogo puwak nduk, aap an neebe unde nen Naliku ALA nenggaanom paga eeko logorak nogo ti aret o.

¹⁶ Aap ambi nen oona mendek wungge kenok, eebe apit aret niyo paga ngguu'mo wakkolage logomenggerik, eebe maluk aremenggerak nogo wonage kagak, oonegen aret kilu yi nawak o.

¹⁷ Ndi, aap oona mendek nogo yum paga inom, yi mendek ndi mendek agabolo paga ogobakkigirik nogo paga inom, wangge kenok ti, apit aret niyo paga koorogo punuk, maluk aremenggerak nogo wonage kagak, oonegen aret kilu yi nawak o.

¹⁸ Ndi, kwe ambi aap imbirak nogo yogo logonet, aap oona mendek wangge kenok, kwe aap imbirak ineebe niyo paga ngguu'mo wakkologo logomenggaarik, ineebe maluk aremenggerak nogo wonage kagak, oonegen aret kilu yi nawak o.

¹⁹ Ndi, kwe ambi tut kage logonet, eebe maluk negen aremenggerak nogo lek aruwak nduk, tokkage kagak, ne 7 aret logowak o. Ndi, at eebe maluk aremenggerak nogo lek eeruwak nduk, tokkage kagak, it ambi nen kwe nogo mbaanggogwe iinok, it kunduk ineebe maluk aremenggaarak me, wonage kagak, oonegen aret kilu yi nawak o.

²⁰ Kwe tut kage logonet, yi mendek ndi mendek paga windak logomenggim inom, kwi'naremenggim inom, maluk aremenggerak me,

²¹ at ambi nen kwe nogo yemenggim nogo mbaanggage logomenggerik, ayum nogo koorogo pake, eebe niyo paga ngguu'mo warogo pake, eeke logomenggerik, eebe maluk aremenggerak nogo wonage kagak, oonegen aret kilu yi nawak o.

²² At ambi nen kwe kwi'naremenggim nogo mbaanggage logomenggerik, ayum koorogo pake, eebe niyo paga ngguu'mo wakkolage, eeke logomenggerik, eebe maluk aremenggerak nogo lek age kagak, oonegen aret kilu yi nawak o.

²³ Yi mendek ndi mendek paga nogo yemenggim ilik, kwi'naremenggim a, abok aret it ambi nen mbaanggogwe iinok, ineebe maluk aremenggaarak me, wonogwe iigak, oonegen aret kilu yi nawak o.

²⁴ Ndi, aap ambi kwe ambi tut kage kagak imbirak nogo yege kenok, aap ti, eebe maluk eekkolamenggerak me, wonage kagak ne 7 aret aruwak o. Ndi, nogo yege logomenggim kunduk, maluk aret arigin o.

²⁵ Kwe ambi nen tut kage menggim nogo eyom paga lek, we alik eyom paga amiya kulinik-kalinik eeke kenok a, tut kage logonet, ne ti paga lek age menggerak nogo kagak nabenak mban eeke kenok a, at tut kage logonet eebe maluk age menggi kwak, amiya kunik aret eeke kagak, eebe maluk aret logogin o.

²⁶ Kwe ti, amiya nabenak mban eeke logonet windak logomenggim inom, kwi'naremenggim inom, nogo ti, tut kage logonet, maluk eerogo pege menggi kwak aret arigin o.

²⁷ Togop aret me, it ambi nen kwe nogo, nogo yemenggim inom, kwi'naremenggim inom, mbaanggogwe iinok, inayum koorogo pakwi, niyo paga ngguu'mo wakkologwe, eeko logomenggaarik, ineebe maluk aremenggaarak nogo wonogwe iigak, oonegen aret kilu yi nawak o.

²⁸ Ndi, kwe amiya kuluk eeke logomenggerak nogo lek age kenok, nogo 7 yippunuk, eebe obeelom aret aremenggerak me, ugun nege logorak op o.

²⁹ Ndi, nogo 7 yippunuk, ko'lu paga towe puume mbere ilik, towe kurona mbere a, wagangge logomenggerik, an ninom lambungge minggim nawooliya wurik tu unggwogo menggam aap an neebe unde wonage me pi wage kenok,

³⁰ aap an neebe unde nogo nen towe ore nogo, kwe nogo omaluk lek eerogo puwak nduk nake wo'nege, ndi, towe ore nogo nake warogo kani kungge, eeruwak o. Ti eeriyak nogo ti, kwe amiya kuluk eeke logonet, eebe maluk aremenggerak nogo obeelom aruwak nduk, Naliku ALA nenggaanom paga ake eeriyak nogo ti aret.

³¹ Togop aret me, it aakumi Iterali ti, nawooliya wurik inenggela'me wonage me time maluk eerogo pugwi iinok, ineebe maluk eekkologo logomenggaarik, kambukwak me, wone yugu taganogo punuk eeremenggaarak paga ineebe maluk ogwe iyo, liippunuk, eeko logowak o,” yinuk, yoragagerak.

³² Aap ambi oona mendek paga anggore'na wungge a, oona mendek wambemenggerak paga eebe maluk eerogo pege a,

³³ kumi tut kogwe a, kwe a, aap a, inoona mendek paga inamiya inom eekwi a, aap ambi kwe tut kage me imbirak nogo yege a, eekwi iinok, eeko logorak wone lengganogo yoragagerak nogo ti aret o.